ملتان: پاکستان پیپلز پارٹی(پی پی پی) نے نشتر ون میں نیورو سرجری، آرتھو پیڈک شعبے بند کرنے کا فیصلہ مسترد کردیا۔
تفصیلات کے مطابق پنجاب اسمبلی میں پیپلز پارٹی کے پارلیمانی لیڈر علی حیدرگیلانی نے کہا ہے کہ پیپلز پارٹی کو جنوبی پنجاب کے عوام نے بھاری مینڈیٹ دیا، حکومت کے اتحادی ہیں مگر فاصلے موجود ہیں۔
علی حیدر گیلانی کا کہنا ہے کہ اس خطے کے باسیوں کے ساتھ ہونے والی زیادتیوں پر دکھ ہوتا ہے، پیپلز پارٹی کو جنوبی پنجاب کے عوام نے بھاری مینڈیٹ دیا ہے۔
انہوں نے کہا کہ نشتر ون نیورو سرجری اور آرتھو پیڈک کو بند کرنے کا نوٹیفکیشن سامنے آیا، ہم پنجاب حکومت کے اس نوٹیفکیشن کو مسترد کرتے ہیں۔
علی حیدر گیلانی کا کہنا تھا کہ آرتھو پیڈک اور نیورو سرجری کے شعبوں کو نشتر ٹو منتقل نہ کیا جائے، نشتر ٹو میں اسٹاف مکمل کیا جائے، نشتر ٹو میں تمام شعبے موجود ہونے چاہئیں،اس میں پی سی ون کے مطابق ایک ہزار بیڈز ہونے چاہئیں۔
علی حیدر گیلانی نے کہا کہ ہم حکومت کے اتحادی ہیں مگر فاصلے موجود ہیں، ہم نشتر ون اور نشتر ٹو کا مسئلہ پنجاب اسمبلی میں بھی اٹھائیں گے، ہم سے بجٹ میں مشاورت نہیں کی گئی، وزیر اعلیٰ پنجاب ملتان آئیں گی تو انہیں مسائل کا ادراک ہو گا۔
