لاہور : شہباز شریف منی لانڈرنگ کیس میں پیش ہونے والے پراسیکیوٹر کی عدالت میں اچانک طبیعت خراب ہوگئی اور ٹرائل کے دوران بیہوش ہوکر گرگئے۔
تفصیلات کے مطابق شہباز شریف منی لانڈرنگ کیس میں پیش ہونے والے پراسیکیوٹر کی طبیعت خراب ہوگئی، ایف آئی اے پراسیکیوٹر فاروق باجوہ کی اچانک عدالت میں طبیعت خراب ہوئی اور وہ بینکنگ کورٹ میں ٹرائل کے دوران بیہوش ہوکر گرگئے۔
ایف آئی اے پراسیکیوٹرکوفوری طور پرسروسزاسپتال منتقل کر دیا گیا ، ایم ایس سروسز اسپتال کا کہنا ہے کہ فاروق باجوہ کی حالت خطرے سے باہرہے۔
گذشتتہ روز وزیراعظم شہباز شریف اوران کے خاندان کیخلاف منی لانڈرنگ کیس کے اہم کردار مقصود چپڑاسی انتقال کر گئے تھے۔
ذرائع نے بتایا تھا کہ مقصود چپڑاسی حرکت قلب بند ہونے سے انتقال کرگئے، وہ ان دنوں بیرون ملک مقیم تھے۔
خیال رہے مقصود چپڑاسی کے اکاؤنٹ میں پیسے آنے پر کیس میں شامل کیا گیا تھا ، مقصود چپڑاسی کےاکاؤنٹس میں کروڑوں روپےنکلنے کا دعویٰ شہزاداکبرنے کیا تھا۔
ایف آئی اے عدالت میں مقصود چپڑاسی کواشتہاری قرار دینےکی کارروائی بھی جاری ہے۔
