میران شاہ: جنرل آفیسر کمانڈنگ میجر جنرل حسن اظہر حیات کا کہنا ہے کہ شمالی وزیرستان میں اب کوئی نو گو ایریا نہیں رہا۔ شمالی وزیرستان کا 80 فیصد علاقہ کلیئر ہو چکا۔ علاقے میں ترقیاتی عمل اور آئی ڈی پیز کی واپسی بھی جاری ہے۔
تفصیلات کے مطابق پاک فوج کی جانب سے میڈیا کو شمالی وزیرستان کا دورہ کروایا گیا۔ جی او سی میجر جنرل حسن اظہر حیات نے ترقیاتی کاموں اور امن کی بحالی کے حوالے سے میڈیا کو بریفنگ دی۔
ان کا کہنا تھا کہ اب شمالی وزیرستان میں کوئی نو گو ایریا نہیں۔ ضرب عضب میں 28 سو سے زائد دہشت گرد مارے گئے۔ 9 سو 72 زخمی جبکہ 17 سو 77 گرفتار ہوئے۔
مزید پڑھیں: گھروں کو واپس لوٹنے والی آئی ڈی پی خواتین نفسیاتی مسائل کا شکار
ان کے مطابق ڈیڑھ ہزار سے زائد دہشت گردوں نے ہتھیار ڈالے۔ آپریشن ضرب عضب کے دوران 7 سو 6 سیکیورٹی اہلکاروں نے جام شہادت نوش کیا۔ ان قربانیوں کی بدولت پاک فوج نے 80 فیصد علاقہ دہشت گردوں سے پاک کردیا۔
انہون نے کہا کہ امن کی بحالی کے ساتھ ہی علاقے میں آئی ڈی پیز کی واپسی شروع ہوگئی۔ 84 فیصد مکین ایجنسی واپس آچکے ہیں۔
انہوں نے بتایا کہ پاک فوج نے ایجنسی میں تعلیم اور صحت کی اسکیموں سمیت مارکیٹس بھی بنائی ہیں۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
