کراچی (15 جولائی 2025) سندھ کے وزیر اطلاعات شرجیل میمن نے کہا ہے کہ اگر بانی پی ٹی آئی کے بچے پاکستان میں سیاست کرنا چاہتے ہیں تو ضرور کریں۔

اے آر وائی نیوز کے مطابق سندھ کے وزیر اطلاعات شرجیل انعام میمن نے کراچی میں میڈیا سے گفتگو کرتے ہوئے بانی پی ٹی آئی عمران خان کے بچوں کی پاکستان آمد سے متعلق کہا کہ ایک باپ کو اپنے بچوں سے ملنے کا پورا اختیار ہے۔ اگر ان کے بچے پاکستان آ کر سیاست کرنا چاہتے ہیں تو ضرور کریں۔ تاہم نفرت اور جلاؤ گھیراؤ کی سیاست کرنے کی اجازت نہیں مل سکتی۔

شرجیل میمن کا یہ بھی کہنا تھا کہ کے پی حکومت کے پاس جتنا مینڈیٹ ہے، انہیں کام کرنے دینا چاہیے۔ وہاں کے وزیراعلیٰ علی امین گنڈاپور خود اور ان کی طرز حکمرانی ان کے لیے اپوزیشن ہے۔ کے پی حکومت کے پاس بیچنے کو منجن نہیں ہے۔

سندھ کے وزیر اطلاعات کا کہنا تھا کہ ہمیں اپنے صوبے سمیت پورے پاکستان میں صنعتیں لگانی ہیں۔ ٹیکنالوجی کا دور ہے، نوجوانوں کو سہولتیں فراہم کرنا ہوں گی۔

سندھ حکومت سالڈ ویسٹ منیجمنٹ کو ماہانہ اربوں روپے دے کر کچرا اٹھوا رہی ہے۔ کراچی میں کچروں کے پہاڑوں کو ختم کیا ہے۔

انہوں نے ایم کیو ایم اور جماعت اسلامی پر تنقید کرتے ہوئے کہا کہ اگر دونوں جماعتیں عوامی مسائل پر بات کریں تو ہم سنیں گے اور حل بھی کریں گے، لیکن نفرت انگیز اور تعصب کی بات کریں گے تو ان کی یہ سازش کامیاب نہیں ہونے دیں گے۔

شرجیل میمن کا کہنا تھا کہ جن کی کارکردگی صفر بٹا صفر ہے، وہ اپنی سیاسی چمکانے کے لیے نمبر پلیٹ پر سیاست کر رہے ہیں۔ جعلی نمبر پلیٹس پر حکومت کریک ڈاؤن کر رہی ہے تو انہیں کیوں اعتراض ہے۔

صوبائی وزیر بلدیات نے رواں ماہ لیاری بغدادی میں گرنے والی 6 منزلہ عمارت جس میں 27 افراد جان سے گئے تھے۔ اس سے متعلق گفتگو کرتے ہوئے کہا کہ انکوائری میں پتہ چلا منہدم عمارت کا نقشہ ہی موجود نہ تھا۔

انہوں نے بتایا کہ لیاری میں جو عمارت گری اس کا نقشہ منظور نہیں تھا, وہ غیر قانونی عمارت تھی جو 80 کی دہائی میں بنی تھی۔

صوبائی وزیر اطلاعات نے مزید کہا کہ بلڈنگ قوانین موجود ہیں۔ سندھ بلڈنگ کنٹرول اتھارٹی کے اگر کوئی انتظامی فیصلہ کیا ہے تو سوچ سمجھ کر ہی کیا ہوگا۔

سندھ کے وزیر اطلاعات شرجیل میمن کا کہنا ہے کہ کراچی پریس کلب ریڈ زون میں آتا ہے اور ہم چاہتے ہیں کہ اس کو کسی اور جگہ منتقل کر دیں۔

اے آر وائی نیوز کے مطابق سندھ کے وزیر اطلاعات وٹرانسپورٹ شرجیل انعام میمن نے کراچی میں پریس کانفرنس کرتے ہوئے کراچی پریس کلب کی منتقلی کا عندیہ دیا ہے۔

شرجیل میمن نے کہا ہے کہ کراچی پریس کلب ریڈ زون میں آتا ہے اور پریس کلب پر روز کوئی نہ کوئی احتجاج ہو رہا ہوتا ہے۔ اس لیے ہم چاہتے ہیں کہ پریس کلب کو کسی اور جگہ منتقل کر دیں۔ اس حوالے سے ہم نے پریس کلب والوں سے میٹنگ بھی کی کہ کوئی اور جگہ دے سکتے ہیں۔

صوبائی وزیر کا کہنا تھا کہ احتجاج کرنا سب کا حق ہے بشرط یہ کہ وہ پر امن ہو۔ کیونکہ ہم نے کبھی نہیں چاہا کہ عام لوگوں کو تکلیف ہو۔

انہوں نے اپنی پریس کانفرنس میں جماعت اسلامی، ایم کیو ایم اور ایک سابق وفاقی وزیر کو تنقید کا نشانہ بھی بنایا اور احتجاج کرنے والوں کو متنبہ کیا کہ میں بڑے پیار سے کہہ رہا ہوں کہ حکومت کو ڈکٹیٹ نہیں کر سکتے۔ کوئی جتھہ کہے کہ ہم مظاہرہ کریں گے اور ریڈ زون میں گھسیں گے تو ایسا نہیں ہو سکتا۔

کراچی : سندھ کے وزیر اطلاعات شرجیل میمن نے کراچی والوں سے سوال کیا بجلی کی لوڈشیڈنگ پر احتجاج سے سڑک بند کرنے سے کیا بجلی بحال ہوجائے گی؟

تفصیلات کے مطابق سندھ کے وزیر اطلاعات شرجیل میمن نے بیان میں کہا کہ سندھ میں سیلاب متاثرین کے ابتک ساڑھے 8 لاکھ گھر بنا چکے ، سندھ حکومت کی جانب سے 21 لاکھ گھر بنائےجارہے ہیں۔

صوبائی وزیر کا کہنا تھا کہ دو ہفتے کے بعد شاہراہ بھٹو قائدآباد تک مکمل ہوجائےگی، حساس ہے کہ یونیورسٹی روڈ کھدا ہوا ہے ،لوگوں کو تکلیف ہے لیکن کچھ اداروں کے مسائل کی وجہ سے کام میں کچھ تاخیر آرہی ہے۔

شرجیل میمن نے کہا کہ سندھ میں سب سے کم لوڈشیڈنگ کراچی میں ہے، سیاست اور پرامن احتجاج کا حق سب کو ہے ، گراؤنڈ اور پارکس میں احتجاج کرنا ہے کرلیں ،سڑک بند کرنے کی اجازت نہیں۔

انھوں نے سوال کیا کہ بجلی کی لوڈشیڈنگ پر احتجاج سے سڑک بند کرنے سے کیا بجلی بحال ہوجائے گی۔

انھوں نے بتایا کہ صوبے سے باہر کی ہیوی گاڑیوں کی رجسٹریشن لازمی کردی ہے گاڑیوں کےلئے فٹنس سینٹر کو لانچ کردیا ہے، محکمہ ٹرانسپورٹ ہیوی گاڑیوں کی فٹنس چیک کررہا ہے۔

صوبائی وزیر کا مزید کہنا تھا کہ کوشش ہے ہیوی ٹریفک رات 10 بجے سےصبح 11بجےتک لیاری ایکسپریس وے پر لیکر جائیں۔

صوبائی وزیر اطلاعات شرجیل میمن نے ایم کیو ایم پر نفرت کی سیاست کرنے کا الزام عائد کرتے ہوئے الیکشن لڑنے کا چیلنج دے دیا ہے۔

اے آر وائی نیوز کے مطابق صوبائی وزیر اطلاعات شرجیل انعام میمن نے کراچی میں پریس کانفرنس کرتے ہوئے ایم کیو ایم پاکستان پر نفرت کی سیاست کرنے کا الزام عائد کرتے ہوئے کہا کہ اگر وہ اپنی مردہ سیاست جگانے کیلیے نفرت کی سیاست کرینگے تو اجازت نہیں دینگے۔

سندھ کے وزیر اطلاعات نے ایم کیو ایم کو الیکشن لڑنے کا چیلنج دیتے ہوئے کہا کہ ان کے پاس مینڈیٹ ہے تو میں ابھی استعفیٰ دیتا ہوں اور وہ بھی دیں۔ دوبارہ الیکشن کرا لیتے ہیں، پتہ چل جائے گا کہ کس کے پاس مینڈیٹ ہے۔ ہر الیکشن میں پی پی کو پہلے سے زیادہ سیٹیں اور ووٹ ملے ہیں۔

ان کا کہنا تھا کہ ایم کیو ایم خود ہی شکست کے خوف سے بلدیاتی انتخابات سے بھاگی تھی۔ وہ اب دوبارہ الیکشن لڑ لے، عوام کی سپورٹ ایم کیو ایم کے ساتھ ہے تو عوام فیصلہ کرینگے۔

شرجیل میمن کا کہنا تھا کہ ایم کیو ایم کی جانب سے چند دنوں سے سندھ حکومت کیخلاف مہم شروع کی گئی ہے اور ڈمپرز حادثات کو جواز بنا کر نفرت انگیز بیانات دیے جا رہے ہیں۔ ایم کیو ایم نے الزام لگایا کہ کراچی کا امن خراب ہو رہا ہے جب کہ وہ خود ماضی میں بد امنی کی سب سے بڑی ذمہ دار تھی۔ اب پھر وہ بھائی کو بھائی سے لڑانے کی کوشش کر رہی ہے۔

ان کا کہنا تھا کہ اس ملک کی ترقی کا حب کراچی کو سمجھا جاتا ہے۔ ہم کسی صورت کراچی میں بدامنی نہیں ہونے دیں گے۔ ایم کیو ایم کے دوستوں سے گزارش ہے کہ آپ کو احتجاج کرنا ہے تو وہ آپ کا آئینی حق ہے، لیکن تنقید برائے تنقید کی سیاست نہ کریں۔اس وقت پاکستان کیخلاف بیرونی سازشیں ہو رہی ہیں اور ہم سب نے ہی مل کر ان سازشوں کا مقابلہ کرنا ہے۔

پریس کانفرنس میں سندھ کے وزیر اطلاعات میں صوبائی حکومت کی جانب سے کراچی اور صوبے بھر میں ہونے والے ترقیاتی کاموں کی تفصیلات بھی بتائیں اور چیلنج دیا کہ صحت کے حوالے سے جو پی پی نےکام کیے ہیں، اگر ایم کیو ایم سمیت کسی بھی سیاسی جماعت نے صحت کے لیے کوئی ایک کام کیا ہے تو بتائے۔

کراچی : وزیر اطلاعات سندھ شرجیل میمن کا کہنا ہے کہ مجھے نہیں معلوم بانی پی ٹی آئی کی جان کو خطرہ ہے یا نہیں، فیصل واوڈا اسلام آباد میں ہوتے ہیں انہیں زیادہ علم ہوگا۔

تفصیلات کے مطابق وزیر اطلاعات سندھ شرجیل میمن نے میڈیا سے گفتگو کرتے ہوئے کہا کہ بانی پی ٹی آئی ہر وہ کام کرے گا ، جس سے پاکستان کا نقصان ہو، بانی پی ٹی آئی کو کہیں سےنوٹس ملتے ہیں، کیا 126 دن کے دھرنے میں سول نافرمانی کا اعلان نہیں ہوا تھا؟

صوبائی وزیر کا کہنا تھا کہ پی ٹی آئی رہنماؤں کو کہیں سے اکسایا جاتا ہے، دھرنے میں کہا گیا پاکستانیوں منی لانڈرنگ اور حوالہ ہنڈی کرو، بانی پی ٹی آئی نے کہا تھا سول نافرمانی کرو بجلی کا بل نہ بھرو، بانی پی ٹی آئی نے ہر وہ کام بتایا، جس سے پاکستان کا نقصان ہو۔

انھوں نے کہا کہ پی ٹی وی اور ریڈیو پاکستان کو آگ لگائی گئی ، بسوں کو جلایا گیا، بانی پی ٹی آئی پاکستان کو ٹارگٹ کرنا اور ملک کو نقصان پہنچانا چاہتا ہے۔

بانی پی ٹی آئی کی جان کو خطرہ کے سوال پر وزیر اطلاعات سندھ کا کہنا تھا کہ مجھے نہیں معلوم بانی پی ٹی آئی کی جان کو خطرہ ہے یا نہیں، فیصل واوڈا اسلام آباد میں ہوتے ہیں انہیں زیادہ علم ہوگا، فیصل واوڈا نے کوئی بات کہی تو وہ بہت زیادہ علم رکھتے ہیں، وہ اچھی سیاست کر رہے جس سے چاہے مل سکتے۔