کراچی : شہر قائد میں سمندری ہوائیں چلتے ہی گرمی میں کچھ کمی ہوئی تو شہریوں نے سکھ سانس لیا لیکن محکمہ موسمیات نے خبردارکیا ہے کہ پیر سے پھر شدید گرمی کا امکان ہے۔
تفصیلات کے مطابق مئی سال کا گرم ترین مہینہ قرار دے دیا گیا ، موسم کاحال بتانے والوں نے اکتیس مئی تک شدید گرمی کی لہر برقرار رہنے کی پیش گوئی کردی ہے۔
محکمہ موسمیات کا کہنا ہے کہ کراچی میں آج گرمی گذشتہ دو روز کے مقابلے میں نسبتاً کم ہے، آج سمندری ہوائیں بند رہیں گی جبکہ مغرب کی جانب سے پندرہ سے تیس کلو میٹر فی گھنٹہ کی رفتار سے ہوائیں چل رہی ہیں، دن کے اوقات میں ہوا میں نمی کا تناسب پچیس سے چالیس فیصد کے درمیان رہنے کی توقع ہے۔
کراچی کا موجودہ درجہ حرارت 38 ڈگری اور ہوا میں نمی کا تناسب 28 فیصد ہے جبکہ آج درجہ حرارت 38 سے40 ڈگری سینٹی گریڈ تک جانے کا امکان ہے۔
محکمہ موسمیات کے ڈائریکٹر عبدالرشید کا کہنا ہے کہ پیر یا منگل سے ایک اور ہیٹ ویو کراچی کا رْخ کرسکتی ہے۔
پیر سے شروع ہونے والی ممکنہ ہیٹ ویو کے پیش نظرشہر کے مختلف علاقوں میں ہیٹ اسٹروک کیمپ قائم کئے گئے ہیں جبکہ ماہرین نے شہریوں کو دھوپ میں بنا مجبوری کے جانے سے گریز کرنے اور سر کو گیلا رکھنے کا مشورہ دیا ہے۔
گزشتہ روز بھی شہر کا درجہ حرارت بیالیس ڈگری سینٹی گریڈ ریکارڈ کیا گیا تھا۔
کراچی کے بعد لاہور والے بھی شدید گرمی سے نڈھال ہے، لاہور میں پارہ تینتالیس ڈگری کو چھونے کا امکان ہے ، چیف میٹرولوجسٹ محمد ریاض کا کہنا ہے کہ لاہور میں گرمی کا زور چار دن تک رہے گا۔
دوسری جانب ملک کے بیشتر حصوں میں آج موسم گرم اور خشک رہنے کی توقع ہے لیکن اسلام آباد، بالائی پنجاب، بالائی خیبرپختونخوا، فاٹا، کشمیر اور گلگت بلتستان میں چند مقامات پر تیزہواؤں اور گرج چمک کے ساتھ ہلکی بارش کی پیشگوئی کی گئی ہے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
