اسلام آباد: وزیراعظم میاں شہباز شریف نے کہا ہے کہ شرپسند ٹولے کے منتشر ہوتے ہی اسٹاک ایکسچینج ایک لاکھ پوائنٹس کراس کرگئی ہے۔
وزیراعظم شہبازشریف کی زیرصدارت امن و امان کی صورتحال سے متعلق جائزہ اجلاس ہوا، وزیراعظم کو گزشتہ دنوں شرپسندوں کی جانب سے سیکیورٹی اہلکاروں پر حملے پر بریفنگ دی گئی، وزیراعظم کا کہنا تھا کہ یہ کیسے انقلابی ہیں جو ملک کی تباہی، انتشار پھیلانے کی مذموم کوشش کررہے ہیں۔
شہباز شریف نے کہا کہ انتشاری ٹولے نے لشکرکشی کے دوران سیکیورٹی فورسز کے اہلکاروں کو زخمی اور شہید کیا، اسلام آباد پر لشکرکشی کرنے والے شرپسند ٹولے کیخلاف فوری قانونی چارہ جوئی کی جائے۔
انھوں نے کہا کہ انتشار پھیلانے کی مذموم کوششوں کے نتیجے میں ملک کو اربوں روپے کا نقصان ہوا، ملک کے معاشی نقصان کے ذمہ دار انتشاری ٹولہ اور اسکے کرتا دھرتا ہیں۔
وزیراعظم نے کہا کہ انتشاری ٹولے میں شرپسند عناصر کی فوری شناخت کرکے قرار واقعی سزا دلوائی جائے، جام شہادت نوش کرنے والے اہلکاروں کو مجھ سمیت پوری قوم خراج عقیدت پیش کرتی ہے، ذاتی مقاصد کیلئے لشکر کشی کرنے والوں کو روکنے کیلئے جامع حکمت عملی مرتب کریں۔
شہباز شریف نے کہا کہ حکومت نے نام نہاد پُرامن دھرنے کے مسلح افراد کو انتشار پھیلانے سے روکنے میں برداشت کا مظاہرہ کیا، آئندہ ایسی کسی بھی صورتحال سے نمٹنے کیلئے جامع لائحہ عمل مرتب کرکے پیش کیا جائے۔
انھوں نے کہا کہ عوام میں اشتعال، بےیقینی پھیلانے والے عناصر کو قانون کے کٹہرے میں لایا جائے، بلوائیوں سے نمٹنے کیلئے اسلام آباد اور ملک بھر میں اینٹی روائٹس فورس قائم کی جائے، فورس کو بین الاقوامی طرز پر پیشہ ورانہ تربیت اور ضروری سازوسامان سے لیس کیا جائے۔
وزیراعظم کا کہنا تھا کہ املاک کو نقصان پہنچانے والوں کے ساتھ مسلح افراد کی نشاندہی کرکے کارروائی کریں، استغاثہ کےنظام میں مزیدبہتری لائی جائے، وفاقی وزرا احدچیمہ، عطا تارڑ، مشیر وزیراعظم رانا ثنااللہ ،اٹارنی جنرل اور متعلقہ حکام نے اجلاس میں شرکت کی۔
