سیکیورٹی فورسز کی جانب سے شمالی وزیرستان میں 2 مختلف کارروائیاں کی گئیں جس میں 7 خارجی دہشت گرد ہلاک ہوگئے، ایک جوان نے جام شہادت نوش کیا۔

آئی ایس پی آر نے جاری بیان میں بتایا کہ سیکیورٹی فورسز نے شمالی وزیرستان میں کارروائیاں کیں، فورسز کی کارروائیوں میں 7 خارجی مارے گئے، فورسز نے میران شاہ میں انٹیلی جنس بیسڈ آپریشن کیا۔

فائرنگ کے تبادلے میں 4 خوارج ہلاک ہوئے،2 زخمی ہوئے، اسپین وام میں دوسرے آپریشن کے دوران 3 خوارج مارے گئے۔

آئی ایس پی آر نے بتایا کہ فائرنگ کے تبادلے میں لانس نائیک محمد امین بہاری سے لڑتے ہوئے شہید ہوئے، علاقے میں دیگر دہشت گردوں کی تلاش کے لئے کلیئرنس آپریشن ہورہا ہے۔

جاری بیان میں آئی ایس پی آر نے کہا کہ فورسز دہشت گردی کے عفریت کے خاتمے کے لئے پرعزم ہیں، جوانوں کی یہ قربانیاں ہمارے عزم کو مزید تقویت دیتی ہیں۔

شمالی وزیرستان : خیبرپختونخوا کے قبائلی ضلع شمالی وزیرستان میں پاک فوج نے بروقت ریسکیو آپریشن کرتے ہوئے قیمتی جانوں کو بچا لیا، بس حادثے میں ایک شخص جاں بحق اور 10مسافر زخمی ہوئے تھے۔

تفصیلات کے مطابق شمالی وزیرستان میں ٹریفک حادثہ پیش آیا، جہاں سیدگئی کے قریب مسافر کوچ کھائی میں گرگئی تھی، بس حاثے میں ایک شخص جاں بحق اور 10مسافر زخمی ہوئے۔

حادثے کے بعد پاک فوج نے فوراًریسکیو آپریشن کرتےہوئےزخمی مسافروں کوکھائی سے نکالا، پاک فوج نےطبی امداد دینے میں ریسکیو اداروں کی مددکی،زخمیوں کو اسپتال پہنچایا۔

اطلاع پر پاک فوج کا ریسکو اینڈپیرامیڈیکل اسٹاف جائے حادثہ کی طرف روانہ کیا گیا، پیرا میڈیکل اسٹاف نےزخمیوں کوابتدائی طبی امدادکےبعدڈی ایچ کیو اسپتال بنوں روانہ کیا۔

امدادی کارروائی میں پاک فوج کے ساتھ ریسکو 1122 کی ٹیم بھی موجود تھی، علاقے کے لوگوں نے بروقت ریسکیو آپریشن اورامدادپر پاک فوج کاشکریہ ادا کیا۔

میران شاہ : شمالی وزیرستان کی تحصیل میران شاہ میں بارودی مواد کے دھماکے میں دو بچوں سمیت پانچ افراد جاں بحق اور سولہ زخمی ہوگئے۔

تفصیلات کے مطابق شمالی وزیرستان کی تحصیل میران شاہ کے گاؤں تپی میں گھر کے باہر بارودی مواد کا دھماکہ ہوا، جس کے نتیجے میں پانچ افراد جاں بحق اور سولہ زخمی ہو گئے۔

جاں بحق افراد میں تین خواتین اور دو بچے شامل ہیں، لاشوں اور زخمیوں کو میرانشاہ اسپتال منتقل کیا گیا تاہم بعد میں اسپتال ایم ایس ڈاکٹر حمید اللہ نے بتایا کہ شدید زخمیوں کو بنوں کی ہسپتالوں میں منتقل کر دیا گیا ہے۔

ڈی پی او کا کہنا ہے کہ دھماکہ اتنا شدید تھا جس کی وجہ سے قریبی کئی مکانات منہدم ہوگئے ہیں، دھماکے کی تحقیقات کر رہے ہیں تاہم ابھی تک یہ واضح نہیں کہ دھماکے کی اصل وجوہات کیا ہیں۔

مقامی ذرائع کے مطابق اب بھی کئی افراد مکانات منہدم ہونے سے ملبے کے تلے دبے ہوئے ہیں جوکہ مقامی افراد اپنے مدد اپ کے تحت امدادی کارروائیوں میں مصروف ہیں۔

شمالی وزیرستان: رزمک بازار میں دھماکے کے نتیجے میں 4 افراد جاں بحق اور 10زخمی ہوگئے، پولیس کا کہنا ہے کہ بارودی موادموٹرسائیکل میں نصب تھا۔

تفصیلات کے مطابق شمالی وزیرستان کی تحصیل رزمک کے بازارمیں دھماکا ہوا ، جس کے نتیجے میں چارافراد جاں بحق اور دس زخمی ہوگئے۔

۔ ضلعی انتظامیہ نے بتایا کہ زخمی افراد کو اسپتال منتقل کردیا گیا تاہم پولیس حکام کا کہنا ہے کہ ابتدائی شواہدکے مطابق بارودی موادموٹرسائیکل میں نصب تھا۔

وزیراعلیٰ کےپی نے رزمک بازارمیں دھماکے کی مذمت کرتے ہوئے قیمتی انسانی جانوں کے ضیاع پر افسوس کا اظہار کیا۔

وزیر اعلیٰ کے پی کازخمیوں کی جلدصحتیابی کیلئےنیک خواہشات کا اظہار کرتے ہوئے کہا کہ سوگوار خاندانوں کے غم میں برابر کے شریک ہیں، بے گناہ شہریوں کو نشانہ بنانا افسوسناک ،قابل مذمت اقدام ہے۔

اس سے قبل بلوچستان کے اضلاع قلات، موسیٰ خیل اور بولان میں فائرنگ کے مختلف واقعات میں پولیس اور لیویز اہلکاروں سمیت 38 افراد شہید ہو گئے تھے۔

پولیس نے بتایا کہ اتوار کی رات ضلع قلات میں مختلف واقعات میں بلوچستان لیویز کے 8 اہلکار شہید ہوئے تھے۔