ہانگ کانگ: ایشیا میں سردی کا راج برقرار ہے، شدید برف باری نے افغانستان، جاپان اور چین میں نظام زندگی مفلوج کر دیا۔
عالمی میڈیا رپورٹس کے مطابق تین ایشیائی ممالک چین، جاپان اور افغانستان میں شدید برف باری کی وجہ سے نظام زندگی مفلوج ہو گیا ہے، افغانستان میں کڑاکے کی سردی نے معمولات زندگی معطل کر دیا۔
ایشیائی ممالک میں موسم سرما کے دوران ہلاکتوں کی تعداد 150 سے تجاوز کر گئی ہے، جاپان کے مختلف شہروں میں درجہ حرارت منفی 10 تک گر گیا۔
چینی صوبوں شنگھائی، شیڈونگ، جیانگ ژی سمیت دیگر صوبوں میں برف باری کے باعث یلو الرٹ جاری کر دیا گیا ہے، ریلوے ٹریکس بھی جم گئے ہیں، چین کے شمال مشرقی شہر ژنکی میں درجہ حرارت منفی 49 ہو گیا ہے۔ چینی ماہرین موسمیات کے مطابق شمالی ترین شہر موہے میں اتوار کو درجہ حرارت منفی 53 ڈگری سیلسیس (مائنس 63.4 ڈگری فارن ہائیٹ) تک گر گیا، جو اب تک کا سب سے سرد ترین ریکارڈ ہے۔
موہے شہر کے حکام کے مطابق برفانی دھند (ایک موسمی رجحان جو صرف شدید سردی میں ہوتا ہے، جب ہوا میں پانی کی بوندیں مائع کی شکل میں رہتی ہیں) بھی اس ہفتے شہر میں متوقع ہے۔
سی این این کے مطابق مشرقی ایشیا کو ایک مہلک سردی نے اپنی لپیٹ میں لے لیا ہے، جس سے جاپان میں کم از کم 4 افراد کی موت ہو گئی ہے، جاپانی حکام کا کہنا تھا کہ بدھ اور جمعرات کو مرنے والے چاروں افراد برف صاف کر رہے تھے۔
موسمیاتی ماہرین نے خبردار کیا ہے کہ اس طرح کے انتہائی موسمی واقعات اب ’نیا معمول‘ بن چکے ہیں۔ ان کا کہنا ہے کہ گرمیوں میں انتہائی گرم موسم اور سردیوں میں انتہائی سرد موسم موسمیاتی تبدیلی کا اشارہ ہے۔
جنوبی کوریا میں اس ہفتے بھاری برف باری کی وارننگ جاری کی گئی تھی کیوں کہ دارالحکومت سیئول میں درجہ حرارت منفی 15 ڈگری سیلسیس (5 ڈگری فارن ہائیٹ) تک گر گیا تھا، دیگر شہروں میں بھی یہ ریکارڈ کم ترین سطح پر گر گیا تھا، اور بدھ سے جمعرات تک رات گئے شدید برف باری شروع ہوئی۔
اس ماہ کے شروع میں روسی سائبیریا میں، یاکوتسک شہر میں درجہ حرارت منفی 62.7 ڈگری سیلسیس (مائنس 80.9 ڈگری فارن ہائیٹ) ریکارڈ کیا گیا تھا، یہ دنیا کا سرد ترین شہر ہے۔
افغانستان کو بھی سردی کی شدید لہر کا سامنا ہے، طالبان حکام نے کم از کم 157 افراد کی ہلاکت کی اطلاع دی ہے، افغانستان اپنی اب تک کی سرد ترین سردیوں میں سے ایک سے گزر رہا ہے، حکام نے بتایا کہ رواں ماہ درجہ حرارت منفی 28 ڈگری سیلسیس تک گرا۔
ادھر پاکستان کے شمالی علاقوں میں بھی پچھلے پانچ سات دنوں سے بارش اور برف باری کا سلسلہ جاری ہے، پاکستان کے چیف میٹرولوجسٹ سردار سرفراز نے بتایا کہ سوات، کالام اور مالم جبہ میں زیادہ برفباری ہوئی ہے، بلوچستان میں زیارت، چمن اور ژوب میں برفباری ہوئی۔
