اسلام آباد: وفاقی حکومت نے شوگر انکوائری کمیشن رپورٹ کالعدم قرار دینے کے فیصلے کیخلاف اپیل دائر کردی ، جس میں کہا سندھ ہائی کورٹ کے فیصلے سےعوام شدید متاثر ہوئے ہیں، فیصلہ کالعدم قراردےکرشوگرکمیشن رپورٹ بحال کی جائے۔
تفصیلات کے مطابق وفاقی حکومت نے شوگر انکوائری کمیشن رپورٹ کو کالعدم قرار دینے کے سندھ ہائیکورٹ کے فیصلےکے خلاف سپریم کورٹ میں اپیل دائر کردی۔
اپیل میں کہا گیا ہے کہ سندھ ہائیکورٹ نے شوگرکمیشن کی رپورٹ تکنیکی نکات پرکالعدم قراردی، سندھ ہائی کورٹ کے فیصلے سے شوگرمافیا کو فائدہ پہنچا اور عوام شدید متاثر ہوئے ہیں۔
حکومت نے جانب سے اپیل میں کہا ہے کہ شوگرمافیا انتہائی مہنگے داموں چینی فروخت کرکےدونوں ہاتھوں سےلوٹ رہی ہے، سندھ ہائیکورٹ کافیصلہ کالعدم قراردے کر شوگرکمیشن رپورٹ بحال کی جائے تاکہ شوگرکمیشن رپورٹ کی روشنی میں تحقیقات ہوسکیں۔
اپیل میں شوگر ملز مالکان، ڈی جی ایف بی آر اور وزیراعظم کے مشیرشہزاد اکبر کا فریق بنایا گیا ہے۔
یاد رہے 17 اگست کو سندھ ہائی کورٹ نے شوگر انکوائری کمیشن اور رپورٹ کو کالعدم قرار دیتے ہوئے نئی آزادانہ تحقیقات کا حکم دیا تھا۔
ہائی کورٹ نے حکم دیا تھا کہ نیب اور ایف بی آرگزشتہ کمیشن رپورٹ سے ہٹ کر غیر جانبدارانہ تحقیقات کرے اور کمیشن میں شوگر انڈسٹری سے متعلق معلومات رکھنے والوں کو بھی شامل کیا جائے۔
عدالت نے حکم نامے میں کہا تھا کہ ایف بی آر ٹیکس قوانین کے مطابق تحقیقات کرے جب کہ ایف آئی اے بھی اس حوالے سے از سر نو تحقیقات کرے۔
خیال رہے شوگر انکوائری کمیشن کی حتمی رپورٹ میں جہانگیر ترین، مونس الٰہی، شہباز شریف اور ان کے اہل خانہ، اومنی گروپ سمیت دیگر کو چینی بحران کا ذمے دار قراردیا گیا تھا۔
