Tag: شندور پولو فیسٹول

چترال: 12 ہزار 600 فٹ بلندی پر واقع دنیا کے بلند ترین پولو گراؤنڈ میں اس سال پھر میلا سجے گا۔

تفصیلات کے مطابق یکم جولائی سے 3 جولائی تک سیاح تین دن ہزاروں میٹر بلندی پر واقع پولو گراؤنڈ میں چترال اور گلگلت بلتستان کے ٹیموں کے درمیان پولو میچز سے لطف اندوز ہوں گے۔

کرونا عالمی وبا کی وجہ سے گزشتہ دو سال ‘شندور پولو فیسٹول’ تعطلی کا شکار رہا، لیکن سیاح اور پولو کے شوقین کھلاڑیوں کے لیے خوشی کی خبر ہے کہ اس سال شندور میلا پھر سے سجے گا۔

شندور پولو فیسٹول 7 سے 9 جولائی تک ہوتا ہے، لیکن اس سال عید قربان کی وجہ سے اس فیسٹول کے شیڈول کو آگے لے جایا گیا ہے اور اس سال یکم سے 3 جولائی تک پولو میچز کھیلے جائیں گے۔

شندور چترال اور گلگت بلتستان کے باڈر پر واقع سرسبز کھلا میدان ہے، جہاں پر 1936 سے باقاعدگی کے ساتھ ہر سال یہ فیسٹیول منعقد کیا جا رہا ہے۔

واضح رہے کہ چترال اور گلگت بلتستان حکومت اس علاقے کو اپنی ملکیت سمجھتی ہیں، اور اس علاقے پر دونوں اطراف کے لوگوں کا تنازع بھی چل رہا ہے، حالات خراب ہونے کی وجہ سے کچھ سالوں کے لیے پولو فیسٹول کا انعقاد بھی ممکن نہیں رہا تھا، لیکن گزشتہ ایک دہائی سے محکمہ سیاحت خیبر پختون خوا اس فیسٹول کا باقاعدہ انعقاد کرتا چلا آ رہا ہے۔

شندور بلندی پر ہونے کی وجہ سے جولائی کے مہینے میں رات کو یہاں درجہ حرات نقطہ انجماد سے نیچے چلا جاتا ہے، تاہم دن کو جب سورج نکلتا ہے تو پھر سخت گرمی پڑتی ہے، اس لیے شندور فیسٹول کے لیے جانے والے سیاحوں کو گرم ملبوسات ہونے کے ساتھ دن کو دھوپ کی تپش سے جِلد کو بچانے کے لیے سن بلاک ساتھ لے جانے کا مشورہ دیا جاتا ہے۔

محکمہ سیاحت کے ترجمان سعد بن اویس نے بتایا کہ دو سال کے وقفے کے بعد اس سال شندور فیسٹول منعقد کیا جا رہا ہے، فیسٹول کے انتظامات کے لیے آج چیف سیکریٹری کی زیر صدارت اجلاس بھی ہوا، جس میں کمشنر ملاکنڈ، ریجنل پولیس آفیسر، ڈپٹی کمشنرز و ڈسٹرکٹ پولیس آفیسرز اپر اور لوئر چترال نے ویڈیو لنک پر شرکت کی۔

سعد بن اویس نے بتایا کہ چیف سیکریٹری نے انتظامیہ کو ہدایت کی ہے کہ شندور پولو فیسٹیول کے لیے بہترین انتظامات یقینی بنائے جائیں، اس لیے ملکی و غیر ملکی سیاحوں کی سہولت کے لیے بہترین انتظامات کیے جا رہے ہیں۔

سعد بن اویس نے بتایا کہ یکم جولائی سے شروع ہونے والے تین روزہ شندور پولو فیسٹیول کی سیکیورٹی کے لیے خصوصی انتظامات کیے جائیں گے، سیاحوں کے لیے پولو میچ دیکھنے کے ساتھ دیگر تفریحی و ثقافتی سرگرمیوں کا بھی انتظام کیا جائے گا۔