ممبئی: بھارتی اداکارہ پریانکا نے خود کشی کر لی، پریانکا مشہور ٹی وی اداکارہ تھیں، گزشتہ روز ذہنی دباؤ کے باعث خود کو پنکھے سے لٹکا لیا۔
تفصیلات کے مطابق ٹیلی ویژن کی مشہور تامل اداکارہ پریانکا آج صبح اپنے بیڈ روم میں مردہ پائی گئیں، ان کی لاش پنکھے سے لٹکی ہوئی تھی۔
تامل ٹی وی شو ومسام میں جوئتکا کا کردار ادا کرنے کے بعد اداکارہ پریانکا کا نام گھر گھر میں مشہور ہو گیا تھا، کہا جاتا ہے کہ وہ کچھ عرصے سے گھریلو تنازعے کی وجہ سے ذہنی دباؤ میں تھیں۔
بھارتی میڈیا کے مطابق پریانکا کی لاش آج صبح گھریلو ملازمہ نے پائی اور پولیس کو اطلاع کر دی، پولیس نے لاش تحویل میں لے کر پوسٹ مارٹم کے لیے بھیج دی۔
کہا جا رہا ہے کہ بھارتی اداکارہ بچے نہ ہونے کے باعث ذہنی دباؤ میں تھیں، شادی کو تین سال ہوگئے تھے لیکن وہ ماں نہیں بن سکیں، جس پر گھر میں جھگڑے ہوتے تھے۔
پریانکا نے کئی مشہور ٹی وی سیریلز میں کام کیا، ان کی شادی تین سال قبل ارون بالا سے ہوئی تھی تاہم بچے نہ ہونے اور گھریلو ناچاقیوں کے باعث چند ماہ سے دونوں الگ الگ رہ رہے تھے۔
بھارتی ٹی وی اداکارہ پرتُیوشا بنرجی نے خود کشی کر لی
پولیس نے دونوں میاں بیوی کے اختلافات کو بھی مدِ نظر رکھ کر تفتیش شروع کر دی ہے، پوسٹ مارٹم کی رپورٹ سے بھی ادکارہ کی موت سے متعلق مزید معلومات ملنے کی توقع کی جا رہی ہے۔
بھارتی اداکار نے پنکھے سے لٹک کرخودکشی کرلی
واضح رہے انڈین ٹی وی انڈسٹری میں پنکھے سے لٹک کر اداکاروں کا خود کشی کرنا ایک افسوس ناک ٹرینڈ بنتا جا رہا ہے، اپریل 2016 میں بھی بگ باس میں کام کرنے والی اداکارہ پراتیوشا بنر جی نے پنکھے سے لٹک کر خود کشی کر لی تھی.۔
بھارت کے شہر حیدر آباد میں بھی مئی 2017 میں جواں سال تیلگو ٹی وی ایکٹر پردیپ کمار نے بیوی کے ساتھ معمولی جھڑپ کے بعد خود کو پنکھے سے لٹکا لیا تھا۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
