Tag: شوگر لیول

  • خون میں شوگر لیول چانچنے کا نیا اور آسان طریقہ

    خون میں شوگر لیول چانچنے کا نیا اور آسان طریقہ

    ذیابیطس کے مریضوں کیلیے شوگر لیول کو چیک کرنے کا عام طریقہ پیشاب کا ٹیسٹ یا سوئی چبھو کر ٹیسٹ اسٹرپ کے ذریعے کیا جاتا ہے۔

    لیکن یہ ایک تکلیف دہ عمل ہے کیونکہ اس کے لیے انگلی میں بار بار سوئی چبھو کر خون کا نمونہ لینا پڑتا ہے، یا پھر ٹیسٹ کیلیے لیبارٹری یا ہسپتال جانا پڑتا ہے، آج ہم آپ کو گھر بیٹھے اور بغیر کسی تکلیف کے شوگر ٹیسٹ کرنے کے طریقے سے آگاہ کریں گے۔

    بھارتی میڈیا رپورٹ کے مطابق بنگلورو کے انڈین انسٹی ٹیوٹ آف سائنس کے سائنسدانوں نے اس کا ایک متبادل طریقہ دریافت کیا ہے جو بغیر کسی چوٹ یا تکلیف کے یہ باآسانی کام کرے گا۔

    Sugar test

    نئی تحقیق کے مطابق سائنسدانوں نے "فوٹو اکو سٹک سینسنگ” نامی ٹیکنالوجی (Photoacoustic sensing technology) تیار کی ہے، جس میں لیزر شعاعوں کی مدد سے خون میں گلوکوز کی سطح معلوم کی جاسکتی ہے۔ یہ طریقہ جسم کے ٹشوز پر شعائیں ڈال کر ان میں ہونے والی معمولی حرکات کا پتہ لگاتا ہے۔

    اس دوران پیدا ہونے والی ہلکی سی ارتعاش (وائبریشن) کو خاص ڈٹیکٹرز کے ذریعے محسوس کیا جاتا ہے پھر ان آواز کی لہروں کی شدت کو مدنظر رکھتے ہوئے خون میں گلوکوز کی مقدار کا تعین کیا جاتا ہے۔

    ماہرین کا کہنا ہے کہ یہ طریقہ نہ صرف محفوظ اورآسان ہے بلکہ زیادہ درست اور بہتر نتائج بھی فراہم کرتا ہے۔

    اگر یہ تکنیک مزید کامیاب ثابت ہوئی، تو مستقبل میں ذیابیطس کے مریضوں کو روزانہ سوئی کے استعمال کی ضرورت نہیں رہے گی اور ایک آسان اور جدید طریقے سے وہ اپنی صحت کی نگرانی کرسکیں گے۔

  • اب آپ آنسوؤں کے ذریعے شوگر لیول جانچ سکیں گے؟ مگر کیسے

    اب آپ آنسوؤں کے ذریعے شوگر لیول جانچ سکیں گے؟ مگر کیسے

    سعودی طالبات نے آنسوؤں کے ذریعے جسم میں شوگر لیول جانچنے والا کانٹیکٹ لینس ایجاد کرلیا جسے سعودی اتھارٹی میں پیٹنٹ کیا گیا ہے۔

    سعودی خبر رساں ادارے کی رپورٹ کے مطابق سعودی طالبہ لیان السبیعی کا اپنی ایجاد کے حوالے سے تفصیلات بتاتے ہوئے کہنا تھا کہ انہوں نے ایسا کانٹیکٹ لینس ایجاد کیا ہے جو آنسوؤں سے خون میں موجود گلوکوز کی مقدار کو با آسانی جانچ سکتا ہے۔

    اُنہوں نے کہا کہ یہ ایجاد کانٹیکٹ لینس اور ایپلیکشن پر مشتمل ہے۔ لینس آنسوؤں کے ذریعے خون میں موجود گلوکلوز کا تعین کرتا ہے اور حاصل ہونے والی ریڈنگ ایپلیکیشن پر منتقل ہوجاتی ہے۔

    اُنہوں نے کہا کہ اس ایجاد سے شوگر میں مبتلا معمر افراد یا کم عمر بچوں کو کافی فائدہ ہو گا کیونکہ ایپلیکیشن کے ذریعے بچوں کے والدین یا معمر افراد کی دیکھ بھال کرنے والوں کو شوگر کے لیول کے بارے میں فوری معلومات حاصل ہو سکیں گی اور وہ بروقت دوائی دے سکیں گے۔

    واضح رہے کہ ذیابیطس تب پیدا ہوتی ہے جب جسم اپنے اندر موجود شکر (گلوکوز) کو حل کرکے خون میں شامل نہیں کر پاتا اس کی پیچیدگی کی وجہ سے دل کے دورے، فالج، نابینا پن، گردے ناکارہ ہونے اور پاؤں اور ٹانگیں کٹنے کا خطرہ پیدا ہو سکتا ہے۔

    یہ مرض ضرورت سے زیادہ میٹھا کھانے، ذہنی تناؤ اور صحت مند زندگی سے دوری اختیار کرنے کی وجہ سے ہوتا ہے جس کی مختلف علامات ہیں۔

    پیاس لگنا، گلے اور زبان کا خشک رہنا اور نظر کم آنا سمیت ذیابیطس کی کچھ علامتیں ایسی بھی ہیں جو آپ کے ہاتھ اور پاؤں پر بھی محسوس کی جاتی ہیں۔

    پیروں کا سُن ہوجانا
    اگر آپ کے پاؤں یا ٹانگیں سُن ہوتی ہیں تو یہ ذیابیطس کی علامت ہوسکتی ہے، یہ مرض آپ کے اعصاب کو نقصان پہنچاتا ہے جس کی وجہ سے درد یا کسی اور چیز کو محسوس کرنے کی صلاحیت کم ہوسکتی ہے۔

    جھنجھناہٹ
    کیا آپ کو لگتا ہے کہ آپ کے ہاتھ اور پاؤں پر کچھ چبھن محسوس ہورہی ہے؟ اس کانٹے دار احساس کو ٹنگلنگ کہتے ہیں۔

    خون میں شوگر کی مسلسل بلند سطح اعصاب کو متاثر کرتی ہے جس سے دماغ میں سگنل کے بہاؤ میں خلل پڑتا ہے۔

    بلڈ شوگر کو کیسے کنٹرول کیا جائے؟

    ٹانگوں میں درد
    ٹانگوں میں درد ہونا بھی شوگر کے مرض میں مبتلا ہونے کی علامت ہے جو پٹھوں کے کھچاؤ یا ٹانگوں کے اچانک درد کا باعث بنتا ہے، کچھ لوگ رات کے وقت اس درد کو زیادہ محسوس کرتے ہیں۔

  • شوگر لیول کنٹرول رکھنے کیلئے ناشتے میں یہ چیز لازمی شامل کریں

    شوگر لیول کنٹرول رکھنے کیلئے ناشتے میں یہ چیز لازمی شامل کریں

    ذیابیطس کے مریض اس کیفیت سے بخوبی واقف ہیں کہ جب کوئی کھانے کی خاص چیز سامنے آجائے تو اس سے درگزر کرنا ان کیلئے کتنا مشکل ہوجاتا ہے۔

    اس کی وجہ صرف یہی ہوتی ہے تاکہ بعد کی تکلیف سے بچنے کیلئے پرہیز کرلیا جائے، کیونکہ جب شوگر حملہ کرتی ہے تو بہت بری طرح کرتی ہے۔

    ذیابیطس ایک خاموش قاتل ہے جو انسان کو دیمک کی طرح اندر ہی اندر ختم کردیتی ہے لہٰذا جو لوگ شوگر کے مریض ہیں ان کو اپنی متوازن غذا کا بہت خیال رکھنا چاہیئے۔

    شوگر کا مریض دوا کے بارے میں بے احتیاطی کرنے کا سوچ بھی نہیں سکتا ہے، لیکن آج ہم آپ کو کچھ ایسا طریقہ بتائيں گے جس کے ذریعے اس کو کنٹرول میں رکھا جا سکتا ہے۔

    اس حوالے سے زیر نظر مضمون میں ماہرین صحت نے ذیابیطس کے مریضوں کیلئے صبح کے ناشتے کیلئے جن غذاؤں کا انتخاب کیا ہے اس کا ذکر کیا گیا ہے، جس سے جسم میں شوگر نہیں بڑھے گا۔

    جیسا کہ شوگر کے مریض کچھ بھی کھانے سے پہلے سو بار سوچتے ہیں کہ کہیں ان کا شوگر لیول نہ بڑھ جائے، وہ شوگر لیول کو برقرار رکھنے کے لیے کھانے سے گریز کرتے ہیں۔

    ایسے لوگوں کے لیے آج ہم ناشتے کی ایک خاص ترکیب لائے ہیں جو کہ بہت فائدہ مند ہے، اسے کھانے سے شوگر لیول پر کوئی اثر نہیں پڑے گا۔ اس ڈش کا نام سویا ڈوسہ ہے۔

    اس ڈوسہ کو بنانے میں زیادہ وقت درکار نہیں، اسے بہت آسانی سے تیار کیا جا سکتا ہے۔ اس کے علاوہ ذائقہ بھی لاجواب ہے۔

    سویا ڈوسا میں شوگر بڑھانے والی کوئی خوراک شامل نہیں ہے! ماہرین کا کہنا ہے کہ ذیابیطس کے مریض سویا ڈوسا بغیر کسی پریشانی کے کھاسکتے ہیں۔

    سویا ڈوسا بنانے کے لیے کن اجزاء کی ضرورت ہے؟

    ایک کپ سویا دودھ، چوتھائی کپ گندم کا آٹا

    تیل حسب ذائقہ

    نمک حسب ذائقہ

    ایک چٹکی بیکنگ سوڈا

    زیرہ 1 چائے کا چمچ

    ہری مرچیں حسب ضرورت کٹ لیں۔

    آدھا کپ کٹی پیاز

    ایک چٹکی دھنیا حسب ضرورت

    بنانے کا طریقہ

    اس کے لیے سب سے پہلے ترکیب میں درکار پیاز اور ہری مرچوں کو باریک کاٹ کر ایک طرف رکھ دیں۔ دھنیا بھی پیس لیں۔

    اب ایک پیالے میں گندم کا آٹا اور سویا دودھ ڈال کر اچھی طرح مکس کریں۔

    اس طرح مکس کرنے کے بعد ایک ایک کرکے کٹی پیاز، ہری مرچ پاؤڈر، بیکنگ سوڈا، زیرہ اور نمک حسب ذائقہ ڈالیں۔

    پھر مکسچر میں کافی مقدار میں پانی ڈال کر ڈوسا بنانے کے لیے آٹا تیار کریں۔

    اس کے بعد آٹے کو 15 منٹ کے لیے ایک طرف رکھیں اور پھر ڈوسا بنا لیں۔

    اس طرح تیار کردہ ڈوسا ٹماٹر کی چٹنی، ناریل کی چٹنی کے ساتھ بے خوف ہوکر مزے لے کر کھائیں۔

  • شوگر لیول پر فوری قابو پانے کیلئے یہ کام لازمی کریں

    شوگر لیول پر فوری قابو پانے کیلئے یہ کام لازمی کریں

    شوگر یعنی ذیابیطس کے مریض اس بات سے بخوبی واقف ہیں کہ انہیں کوئی بھی میٹھی چیز کھانے سے پہلے دس بار سوچنا پڑتا ہے کیونکہ جب ذیابیطس حملہ کرتی ہے تو بہت شدت سے کرتی ہے۔

    شوگر انسان کو اندر ہی اندر ختم کردیتی ہے جو لوگ شوگر کے مریض ہیں ان کو اپنی متوازن غذا کا بہت خیال رکھنا چاہیئے۔

    اگر آپ شوگر کے مریض ہیں اور ادویات کھا کھا کر تنگ آچکے ہیں تو پریشان نہ ہوں،

    کیا آپ کو کئی برسوں سے شوگر ہے؟ دوا کھا کھا کر پریشان ہو گئے ہیں، اس کے باوجود شوگر کم نہیں ہو رہی۔ پریشان نہ ہوں۔

    اس کے لیے لوگ ڈاکٹروں کے پاس جاتے ہیں اور ہر قسم کی مہنگی دوائیں بھی لیتے ہیں پھر بھی شوگر لیول میں کمی کے آثار نظر نہیں آ تے۔

    آج ہم آپ کو بتائیں گے کہ کس طرح گھریلو کاڑھا پینے سے آپ کی شوگر دور ہو جائے گی اور زندگی کی بہت بڑی مصیبت سے چھٹکارا بھی کسی حد تک ممکن ہوجائے گا۔

    میتھی کا پانی

    رات کو سونے سے پہلے ایک چمچ میتھی کے دانے ایک گلاس پانی میں بھگو دیں اور صبح خالی پیٹ اس کا استعمال شوگر لیول کو کنٹرول میں رکھتا ہے۔

    ماہرین کا کہنا ہے کہ یہ ٹوٹکہ ذیابیطس کے شکار افراد کے لیے فائدہ مند ہے، جریدے ‘فائیٹوتھراپی ریسرچ’ میں شائع ہونے والی 2014 کی ایک تحقیق میں بتایا گیا کہ ٹائپ ٹو ذیابیطس والے لوگ جنہوں نے 10 گرام میتھی کو 8 ہفتوں تک دن میں دو بار پانی میں بھگو کر پیا، ان کے خون میں شوگر کی سطح اور ہیموگلوبن A1c کی سطح میں نمایاں کمی واقع ہوئی۔

    دار چینی

    شوگر لیول کو کنٹرول میں رکھنے کے لیے دار چینی کا پانی ذیابیطس کے مریضوں کے لیے بہت مفید ہے۔ اس کے استعمال سے شوگر جلد ٹھیک ہوجاتی ہے۔

    اس کو بنانے کے لیے سب سے پہلے ایک کپ گرم پانی میں تین یا چار چھوٹی دار چینی کی چھڑیاں ڈال کر ڈھانپ دیں۔ اسے کچھ دیر ابلنے دیں۔ اس کے بعد اسے ٹھنڈا کر کے پی لیں۔

    ماہرین کا کہنا ہے کہ روزانہ کھانے کے 10 منٹ بعد اس پانی کو پینے سے خون میں گلوکوز کی سطح کنٹرول میں رہے گی۔

  • شوگر لیول کو کیسے قابو میں رکھا جاسکتا ہے؟

    شوگر لیول کو کیسے قابو میں رکھا جاسکتا ہے؟

    دنیا بھر میں ذیابیطس کے مریضوں میں اضافہ ہوتا جارہا ہے، ماہرین شوگر کے مریضوں کی آسانی کے لیے کچھ تجاویز بتاتے ہیں جس سے ان کا شوگر لیول کم رہے گا اور وہ بھرپور زندگی گزار سکیں گے۔

    ماہر غذائیات کے مطابق ذیابیطس کے مریضوں کا ایک ہی ہدف ہونا چاہیئے کہ شوگر لیول کو کسی طرح سے قابو میں رکھا جائے۔

    ماہرین کا کہنا ہے کہ اگرچہ غذا کا کوئی ایسا فارمولہ نہیں ہے جو سب کے لیے کارآمد ثابت ہو تاہم کچھ چیزوں کو مدنظر رکھنا لازمی ہے۔

    ذیابیطس میں مبتلا ہر شخص کی کوشش ہونی چاہیئے کہ وہ اپنی غذا میں زیادہ سے زیادہ فائبر کا استعمال کرے، جن اشیا میں فائبر بھرپور مقدار میں موجود ہے ان میں اجناس، دالیں، خشک میوہ، بیج، پھل اور سبزیاں شامل ہیں۔

    ذیابیطس کے مریضوں میں کاربو ہائیڈریٹ کی مقدار خون میں موجود شوگر لیول کے تناسب کو خراب کر سکتی ہے۔ اسی لیے ایسے مریضوں کو مشورہ دیا جاتا ہے کہ وہ روزانہ کی بنیاد پر ایک خاص مقدار میں کاربو ہائیڈریٹ کا استعمال کریں۔

    کھانا کھانے کے طور طریقے اور اوقات میں تبدیلی لانا لازمی ہے، کچھ لوگوں کو یقیناً ایک ہی مرتبہ پیٹ بھر کر کھانے کی عادت ہوگی لیکن دن میں تین بار کھانے کے بجائے چار سے پانچ مرتبہ کھا لیں لیکن تھوڑا تھوڑا۔

    شوگر کے مریضوں کو ویسے ہی میٹھے سے دور رہنے کا مشورہ دیا جاتا ہے لیکن میٹھے کی کمی کو پھلوں سے مکمل کیا جا سکتا ہے۔ تھوڑی مقدار میں جامن، سٹرابیری، انار،
    امرود اور بیر کھانے میں کوئی حرج نہیں ہے۔

    روزانہ 30 سے 40 منٹ کی ورزش کرنا لائف اسٹائل کا حصہ ہونا چاہیئے، یہ اتنا ہی ضروری ہے کہ جیسے کھانا پینا یا سونا۔

  • آصف زرداری کی طبیعت بدستور ناساز، میڈیکل بورڈ میں توسیع

    آصف زرداری کی طبیعت بدستور ناساز، میڈیکل بورڈ میں توسیع

    اسلام آباد: سابق صدر آصف زرداری کی طبیعت بدستور ناساز ہے، اسپتال ذرایع کا کہنا ہے کہ سابق صدر کو شوگر لیول بڑھنے سے پیچیدگیوں کا سامنا ہے، جس کی وجہ سے ان کا علاج کرنے والے طبی بورڈ میں توسیع کر دی گئی ہے۔

    تفصیلات کے مطابق سابق صدر کا شوگر لیول گزشتہ 3 ماہ سے معمول سے کئی زیادہ ہے، شوگر بڑھنے سے ان کے اندرونی اعضا متاثر ہونے کا خدشہ ہے، معمول سے زیادہ پیشاب آ رہا ہے، ذرایع نے بتایا کہ آصف زرداری کا علاج کرنے والے میڈیکل بورڈ میں توسیع کی گئی ہے جس کے بعد بورڈ کے ارکان کی تعداد 6 ہو گئی ہے۔

    میڈیکل بورڈ میں شعبہ امراض گردہ و مثانہ ساجد قاضی اور پیتھالوجی کے اسپیشلسٹ کو بورڈ میں شامل کیا گیا ہے، میڈیکل بورڈ نے سابق صدر آصف زرداری کا طبی معائنہ بھی کیا، اسپتال ذرایع نے بتایا کہ ان کے گردوں اور مثانے میں انفیکشن کا شبہ ہے، جس پر ڈاکٹرز نے گردوں اور مثانے کے مزید ٹیسٹ کرانے کا فیصلہ کیا ہے۔

    یہ بھی پڑھیں:  نواز شریف کے بعد آصف زرداری کے بھی پلیٹ لیٹس کم ہونے لگے

    ذرایع نے بتایا کہ آصف زرداری کا الٹرا ساؤنڈ، یورین کلچر ٹیسٹ کیا جائے گا، ٹیسٹس سے گردوں اور مثانے میں انفیکشن کی مقدار معلوم کی جائے گی،ٹیسٹس کے نتایج کی روشنی میں دوائیں بھی تجویز کی جائیں گی۔

    واضح رہے کہ سابق صدر کا بلڈ پریشر لیول نارمل جب کہ شوگر لیول میں اتار چڑھاؤ ہے، آصف زرداری کی باقاعدگی سے فزیو تھراپی بھی جاری ہے۔

    واضح رہے کہ گزشتہ روز اسپتال ذرایع نے انکشاف کیا تھا کہ نواز شریف کی طرح آصف زرداری کے پلیٹ لیٹس بھی کم ہونا شروع ہو گئے ہیں، 2 روز میں ان کے پلیٹ لیٹس کی تعداد میں 21 ہزار کی کمی ہوئی ہے۔

  • ناریل پانی شوگر لیول، بلڈ پریشر اور گردوں کیلئے فائدہ مند

    ناریل پانی شوگر لیول، بلڈ پریشر اور گردوں کیلئے فائدہ مند

    روزانہ ناریل کا پانی پینے سے نہ صرف آ پ خوبصورت نظرآئیں گے بلکہ یہ شوگر لیول، بلڈ پریشر اور گردوں کیلئے بھی فائدہ مند ہوگا۔

    ناریل کے پانی سے متعلق حالیہ تحقیق میں انکشاف ہوا ہے کہ ایسے افراد جو ناریل کا پانی باقاعدگی سے استعمال کرتے ہیں ان میں نہ صرف خون کی گردش بہتر ہوتی ہے بلکہ ان کا بلڈ پریشر بھی نارمل رہتا ہے اور ایسے افراد میں دل کے دورے سمیت دیگر دل کے امراض دوسروں کے مقابلے میں کم ہوتے ہیں۔

    یہی نہیں ناریل کا پانی شوگر لیول کو بھی کنٹرول کرتا ہے، ناریل کے پانی میں پوٹاشیم اور میگنیشیم کی مقدار زیادہ ہوتی ہے، جس کے استعمال سے انسان کے پیشاب کی مقدار میں اضافہ ہوتا ہے اور خاص طور پر گردوں کے مریضوں کے لئے فائدہ مند ہوتا ہے۔