Tag: شدید دھند

اسلام آباد : جڑواں شہروں کے اطراف شدید دھند کے باعث اسلام آباد ایئرپورٹ پر فلائٹ آپریشن متاثر ہوا، جس سے پروازوں کی آمد اور روانگی تاخیر کا شکار ہے۔

تفصیلات کے مطابق پنجاب بالائی سندھ اورخیبرپختونخوا میں دھند کے ڈیرے ہیں اور اسلام آباد راولپنڈی بھی دھند کی لپیٹ میں آگئے۔

جڑواں شہروں کے اطراف شدید دھند کے باعث حدنگاہ انتہائی کم ہوگئی ، جس سے زمینی اور فضائی سفر کا نظام متاثر ہوا۔

ایوی ایشن ذرائع کا کہنا ہے کہ حدنگاہ انتہائی کم ہونے پر شارجہ اسلام آباد کی پروازپی کے 182 کی پشاور میں لینڈنگ کی، بحرین، لندن، دمام اور دبئی سے پروازوں کی اسلام آباد آمد میں تاخیرہوئی جبکہ اسلام آباد سے استنبول، دمام، بحرین اور لندن پروازوں کی روانگی بھی تاخیر کا شکار ہے۔

دوسری جانب پنجاب میں شدید دھند کے باعث ٹرینوں کا شیڈول بری طرح متاثر ہورہا ہے اور پشاور، راولپنڈی، لاہور سے کراچی جانے والی ہر ٹرین کی تین سے چار گھنٹے تاخیر معمول بن گئی ہے

دھند کے باعث موٹر وے ایم ٹواسلام آباد سے بلکسرانٹر چینج تک بند کردی گئی ہے اور موٹروے ایم ون پشاور سے برہان تک سوات موٹروے کرنل شیر خان سے اسماعیلہ تک ٹریفک معطل ہے جبکہ موٹروےایم فائیو شیر شاہ سے روہڑی تک ٹریفک روک دی گئی ہے۔

لاہور: پاکستان ریلوے نے شدید دھند میں ٹریک کو کلیئر دکھانے والا جدید ترین نظام متعارف کروادیا، جس کی مدد سے انجن میں بیٹھے ڈرائیور کافی حد تک سہولت میسر ہوگی۔

تفصیلات کے مطابق پاکستان ریلوے کے انجینئرز نے یو ای ٹی کے انجینئرز کے ساتھ مل کر ایک ایسا "ڈیجیٹل ریلوے ڈرائیونگ سسٹم” تیار کرلیا ہے جو نہ صرف حادثات سے روک تھام میں ایک اہم پیش رفت ہے بلکہ یہ سسٹم ٹرین ڈرائیورز کو سخت دھند اور دھوئیں(اسموگ) کی صورت میں بھی ٹریک کو 700 میٹر تک صاف دکھاتا ہے۔

اس سسٹم کا کامیاب ٹرائل کیا جاچکا ہے اور ابتدائی طور پر اس کو چار انجنوں میں انسٹال کیا جائے گا، رواں سال ہی یہ تعداد بڑھائی جائے گی اور درجہ بہ درجہ اس کا دائرہ کار تمام ٹرینوں تک بڑھا دیا جائے گا۔

چیف ایگزیکٹو آفیسر پاکستان ریلویز شاہد عزیز نے ڈویژنل سپرنٹنڈنٹ ریلوے لاہور محمد حنیف گل کے ہمراہ ٹرین ڈرائیور معاون سسٹم کا افتتاح کیا۔ ’ٹرین ڈرائیور معاون سسٹم‘ کا آغاز لاہور سے کراچی جانے والی کراچی ایکسپریس سے کیا گیا۔

یہ سسٹم یونیورسٹی آف انجینئرنگ اینڈ ٹیکنالوجی کے الخوازمی انسٹیٹیوٹ کے تعاون سے بنایا گیا ہے۔ ڈرائیور معاون سسٹم شدید دھند میں 700 میٹر تک بغیر کسی رکاوٹ کے ڈرائیور کو کلیئر راستہ دکھائے گا۔

اس کے علاوہ ڈیجیٹل سسٹم 700 میٹر تک سگنلز، لیول کراسنگز، گیٹس، ٹریس پاسنگ کے علاوہ دیگر خطرات کی بھی نشاندہی کرے گا۔

افتتاح کے موقع پر چیف سگنل اینڈ ٹیلی کام انجینئر محمد احمد، پروجیکٹ ڈائریکٹر طارق عزیز، چیف آپریٹنگ سپرنٹنڈنٹ سیفٹی محمد علی چاچڑ، چیف مکینیکل انجینئر لوکو غلام قاسم سمیت ڈویژنل و اسسٹنٹ افسران بھی موجود تھے۔

سی ای او ریلویز شاہد عزید کا کہنا تھا کہ ٹرین ڈرائیور معاون سسٹم سے دھند کے دنوں میں ٹرینوں کی وقت پر آمد و رفت میں بہتری آئے گی اور سسٹم سے شدید دھند کے دنوں میں حادثات کی روک تھام میں بھی مددگار ثابت ہوگا جبکہ یہ سسٹم پاکستان ریلویز میں ریسرچ اینڈ ڈویلپمنٹ کے لیے سنگ میل ثابت ہوگا۔