Tag: شہباز شریف

اسلام آباد: عوامی مسلم لیگ کے سربراہ شیخ رشید احمد نے کہا ہے کہ بلوچستان میں امریکی ڈرون حملہ پاک چین اقتصادی راہداری کے خلاف سگنل ہے،عالمی طاقتیں گوادر میں معاملات مزید پیچیدہ بنانا چاہ رہی ہیں ۔

اسلام آباد میں ایم ڈبلیو ایم کے سربراہ کے بھوک ہڑتالی کیمپ میں آمد کے موقع پر علامہ راجہ ناصر عباس کے ہمراہ مشترکہ نیوز کانفرنس کے دوران انکا کہنا تھا کہ حالات حکومت کے بس سے باہر ہو تے جا رہے ہیں، آئندہ چار ماہ فیصلہ کن ہیں تین سے چار ماہ میں ملکی سیاست کا فیصلہ ہو جائے گا، عید الفطر کے بعد بڑا سٹیج سجنے والا ہے۔

ان کا کہنا تھا کہ نواز شریف نے جان کیری کے فون پر قوم کو اعتماد میں لینا ضروری نہیں سمجھا، دفتر خارجہ کی حالت قابل رحم ہے، بلوچستان میں امریکی ڈرون حملہ پاک چین اقتصادی راہداری کے خلاف سگنل ہے،عالمی طاقتیں گوادر میں معاملات مزید پیچیدہ بنانا چاہ رہی ہیں۔

شیخ رشید کا کہنا تھا کہ حکومتی ٹی او آرز کو پہلے ہی مسترد کر دیا تھا، ملک میں دیگر مسائل کے حل سمیت شیعہ سنی ہم آہنگی بڑھانے کی اشد ضرورت ہے، بھارت امریکہ کا حاثیہ بردار بن چکا ہے، انہوں نے کہا کہ علامہ ناصر عباس بھوک ہڑتال ختم کر کے مشترکہ تحریک کا حصہ بنیں۔

اس موقع پر مجلس وحدت مسلمین کے سربراہ علامہ ناصر عباس نے کہا کہ نیشنل ایکشن پلان پر اس کی روح کے مطابق عمل نہیں کیا جارہا ، ملک کو قائداعظم اور علامہ اقبال کا پاکستان بنانا چاہتے ہیں،عید کے بعد ملک میں بڑی تحریک چلنے والی ہے ۔

لاہور: عوامی مسلم لیگ کے سربراہ شیخ رشید نے کہا ہے کہ 35 سال سے نواز شریف خوشحال نہیں ہوئے تو کسان کہاں سے ہونگے، 2016 میں ہی حکومت چلی جائے گی۔

لاہور میں چیئرنگ کراس پر کسانوں کے احتجاجی دھرنے سے خطاب کرتے ہوئے شیخ رشید کا کہنا تھا کہ عید کے بعد عوام کے ساتھ باہر نکلوں گا، عوام سے کہتا ہوں کہ مرو ، مارو یا مر جاو۔

انہوں نے کہا کہ میں وزیر اعظم کا امیدوار نہیں مگر عوام کےلیے آواز اٹھاتا رہونگا ، پاکستان میں عوام حکمرانوں کو تختوں پر لٹکائیں گے۔

شیخ رشید کا کہنا تھا کہ پاکستان میں اناج کی قیمتیں بھارت میں طے کی جاتی ہے ، انڈیا کے ایجنٹوں کو پاکستان پر مسلط کرنے کی سازش کی جارہی ہے۔

مزید پڑھیے: کسانوں کو ریلیف فراہم نہ کیا تو بجٹ کی مخالفت کرینگے، شاہ محمود قریشی

اس سے قبل احتجاجی دھرنے سے خطاب کرتے ہوئے شاہ محمود قریشی کا کہنا تھا کہ کسانوں کو مرتا ہوا نہیں چھوڑ سکتے ، کسانوں کو اپنا حق مانگنے پر گرفتار کیا جارہا ہے۔

انہوں نے کہا ہے کہ اگر حکومت نے زراعت پر جنرل سیلز ٹیکس ختم نہ کیا اور کسانوں کو ریلیف فراہم نہ کیا تو بجٹ کی مخالفت کرینگے۔