کراچی : مسلم لیگ ن کے صدر شہباز شریف کا کہنا ہے کہ وفاق میں حکومت ملی تو صوبائی حکومت کیساتھ مل کر کراچی کواس کا مقام دلوائیں گے، وعدہ کرتا ہوں تین سال میں ہر گھر میں پانی کی فراہمی اور 6 مہینے کے اندر کراچی کا تمام کوڑا کرکٹ اٹھائیں گے۔
تفصیلات کے مطابق صدر مسلم لیگ ن شہباز شریف نے فیڈریشن سے خطاب کرتے ہوئے کہا کہ پاکستان کو دنیا میں کھویا ہوا مقام واپس دلا سکتے ہیں، الزام تراشی اور دروغ گوئی سے کام نہیں لیناچاہیے، آپ کی جو بھی کارکردگی ہے، اسے عوام کے سامنے رکھیں۔
شہبازشریف کا کہنا تھا کہ ہم نے دہشت گردی کا خاتمہ کیا، توانائی بحران کو ختم کیا، لوڈشیڈنگ کا مسئلہ 100فیصد نہیں تو 90فیصد ختم کر دیا گیا، دھرنے دیئے جائیں تو قوم کا وقت اور پیسہ ضائع ہوگا، 6 مہینے دھرنے دیئے جائیں گے تو کون ملک میں سرمایہ کاری کرے گا۔
انھوں نے کہا کہ عقل کا اندھا بھی جواب دے سکتا ہے، دھرنوں نے ملک کو نقصان پہنچایا، دھرنے کی وجہ سے کئی پروجیکٹس تاخیر کا شکار ہوئے، جو منصوبے 2014میں شروع ہونے تھے تاخیر کا شکارہوئے، منصوبوں میں تاخیر کی بڑی وجہ اسلام آبادمیں دھرنے تھے، چین کے صدر کو دھرنوں کی وجہ سے اپنا دورہ ملتوی کرنا پڑا، تمام صورتحال کے باوجود ہم نے دن رات محنت کی۔
مسلم لیگ ن صدر کا کہنا تھا کہ ایک نہیں10 منصوبے گنوا سکتا ہوں جن پر توجہ دی گئی، ایسے کئی منصوبے ہیں، جن پرخصوصی توجہ دی اور انہیں مکمل کیا، ہمیں جھوٹ کے بجائے اپنی کارکردگی پر جواب دینا چاہیے، ملک میں 18 ،18گھنٹے لوڈشیڈنگ ہوتی تھی، فیکٹریاں بند تھیں، آج ملک کا پہیہ چل رہا ہے، لوڈشیڈنگ کا 90 فیصد تک خاتمہ کیا۔
شہبازشریف نے کہا کہ ایک دھیلہ کرپشن دورکی بات ہے،منصوبے چیک کراسکتے ہیں، ملک میں سستی ترین بجلی فراہم کررہےہیں، نوازشریف نے تہیہ کیا تھا، دہشت گردی کا خاتمہ کرنا ہے، افواج پاکستان نے دہشت گردی جنگ میں بے مثال کردار ادا کیا۔
ان کا کہنا تھا کہ ہماری حکومت نے پرفارمنس کا ایک معیار دیا ہے دیکھ سکتے ہیں، دہشت گردی کا خاتمہ کیا،اسٹریٹ کرائمز اب بھی موجود ہیں، اسٹریٹ کرائمز روزگار اور بہترین منصوبوں سے ختم کیے جائیں گے، منتخب کیا گیا تو دہشت گردی کیساتھ اسٹریٹ کرائمز بھی ختم ہوں گے، کراچی کے مسائل کے حل کیلئے صرف صوبائی بجٹ کو نہیں دیکھنا، کراچی کے لیے وفاقی حکومت کو بھی خصوصی بجٹ دینا ہوگا۔
صدرمسلم لیگ ن نے کہا کہ بلند و بانگ دعوے کرنے نہیں آیا، ہم پر دوبارہ اعتماد کیا گیا تو کراچی کے 4اہم مسائل کو حل کریں گے، صوبائی حکومت کے ساتھ مل کر کراچی کو کھویا ہوا مقام دلوائیں گے، سی پیک کو الگ کر دیں تو بھی کراچی میں اہم منصوبے شروع کیے، کراچی کیلئے وفاقی حکومت نے خصوصی پیکج کا اعلان کیا تھا۔
شہبازشریف کا کہنا تھا کہ یہ کہنے نہیں آیا مسلم لیگ ن کو ووٹ دیں، جن کو ووٹ دیں ان سے پوچھیں کام کیا ہے یا نہیں، بطور مسلم لیگ ن صدر وعدہ ہے، تین سال کراچی کے گھر گھر میں پانی ہوگا، 6 مہینے کے اندر کراچی کا تمام کوڑا کرکٹ اٹھائیں گے۔
انھوں نے اعتراف کیا کہ ہاں میں نے کہا تھا کہ 6 مہینے میں لوڈشیڈنگ ختم نہ کی تو نام بدل دینا، 70 سال کے منصوبے6 مہینے میں نہیں لگا سکتا لیکن پھر بھی لوڈشیڈنگ ختم کی، لوڈشیڈنگ کا خاتمہ کرنے کیلئے تھوڑا وقت ضرور لگا لیکن وعدہ پورا کیا۔
مسلم لیگ ن کے صدر پبلک ٹرانسپورٹ کراچی کاحق ہے، لوگوں کا وقت بچانا ہے تو ٹرانسپورٹ منصوبے بنانے ہوں گے، کراچی کا چوتھا بڑا مسئلہ انفرا اسٹرکچر ہے، جس پر ہم توجہ دیں گے، بنیادی سہولتیں نہیں دیں گے تو کراچی ترقی نہیں کرسکتا، دہشت گردی کی طرح پانی بحران کو بھی مل کر حل کریں گے۔
ان کا کہنا تھا کہ کالاباغ ڈیم پر کہا تھا ہمیں سب سے پہلے قومی اتفاق پیدا کرنا ہوگا، کالا باغ ڈیم پر قومی اتفاق نہیں تو ہمیں بھاشا ڈیم پر توجہ دینی چاہیے۔
شہبازشریف نے کہا کہ بھارت کی ہمت نہیں پاکستان کو میلی آنکھ سے دیکھے، ہم نےبھارت سےجنگ کرنی ہے،اپنے مسائل خود حل کرنے ہیں، ٹیکسٹائل سمیت تمام مسائل کوحل کر کے بھارت سے آگے نکلنا ہے، پانی بحران حل کرنے کیلئے ہمیں مل کرکام کرنا ہے، چائنہ ون ونڈو آپریشن لائیں گے، باقاعدہ قانون پاس کرائیں گے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
