ARYNews.tv | Urdu – Har Lamha Bakhabar

Tag: شدید گرمی

  • کراچی میں ہیٹ ویو الرٹ جاری ، درجہ حرارت40ڈگری سے تجاوز کرسکتا ہے

    کراچی میں ہیٹ ویو الرٹ جاری ، درجہ حرارت40ڈگری سے تجاوز کرسکتا ہے

    کراچی : محکمہ موسمیات نے خبردار کیا ہے کہ آج سے 5 اپریل تک کراچی سمیت سندھ بھر میں شدید گرمی پڑے گی ، درجہ حرارت40 ڈگری سینٹی گریڈ سے تجاوز کرسکتا ہے۔

    تفصیلات کے مطابق محکمہ موسمیات نے کراچی میں ہیٹ ویوالرٹ جاری کردیا ، جس میں کہا ہے کہ آج سے5اپریل تک کراچی سمیت سندھ بھرمیں شدیدگرمی ہوگی ، شہر میں سمندری ہوائیں بند ہیں اور شمال مغرب کی گرم اورخشک ہوائیں چل رہی ہیں۔

    محکمہ موسمیات کا کہنا ہے کہ ہیٹ ویوکی وجہ سے ہفتہ تک درجہ حرارت میں 4 سے 6 ڈگری اضافہ متوقع ہے ، مارچ میں اوسطاًدرجہ حرارت32.5ڈگری ریکارڈ کیاجاتاہے تاہم رواں سال درجہ حرارت 40 ڈگری سینٹی گریڈ سے تجاوز کرسکتا ہے۔

    ڈائریکٹرجنرل محکمہ موسمیات کے مطابق کراچی میں گرم اور گرد آلود ہوائیں چلنے کا امکان ہے، شہریوں کو احتیاطی تدابیراختیار کریں اور دوپہر12سےشام4بجےتک دھوپ میں نہ نکلیں۔

    محکمہ موسمیات کا کہنا تھا کہ ملک میں بیشتر میدانی علاقے شدید گرمی کی لہر کے زیر اثر رہیں گے اور آج سے ہفتے کے دن تک سندھ کے میدانی علاقوں میں شدید گرمی جبکہ سندھ اور بلوچستان میں گرد آلود ہوائیں چلنے کا امکان ہے۔

    دوسری جانب ملک بھر میں آج موسم عمومی طور پر خشک اور گرم رہے گا ، حیدر آباد، ملتان سبی اور دیگر شہروں میں موسم سخت گرم جبکہ لاہور اسلام آباد،پشاور اور کوئٹہ میں بھی موسم گرم رہے گا، گرمی کی لہر ایک ہفتے جاری رہنے کا امکان ہے۔

    خیال رہے صوبہ سندھ میں ہیٹ ویو کے خدشے کے پیش نظر ڈیزاسٹر منیجمنٹ اتھارٹی نے سندھ بھر کے ڈپٹی کمشنرز اور چیئرمین ڈسٹرکٹ ڈیزاسٹر منیجمنٹ کو مراسلہ جاری کر دیا ہے۔

    مراسلے میں خبردار کیا گیا ہے کہ محکمہ موسمیات نے ملک کے دیگر حصوں کی طرح سندھ میں بھی ہیٹ ویو کی پیش گوئی کر دی ہے، محکمہ موسمیات کے مطابق ہیٹ ویو کے خدشات منگل سے ہفتے تک رہیں گے۔

  • موسم گرم، سندھ میں اہم پیش گوئی

    موسم گرم، سندھ میں اہم پیش گوئی

    کراچی: محکمہ موسمیات نے سندھ میں ہیٹ ویو کی پیش گوئی کر دی۔

    تفصیلات کے مطابق صوبہ سندھ میں ہیٹ ویو کے خدشے کے پیش نظر ڈیزاسٹر منیجمنٹ اتھارٹی نے سندھ بھر کے ڈپٹی کمشنرز اور چیئرمین ڈسٹرکٹ ڈیزاسٹر منیجمنٹ کو مراسلہ جاری کر دیا ہے۔

    مراسلے میں خبردار کیا گیا ہے کہ محکمہ موسمیات نے ملک کے دیگر حصوں کی طرح سندھ میں بھی ہیٹ ویو کی پیش گوئی کر دی ہے، محکمہ موسمیات کے مطابق ہیٹ ویو کے خدشات منگل سے ہفتے تک رہیں گے۔

    پی ڈی ایم اے نے ہدایت کی ہے کہ انسانی جانوں کو محفوظ رکھنے کے لیے تمام ضروری احتیاطی اقدامات اٹھائے جائیں، سڑکوں پر پانی کی سبیلیں، اور ہیٹ ویو کے حوالے سے کیمپ لگائے جائیں۔

    واضح رہے کہ محکمہ موسمیات نے آج ملک میں رواں ہفتے کے دوران گرمی کی پہلی لہر کی پیش گوئی کر دی ہے، اس دوران ملک کے بیش تر علاقوں میں موسم گرم اور خشک رہے گا۔

    محکمہ موسمیات کے مطابق زیادہ میدانی علاقے شدیدگرمی کی لہر کے زیر اثر رہیں گے، منگل سے ہفتے کے دوران سندھ کے میدانی علاقے گرمی کی لپیٹ میں رہیں گے، جب کہ سندھ اور بلوچستان میں گرد آلود ہوائیں چلنے کا بھی امکان۔

    میدانی علاقوں میں درجہ حرارت 4 سے 6 ڈگری سے زیادہ رہنے کی توقع ظاہر کی گئی ہے۔

  • کراچی میں آج گرمی اپنا زور دکھائے گی

    کراچی میں آج گرمی اپنا زور دکھائے گی

    کراچی: شہرقائد میں آج سورج آگ برسائے گا، پارہ 40ڈگری تک بڑھنے کا امکان ہے۔

    تفصیلات کے مطابق محکمہ موسمیات نے امکان ظاہر کیا ہے کہ کراچی میں موسم شدید گرم رہے گا، گرمی کی لہربحیرہ عرب میں ہوا کے کم دباؤ کے سبب پیدا ہوگی، البتہ موجودہ صورت حال کی وجہ سے ہیٹ ویو کا امکان نہیں ہے۔

    محکمہ موسمیات کا کہنا ہے کہ بدھ تک درجہ حرارت دوبارہ معمول پر آجائے گا، ہوائیں 10کلومیٹرفی گھنٹہ کی رفتار سے چل رہی ہیں، ہوا میں نمی کا تناسب74فیصد ریکارڈ کیا گیا ہے۔ آئندہ دودنوں میں ہوائیں کم چلنے کا امکان ہے۔

    خیال رہے کہ حالیہ دنوں شہرقائد میں ہلکی بارش اور بونداباندی سے موسم خوشگوار ہوگیا تھا۔

    کراچی میں ہفتے اور اتوار کو تیزہواؤں کےساتھ بونداباندی کی پیش گوئی

    دوسری جانب صوبہ پنجاب کے شہر ملتان اور گردونواح میں گرمی کی شدت میں اضافہ ہوگیا ہے ، کم سے کم درجہ حرات 33ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت44ڈگری سینٹی گریڈتک جانے کا امکان ہے۔

    شہر میں آئندہ 24گھنٹے کے دوران موسم خشک اور گرم رہے گا۔

  • کراچی میں شدید گرمی کی لہر، پارہ 40ڈگری کو چھو گیا

    کراچی میں شدید گرمی کی لہر، پارہ 40ڈگری کو چھو گیا

    کراچی : شہر قائد میں سورج کاپارہ 40ڈگری کو چھوگیا ، محکمہ موسمیات کا کہنا ہے کہ ہیٹ ویو مزید2 روز تک رہے گی، اس دوران پارہ41ڈگری تک جا سکتا ہے۔

    تفصیلات کے مطابق کراچی میں ہیٹ ویو کا دوسرا روز ہے ، محکمہ موسمیات نے اس ہیٹ ویو کو درمیانے درجہ کا قرار دیا ہے، صبح دس بجے پارہ 32 ڈگری تک جا پہنچا تھا اور دوپہربارہ بجے 36 ڈگری ریکارڈ کیا گیا جبکہ ایک بجے کے بعد گرمی میں مزید اضافہ ہوا پارہ 40 ڈگری کو چھوگیا۔

    چیف میٹ سردار سرفراز کا کہنا ہے کہ شہر میں سمندری ہوائیں مکمل طور پر بند ہے اور شمال مشرق کی سمت سے ہوا10 کلومیٹر کی رفتار سے چل رہی ہیں۔

    محکمہ موسمیات کے مطابق یہ ہیٹ ویو مزید2 روز تک رہے گی اور اس دوران درجہ حرارت ڈگری تک جاسکتا ہے۔

    خیال رہے محکمہ موسمیات نے 15 مئی کو ایک اور ہیٹ ویو کی پیشگوئی کرتے ہوئے کہا ہے کہ بارہ سے چودہ مئی کے دوران مٖغربی ہوائوں کا سسٹم داخل ہونے کا امکان ہے، جس کے باعث سندھ ، پنجاب اور خیبر پختونخوا میں بارش متوقع ہے

    دوسری جانب آج ملک کےبیشترحصوں میں موسم خشک رہےگا، محکمہ موسمیات کےمطابق پشاورمیں موسم ابر آلود، جبکہ سوات مالاکنڈ اور دیگر علاقوں سمیت اسلام آباد، گوجر خان، کھاریاں میں بارش کا امکان ہے جبکہ گلگت بلتستان میں آندھی او گرج چمک کے ساتھ بارش ہوسکتی ہے۔

    رات گئے ضلع اوکاڑہ،حافظ آباد،دیامرمیں بارش ہوئی جبکہ بونیر میں بجلی گرنے سے تین خواتین زخمی ہو گئیں۔

  • کراچی میں ریگستان کی گرم ہوائیں چلنے لگیں

    کراچی میں ریگستان کی گرم ہوائیں چلنے لگیں

    کراچی : چیف میٹرولوجسٹ نے کراچی میں ہیٹ ویو کے خطرے کی گھنٹی بجا دی اور تین سے چار روز تک شدید گرمی کی پیش گوئی کرتے ہوئے کہا شہر میں سمندری ہوائیں بند ہوگئیں ہیں اور ریگستان کی گرم ہوائیں چلنے لگیں، درجہ حرارت چالیس سے اکتالیس ڈگری سینٹی گریڈ تک جانے کا امکان ہے۔

    تفصیلات کے مطابق کراچی میں ہیٹ ویو کا خطرہ منڈلانے لگا، محکمہ موسمیات نے شدید گرمی کے اسپیل سے شہریوں کو خبردار کردیا ہے، چیف میٹرو لوجسٹ سردارسرفراز نے کہا سمندری ہوائیں چلنے سے کراچی کا موسم معتدل رہتا ہے، بھارتی گجرات اور ممبئی کے جنوب میں ایک لو پریشر ایریا بنا ہے، ہوا کے کم دباؤ کی وجہ سے کراچی کے ماحول پر دباؤ بڑھ جائے گا۔

    چیف میٹرولوجسٹ کا کہنا تھا کہ کراچی میں سمندری ہوائیں بند ہوچکی ہیں، ہواؤں کا رخ تبدیل ہو کر شمال مغرب کی طرف ہوگیا ہے اور ریگستان کی گرم ہوا چل رہی ہے۔

    سردارسرفراز نے مزید کہا کہ کراچی میں 3سے 4 روز موسم گرم رہے گا، سمندری ہوائیں بھی بند رہیں گی ، صبح 11 سے شام 4 بچے تک شدید گرمی پڑے گی، درجہ حرارت 40 سے 41 تک جانے کا امکان ہے ، ہیٹ ویو کے دوران پانی کا استعمال زیادہ کیا جائے۔

    محکمہ موسمیات کا کہنا ہے کہ آج بھی موسم گرم اور مرطوب رہے گا، زیادہ سے زیادہ درجہ حرارت 37 ڈگری تک پہنچ سکتا ہے۔

    شہر کا موجودہ درجہ حرارت 37 سینٹی گریڈ ہے اور ہوا میں نمی کا تناسب 43 فیصد ہے ، حبس بڑھنے سے گرمی کی شدت زیادہ محسوس ہوگی جبکہ ہوا 23 کلومیٹر فی گھنٹہ کی رفتار سے چل رہی ہے۔

    سندھ حکومت نےہیٹ ویوسے متعلق الرٹ جاری کردیا ہے اور ڈویژنل کمشنرز اور ذمہ داران کو ہیٹ ویو سے بچاؤ کیلئے تحریری ہدایت بھی جاری کی گئی ہے۔

    جس میں کہا گیا ہے شہر میں شروع ہونیوالی ممکنہ ہیٹ ویو 21سے24ستمبر تک رہنے کا امکان ہے، الرٹ کے دوران تمام سرکاری اسپتالوں میں 24گھنٹے ایمرجنسی اور صحت کی سہولیات میسر ہوگی، تمام پیرا میڈیکل اسٹاف کی چھٹیاں بھی منسوخ کردی گئی ہے۔

    الرٹ کے دوران ہیٹ اسٹروک کے کیسز سے بچنے کیلئے جنریٹرز برف ایئر کنڈیشن اور پانی کی سپلائی کو موثر بنانے کا حکم دیا جبکہ تمام آفیسرز کو 4 بجے تک اپنی رپورٹ ہائی اتھارٹیز کو بھیجنے کی ہدایت کردی ہے۔

    کراچی میں گرمی کی شدت کے پیش نظر بلدیہ کراچی نے عباسی شہید اسپتال میں مرکزی ہیٹ اسٹروک سینٹر بھی قائم کردیا ہے۔

    دوسری جانب کوئٹہ سمیت صوبےکےبیشترعلاقوں میں موسم خشک اورگرم رہنے کا امکان ہے اور درجہ حرارت 35ڈگری تک جاسکتا ہے جبکہ حیدرآباد اورگردونواح میں آج موسم گرم اورخشک رہے گا، زیادہ سے زیادہ درجہ حرارت 41 ڈگری سینٹی گریڈ متوقع ہے۔

  • کراچی میں آج شدید گرمی پڑنے کا امکان

    کراچی میں آج شدید گرمی پڑنے کا امکان

    کراچی: محکمہ موسمیات نے کراچی میں آج شدید گرمی پڑنے کی پیش گوئی کی ہے، درجہ حرارت چھتیس ڈگری سینٹی گریڈ تک جاسکتا ہے مگر گرمی 40 سے زائد والی محسوس ہوگی، شام کے وقت موسم میں بہتری کا امکان ہے۔

    تفصیلات کے مطابق کراچی گرمی اورحبس کی لپیٹ میں ہے، محکمہ موسمیات کا کہنا ہے کہ بحیرہ عرب میں ہوا کا کم دباؤ تاحال موجود ہے جس کے سبب کراچی میں آج بھی سمندری ہوائیں معطل ہیں۔

    کراچی کا آج درجہ حرارت چھتیس ڈگری سینٹی گریڈ تک جانے کا امکان ہے تاہم درجہ حرارت چالیس سے زائد محسوس ہوگا اور ہوا ميں نمی کا تناسب پینسٹھ فيصد رہے گا۔

    شہر کا موجودہ درجہ حرارت 32 ڈگری سینٹی گریڈ اور ہوا میں نمی کاتناسب 68 فیصد ہے جبکہ ہوا کی رفتار 13 کلومیٹر فی گھنٹہ ہے۔

    محکمہ موسمیات کے مطابق شام کے وقت موسم میں بہتری کاامکان ہے تاہم کراچی میں مزید مون سون اسپیل آنے کا کوئی امکان نہیں۔

    دوسری جانب محکمہ موسمیات کا کہنا ہے کہ ملک کے بیشترعلاقوں میں موسم گرم اور مرطوب رہے گا جبکہ گلگت بلتستان میں بارش کا امکان ہے اور آئندہ چوبیس گھنٹوں میں لاہور، اسلام آباد، پشاور سمیت ملک کے بیشتر علاقوں میں موسم گرم اور مرطوب رہنے کی پیشگوئی کی ہے۔

  • یورپ میں شدید گرمی، 500 سالہ ریکارڈ ٹوٹ گیا، ریڈ الرٹ جاری

    یورپ میں شدید گرمی، 500 سالہ ریکارڈ ٹوٹ گیا، ریڈ الرٹ جاری

    برسلز : یورپ میں گرمی کا 500 سالہ ریکارڈ ٹوٹ گیا جبکہ جرمنی، فرانس، بیلجیم اور ہالینڈ سمیت کئی مغربی یورپی ممالک میں بھی گرمی نے کئی ریکارڈ توڑ دیے ، جس کے بعد ریڈالرٹ جاری کردیا گیا ہے۔

    تفصیلات کے مطابق یورپ اور برطانیہ میں ہیٹ ویو کے باعث گرمی کی شدت برقرار ہے، یورپ میں رواں صدی میں گرمی کا 500 سالہ ریکارڈ ٹوٹ گیا، لندن میں ہیٹ ویو الرٹ جاری ہے، برطانیہ میں پارہ چالیس ڈگری تک پہنچنے کا امکان ہے۔

    فرانس کے دارالحکومت پیرس میں گرمی کا ستر برس پرانا ریکارڈ ٹوٹ گیا، ہائی الرٹ جاری کردیا گیا ہے، پیرس میں گرم ترین دن رہا ، جب درجہ حرارت بیالیس ڈگری سینٹی گریڈ سے تجاوز کرگیا ،گرمی کا توڑ کرنے کیلئے لوگوں نے ساحلی مقامات کا رخ کرلیا۔

    بیلجئیم میں پارہ پچپن ڈگری تک پہنچ گیا، شدید گرمی کے باعث ٹریفک کے علاوہ نظام زندگی بھی بری طرح سے متاثر ہوا جبکہ اٹلی میں سورج آگ برسانے لگا سورج کا پارہ بیالیس سینٹی گریڈ تک چھو گیا، گرمی کی شدید لہرسےشہری بلبلااٹھے ۔

    اس کے علاوہ نیدرلینڈز میں بھی شدید گرمی کا راج ہے اور وہاں درجہ حرارت 41 اعشاریہ 7 ڈگری سینٹی گریڈ تک پہنچ گیا۔

    محکم موسمیات نے گرمی کی شدت کے پیش نظر تاریخ کا پہلا ریڈ الرٹ جاری کردیا ہے۔

    اس کے علاوہ نیدرلینڈز میں بھی شدید گرمی کا راج ہے اور وہاں درجہ حرارت 41 اعشاریہ 7 ڈگری سینٹی گریڈ تک پہنچ گیا۔

  • کراچی: غیر اعلانیہ لوڈ شیڈنگ کا سلسلہ جاری، شہری گرمی اور پانی کی قلت سے بے حال

    کراچی: غیر اعلانیہ لوڈ شیڈنگ کا سلسلہ جاری، شہری گرمی اور پانی کی قلت سے بے حال

    کراچی: شہرِ قائد میں کے الیکٹرک کی جانب سے غیر اعلانیہ لوڈ شیڈنگ کا بد ترین سلسلہ آج بھی جاری رہا، شہری شدید گرمی اور پانی کی قلت سے بے حال رہے۔

    تفصیلات کے مطابق کراچی میں مختلف علاقوں میں کئی کئی گھنٹے غیر اعلانیہ لوڈ شیڈنگ ہو رہی ہے، لوڈ شیڈنگ کا یہ سلسلہ گرمی میں اضافے کے ساتھ ہی شروع ہوا۔

    اے آر وائی نیوز کے نمائندے کے مطابق لیاری، میراں ناکہ، چاکیواڑہ، بہار کالونی میں 6 گھنٹے سے بجلی غائب ہے۔

    اورنگی ٹاؤن، قصبہ کالونی، پہاڑ گنج میں غیر اعلانیہ لوڈ شیڈنگ ہو رہی ہے، نارتھ ناظم آباد، حسرت موہانی سوسائٹی، گلستان جوہر میں بھی لوڈ شیڈنگ کا سلسلہ بدستور جاری ہے۔

    گلشن اقبال، عائشہ منزل، صفورہ گوٹھ میں بھی بجلی کی آنکھ مچولی نے علاقہ مکینوں کو بے حال کر دیا ہے، کاٹھور، احسن آباد، گڈاپ، اسکیم 33 اور ابوالحسن اصفحانی روڈ پر بھی لوڈ شیڈنگ جاری ہے۔

    یہ بھی پڑھیں:  کے الیکٹرک کا کم گیس پریشر کا دعویٰ غلط ہے: وزیر توانائی

    ادھر شہر میں مسلسل غیر اعلانیہ لوڈ شیڈنگ کے باعث واٹر بورڈ تنصیبات بھی متاثر ہوئی ہیں جس کی وجہ سے شہریوں کو پانی کی قلت کا بھی سامنا ہے۔

    خیال رہے کہ گزشتہ روز کے الیکٹرک کے ترجمان نے کراچی میں غیر اعلانیہ لوڈ شیڈنگ پر جاری بیان میں دعویٰ کیا تھا کہ ایس ایس جی سی کی جانب سے گیس پریشر میں کمی سے کچھ پلانٹس کی پیداوار متاثر ہوئی ہے، جس کی وجہ سے کچھ جگہوں پر جزوی طور پر لوڈ مینجمنٹ ہو رہی ہے۔

    تاہم ایس ایس جی سی اور وفاقی وزیر توانائی نے کے الیکٹرک کا دعویٰ مسترد کرتے ہوئے تصدیق کی ہے کہ کے ای کو طلب سے زیادہ گیس فراہم کی جا رہی ہے۔

    دریں اثنا، وزیر بلدیات سعید غنی اور ایم ڈی واٹر بورڈ انجینئر اسد اللہ خان نے شدید گرم موسم میں شہر بھر میں ٹھنڈے پانی کے کیمپ قائم کر دیے گئے ہیں، ان کیمپوں پر شہریوں کو ٹھنڈا پانی اور شربت پلایا جا رہا ہے۔

    یہ کیمپ نارتھ ناظم آباد، لانڈھی، نیپا، صفورا، منگھوپیر، بنارس سمیت 16 مقامات پر لگائے گئے ہیں، ایم ڈی واٹر بورڈ نے ہائیڈرنٹس اور ٹینکرز سیل کو مزید کیمپ قائم کرنے کی ہدایت کر دی ہے۔

  • شدید گرمی: رحیم یار خان، دادو میں درجہ حرارت 49 ڈگری سینٹی گریڈ تک پہنچ گیا

    شدید گرمی: رحیم یار خان، دادو میں درجہ حرارت 49 ڈگری سینٹی گریڈ تک پہنچ گیا

    لاہور: ملک کے مختلف شہروں میں شدید گرمی نے شہریوں کو لپیٹ میں لے لیا ہے، رحیم یار خان اور سندھ کے شہر دادو میں پارہ 49 ڈگری سینٹی گریڈ تک پہنچ گیا، دوسری طرف پنجاب میں ہیٹ ویو الرٹ جاری کر دیا گیا۔

    تفصیلات کے مطابق شدید گرمی نے ملک کے مختلف شہروں کو لپیٹ میں لے لیا ہے، رحیم یار خان اور دادو میں پارہ 49 ڈگری سینٹی گریڈ تک پہنچ گیا، بہاول نگر میں 47، بہاول پور میں درجہ حرارت 46 ڈگری سینٹی گریڈ ہو گیا ہے۔

    محکمہ موسمیات کے مطابق بنوں میں موجودہ درجہ حرارت 44 ڈگری سینٹی گریڈ ریکارڈ کیا گیا، ڈی جی خان 47، ڈی آئی خان میں درجہ حرارت 44 ڈگری سینٹی گریڈ، فیصل آباد 45، گوجرانوالہ میں 43 ڈگری، اسلام آباد میں پارہ 40، جہلم میں موجودہ درجہ حرارت 43 ڈگری سینٹی گریڈ تک پہنچ گیا۔

    صادق آباد میں بھی شدید گرمی پڑنے لگی ہے، سورج آگ برسانے لگا ہے، صادق آباد میں درجہ حرارت 47 ڈگری سینٹی گریڈ تک پہنچ گیا، دھوپ کی شدت کی وجہ سے سڑکوں پر آمد و رفت کم ہو گئی۔

    نواب شاہ، لاڑکانہ، خانیوال، خان پور میں درجہ حرارت 46 ڈگری سینٹی گریڈ، جب کہ ملتان پارہ 45 ڈگری سینٹی گریڈ کو چھونے لگا ہے۔

    دریں اثنا، گرمی کی بڑھتی شدت کے باعث محکمہ صحت پنجاب نے ہیٹ ویو الرٹ جاری کر دیا ہے، ڈی جی ہیلتھ نے پیغام جاری کرتے ہوئے کہا کہ گرمی سے بچے اور بزرگ افراد ہیٹ اسٹروک کا شکار ہو سکتے ہیں، سردرد، چکر، بلڈ پریشر اور غنودگی ہیٹ اسٹروک کی علامات ہو سکتی ہیں۔

    ڈی جی ہیلتھ نے ہدایت کی ہے کہ دھوپ کے اوقات میں غیر ضروری باہر نکلنے سے گریز کیا جائے، دھوپ میں نکلنا ضروری ہو تو سر کپڑے سے ڈھانپ کر رکھیں، اور سکنجبین کا استعمال زیادہ کریں، یہ جسم میں نمکیات اور پانی کی کمی پوری کرتا ہے۔

    خیال رہے کہ ملک کے بیش تر علاقوں میں آج بھی شدید گرمی کی لہر برقرار ہے جب کہ محکمہ موسمیات نے امکان ظاہر کیا ہے کہ آئندہ 24 گھنٹوں کے دوران بھی موسم گرم اور خشک رہے گا۔

    ادھر خیبر پختون خوا اور سندھ کے بھی کئی شہر شدید گرمی کی لپیٹ میں ہیں، محکمہ موسمیات نے کل سے کراچی میں ہوا میں نمی کا تناسب بڑھنے کی پیش گوئی کی ہے جس سے گرمی کی شدت میں مزید اضافے کا امکان ہے۔

  • کراچی سمیت سندھ کے بیشتر علاقے آج شدید گرمی کی لپیٹ میں رہیں گے

    کراچی سمیت سندھ کے بیشتر علاقے آج شدید گرمی کی لپیٹ میں رہیں گے

    کراچی : آج ملک کے بیشتر علاقوں میں موسم گرم اور خشک رہے گا تاہم بالائی علاقوں میں گرج چمک کے ساتھ بارش ہونے کا امکان ہے۔

    تفصیلات کے مطابق ملک کے بیشتر علاقوں میں آج موسم گرم اور خشک رہے گا کراچی سمیت سندھ کے بیشتر علاقے شدید گرمی کی لپیٹ میں رہیں گے جبکہ بلوچستان اور پنجاب میں گرم اور خشک ہوائیں چلنے کی توقع ہے۔

    اس کے علاوہ مالاکنڈ، ہزارہ، پشاور، کوہاٹ، بنوں اور کشمیر میں چند مقامات پرآندھی چلنے اور گرج چمک کے ساتھ بارش کی پیشگوئی ہے۔

    گزشتہ روز سب سے زیادہ درجہ حرارت جیکب آباد اور لاڑکانہ میں پچاس ڈگری سینٹی گریڈ ریکارڈ کیا گیا۔ قبل ازیں جمعرات کو زیادہ سے زیادہ درجہ حرارت 38 ڈگری سینٹی گریڈ ریکارڈ ہوا جبکہ صبح کم سے کم درجہ حرارت 28اور ہوا میں نمی کا تناسب 78فیصد تھا۔