Tag: شہباز شریف کے صاحبزادے

لاہور : آشیانہ ہاؤسنگ میگا کرپشن اسکینڈل میں گرفتار سابق وزیراعلی پنجاب شہباز شریف کے صاحبزادے سلمان شہباز آج نیب لاہور میں پیش ہوں گے، جن سے زائد اثاثوں پرپوچھ گچھ کی جائے گی۔

تفصیلات کے مطابق آشیانہ ہاؤسنگ میگا کرپشن اسکینڈل میں گرفتار سابق وزیراعلیٰ پنجاب کے بیٹے سلمان شہباز آج نیب لاہور میں پیش ہوں گے، سلمان شہباز خاندانی کاروبار اور بینک اکاؤنٹس کی دستاویزات ساتھ لے کر جائیں گے۔

ذرائع کے مطابق سلمان شہباز کو ناجائز اثاثہ جات کیس کے الزام میں طلب کیا گیا ہے، نیب کو کچھ بینکوں میں سلمان شہباز کے اکاؤنٹس کی معلومات ملی تھیں، اکاؤنٹس میں ضرورت سے زائد رقم کا لین دین ہوا۔

یاد رہے دو روز قبل قومی احتساب بیورو (نیب) نے مسلم لیگ ن کے صدر شہباز شریف کے بیٹے کو تفتیش کے لیے 10 اکتوبر کو طلب کیا تھا۔

گذشتہ روز ذرائع کا کہنا تھا کہ دوران تفتیش شہبازشریف کے بیان پر سلمان شہباز کو طلب کیا گیا، شہباز شریف نے کہا مالی معاملات کی دیکھ بھال سلمان شہباز کرتا ہے جبکہ شیئرز،جائیداد کے معاملات بھی وہی دیکھتے ہیں۔

مزید پڑھیں : شہباز شریف کے بیٹے کی نیب میں طلبی کی اصل وجہ سامنے آگئی

ذرائع کے مطابق شہبازشریف کےمطابق وہ خاندانی کاروبارکی زیادہ معلومات نہیں رکھتے۔

واضح رہے کہ مسلم لیگ ن کے صدر کو نیب نے آشیانہ اسکینڈل میں گرفتار کیا تھا، وہ صاف پانی کیس میں نیب میں پیش ہوئے تھے اور نیب لاہورنے آشیانہ ہاؤسنگ کیس میں گرفتار کیا، آشیانہ ہاؤسنگ کیس میں یہ سب سے بڑی گرفتاری ہے۔

قومی احتساب بیورو کا قومی اسمبلی میں اپوزیشن لیڈر میاں شہباز شریف کی گرفتاری کی بنیادی وجوہات بیان کرتے ہوئے کہنا تھا کہ شہبازشریف نے بطور وزیراعلیٰ پنجاب اپنے اختیارا ت کا غلط استعمال کیا۔

جس کے بعد اپوزیشن لیڈر شہباز شریف کو احتساب عدالت میں پیش کیا گیا ، جہاں عدالت نے دلائل کے بعد شہباز شریف کو 10 روزہ جسمانی ریمانڈ پر نیب کے حوالے کردیا تھا۔