ARYNews.tv | Urdu – Har Lamha Bakhabar

Tag: شکیب

  • قتل کے مقدمے میں نامزد شکیب کو واپس بنگلادیش بلانے کا مطالبہ، نوٹس جاری

    قتل کے مقدمے میں نامزد شکیب کو واپس بنگلادیش بلانے کا مطالبہ، نوٹس جاری

    ڈھاکہ: بنگلادیشی کرکٹر شکیب الحسن کی مقدمے میں نامزدگی پر وکیل نے بنگلادیش کرکٹ بورڈ (بی سی بی) کو لیگل نوٹس بھیجا ہے، جس میں شکیب الحسن کو ٹیم سے نکالنے کا مطالبہ کیا گیا ہے۔

    تفصیلات کے مطابق بنگلہ دیش کرکٹ ٹیم کے سابق کپتان اور آل راؤندر شکیب الحسن جو ان دنوں ٹیسٹ سیریز کھیلنے کے لیے پاکستان میں موجود ہیں۔ ان پر بنگلہ دیش میں گزشتہ ماہ ہونے والے فسادات کے دوران ایک فیکٹری ملازم کے قتل کا مقدمہ درج کیا گیا ہے۔

    تاہم اب بنگلادیشی کرکٹر شکیب الحسن سے تحقیقات کیلئے وکیل نے بنگلادیش کرکٹ بورڈ کو لیگل نوٹس بھیج دیا جس میں قتل کے مقدمے میں نامزد شکیب کو واپس بنگلادیش بلانے کا مطالبہ کیا گیا۔

    نوٹس کے متن میں کہا گیا کہ شکیب الحسن کو فوری طور پر ٹیم سے نکال کر واپس بنگلا دیش بلایا جائے، آئی سی سی رول کے مطابق مقدمے میں نامزدگی کے بعد وہ قومی ٹیم میں کھیلنے کے اہل نہیں۔

    بنگلہ دیشی آل راؤنڈر شکیب الحسن کیخلاف قتل کا مقدمہ درج

    بنگلہ دیشی میڈیا کے مطابق گزشتہ ماہ فسادات میں ڈھاکا میں گارمنٹس فیکٹری کے ملازم کو قتل کر دیا گیا تھا۔ گزشتہ روز مقتول کے والدنے اس کا الزام شکیب الحسن پر عائد کرتے ہوئے مقدمہ درج کرایا تھا۔

    مقتول کے والد رفیق الاسلام کا کہنا تھا کہ ان کے بیٹے روبیل کے قتل کے ذمے دار شکیب الحسن ہیں۔ اس مقدمے میں شکیب الحسن کے علاوہ سابق وزیراعظم اور عوامی لیگ کی سربراہ شیخ حسینہ واجد اور اداکار فردوس احمد سمیت 154 افراد کو نامزد کیا گیا ہے۔

    رپورٹ کے مطابق 5 اگست کو روبیل نے رنگ روڈ پر احتجاجی مارچ میں شرکت کی تھی، جس پر حکومت کے حکم پر سیکیورٹی فورسز نے فائرنگ کی تھی اور روبیل زندگی کی بازی ہار گیا تھا۔

    واضح رہے کہ شکیب الحسن نے گزشتہ سال سابق وزیراعظم حسینہ واجد کی سیاسی جماعت عوامی لیگ کو جوائن کیا تھا اور رواں سال جنوری میں ہونے والے متنازع الیکشن میں وہ حکومتی جماعت کے ٹکٹ پر رکن اسمبلی منتخب ہوئے تھے۔

    حسینہ واجد حکومت کے خاتمے اور ملک سے فرار کے بعد بنگلہ دیشی صدر نے پارلیمنٹ کو بھی تحلیل کر دیا تھا جس کے بعد وہ رکن اسمبلی نہیں رہے جب کہ وہ اس وقت پنڈی کے میدان میں پاکستان کے خلاف پہلا ٹیسٹ میچ کھیل رہے ہیں۔

  • شکیب سری لنکا آئے تو پتھر مارے جائیں گے، میتھیوز کے بھائی سخت ناراض

    شکیب سری لنکا آئے تو پتھر مارے جائیں گے، میتھیوز کے بھائی سخت ناراض

    سری لنکن آل راؤنڈر اینجلو میتھیوز کے بھائی ٹریون میتھیوز ’ٹائم آؤٹ‘ کا مسئلہ سامنے آنے کے بعد بنگلہ دیشی کپتان شکیب الحسن کو واننگ جاری کردی۔

    اینجلو کے بھائی نے ذرائع ابلاغ سے گفتگو کرتے ہوئے کہا کہ بنگلہ دیشی آل راؤنڈر کا سری لنکا میں کسی بھی حیثیت میں خیرمقدم نہیں کیا جائے گا، ان کے اس فیصلے سے ہمیں بہت مایوسی ہوئی، شکیب سری لنکا آئے تو یہاں انھیں پتھر مارے جائیں گے۔

    ٹریون نے کہا کہ اس صورتحال میں ہم بہت مایوس ہوئے۔ بنگلہ دیشی کپتان میں اسپورٹس مین اسپرٹ نہیں ہے اور انھوں نے جینٹل مین گیم میں بالکل بھی انسانیت نہیں دکھائی۔

    انھوں نے کہا کہ شکیب کا سری لنکا میں خیرمقدم نہیں کیا جائے گا، اگر وہ یہاں کوئی انٹرنیشنل یا ایل پی ایل میچ کھیلنے آئے تو ان پر پتھر پھینکے جائیں گے یا انھیں مداحوں کی ناراضگی کا سامنا کرنا پڑے گا۔

    واضح رہے کہ ٹائم آؤٹ کے بعد امپائرز نے شکیب سے پوچھا تھا کہ کیا وہ اپنی اپیل واپس لینا چاہتے ہیں کیونکہ میتھیوز کے ہیلمٹ میں واقعی مسئلہ تھا، شکیب نے اپیل واپس لینے سے انکار کردیا تھا۔ اس کے بعد مایوس میتھیوز کو کسی بھی گیند کا سامنا کیے بغیر ہی گراؤنڈ سے واپس جانا پڑا تھا۔

    سری لنکا کے اینجلو میتھیوز کرکٹ کی تاریخ میں پہلی بار ’ٹائم آؤٹ‘ قرار پائے تھے جس کا سہرا بنگلہ دیشی کپتان شکیب الحسن کو جاتا ہے۔ بنگلہ دیشی ٹیم کے بولنگ کوچ ایلن ڈونلڈ نے بھی شکیب الحسن کی اس حرکت سے خود کو بری الذمہ قرار دیا تھا۔

    جنوبی افریقہ سے تعلق رکھنے والے ڈونلڈ کا کہنا تھا کہ اس لمحے وہ سوچ رہے تھے کہ خود گراؤنڈ میں چلے جائیں اور کہیں کہ بہت ہوچکا ہم یہ سب کرنے کے لیے یہاں نہیں آئے۔