Tag: شہباز گل

لاہور: مریم اورنگ زیب کے بیان پر ترجمان وزیر اعلیٰ پنجاب شہباز گل نے ردِ عمل دیتے ہوئے کہا ہے کہ ن لیگ کے پاس سیاست کے لیے نواز شریف کی صحت کے علاوہ ایشو نہیں بچا۔

تفصیلات کے مطابق وزیر اعلیٰ پنجاب کے ترجمان نے کہا ہے کہ نواز شریف چوری پکڑی جانے اور پھر جرم ثابت ہونے پر جیل میں ہیں۔

شہباز گل کا کہنا تھا کہ جیل میں ہونے پر میاں صاحب نے اس بار عید پاکستان میں گزاری، ن لیگی قیادت ان کی صحت پر مسلسل جھوٹ بول رہی ہے۔

ترجمان نے کہا کہ محکمہ داخلہ پنجاب اور جیل حکام ایس او پیز کے مطابق کام کر رہے ہیں، عید کی چھٹیوں میں جیل میں بھی چھٹی تھی، نواز شریف کی صحت معمول کے مطابق ٹھیک ہے۔

یہ بھی پڑھیں:  عید پر بھی نواز شریف کو اہل خانہ سے ملنے نہیں دیا گیا: مریم اورنگزیب

ڈاکٹر شہباز گل نے کہا کہ عید سے پہلے نواز شریف نے فیملی اور 225 سے زائد کارکنوں سے ملاقات کی تھی۔ انھوں نے یہ بھی کہا کہ جیل حکام کا کہنا ہے کہ نواز شریف سے کل ان کی فیملی کی ملاقات کروائی جائے گی۔

واضح رہے کہ ترجمان مسلم لیگ ن مریم اورنگزیب نے کہا تھا کہ عید پر بھی نواز شریف کو ان کے اہل خانہ سے ملنے نہیں دیا گیا، عمران خان اپنی نا اہلی کا بدلہ نواز شریف سے لے رہے ہیں۔

ترجمان ن لیگ نے کہا کہ نواز شریف سے بدلہ لینے سے ملک کی ترقی کی شرح 5.8 فی صد نہیں ہو سکتی نہ ہی مہنگائی 3 گُنا کم ہو سکتی ہے، نواز شریف اس لیے جیل میں ہیں کیوں کہ عمران خان ترقی کی شرح 5.8 فی صد پر نہیں لا سکتے، اور مہنگائی کو 3 گنا کم نہیں کر سکتے۔

لاہور: ترجمان وزیراعلیٰ پنجاب شہباز گل نے کہا ہے کہ مریم نواز کے بیانیے نے ن لیگ کو اس نہج تک پہنچایا ہے، ایک دوسرے کو چور چور کہنے والے آج بغل گیر ہیں۔

تفصیلات کے مطابق ترجمان وزیراعلیٰ پنجاب شہباز گل نے مریم نواز کے بیان پر ردعمل دیتے ہوئے کہا ہے کہ سڑکوں پر گھسیٹنے کا نعرہ لگانے والوں نے قوم کو بیوقوف بنائے رکھا، ن لیگ، پی پی نے ملک کو قرضوں کی دلدل میں دھکیلا ہے۔

شہباز گل نے کہا کہ ووٹ کو عزت دو کا نعرہ لگانے والوں نے آئین کو کبھی عزت نہیں دی، شہر میں ایماندار تھانے دار آجائے تو سب چور اکٹھے ہوجاتے ہیں۔

ترجمان وزیراعلیٰ پنجاب نے کہا کہ چور دروازے یا خزانے میں چوری ن لیگ سے بہتر کوئی نہیں جانتا ہے، ن لیگ، پیپلزپارٹی نے لوٹ مار کرکے بیرون ملک جائیدادیں بنائیں۔

مزید پڑھیں: ن لیگ کی پارٹی قیادت کا اجلاس: عید کے بعد بھرپور احتجاجی تحریک چلانے کا فیصلہ

ایک سوال کے جواب میں شہباز گل نے کہا کہ ہمدردیاں حمزہ شہباز کے ساتھ ہیں انہیں مریم نواز کو پارٹی میں قبول کرنا ہی پڑے گا۔

واضح رہے کہ مسلم لیگ ن کی نائب صدر مریم نواز نے حکومت پر تنقید کرتے ہوئے کہا تھا کہ حکومت مخالف کسی تحریک کی ضرورت نہیں، حکومت خود ہی گر جائے گی۔

ان کا کہنا تھا کہ عوام کی بالا دستی سے ہی ملک چلے گا، حکومت کے پاس جھوٹ بولنے کے علاوہ کچھ نہیں ہے، نواز شریف کا بیانیہ پاکستان کے اچھے مستقبل کی ضمانت ہے۔

لاہور: ترجمان وزیر اعلیٰ پنجاب شہباز گل نے حمزہ شہباز کے بیان پر رد عمل دیتے ہوئے کہا ہے کہ پی پی اور ن لیگ کا گٹھ جوڑ کرپشن بچانے کی نا کام کوشش ہے، اپنی کرپشن بچانے کے لیے ماہ مقدس کا تقدس پامال نہ کریں۔

تفصیلات کے مطابق شہباز گل نے حمزہ شہباز کے بیان پر تنقید کرتے ہوئے کہا ہے کہ بلاول آج حمزہ اور مریم سے پوچھیں گے کہ زرداری کو سڑکوں پر کب گھسیٹنا ہے؟

انھوں نے کہا کہ بلاول والد کے پیسوں سے افطار ڈنر دے رہے ہیں، کرپشن بچانے کے لیے ماہ مقدس کا تقدس پامال نہ کریں۔

ڈاکٹر شہباز گل کا کہنا تھا کہ ملکی معیشت کو نقصان ان کی کرپشن اور ٹی ٹی ٹرانزیکشنز سے ہوا، 10 سال میں 50 ارب ڈالر قرضہ لے کر بیرون ملک جائیدادیں بنائی گئیں، آج سوئس بینک اور ایون فیلڈ جائیدادیں بچانے پر حکمت عملی طے ہوگی۔

ترجمان نے کہا کہ عوام نے دیکھ لیا ہے کہ زرداری اور شریف خاندان ایک ہی سکے کے دو رخ ہیں، چوروں کو بے نقاب کرنا اور ان کا گٹھ جوڑ عمران خان کی کام یابی ہے، کرپشن گُرو عوام کو گمراہ کرنے کی بجائے نیب کو اپنے کرتوتوں کا جواب دیں۔

یہ بھی پڑھیں:  اپوزیشن جماعتیں اکھٹی ہو رہی ہیں، ملکی معاملات پر بات چیت ہوگی: حمزہ شہباز

خیال رہے کہ پنجاب اسمبلی میں قائد حزب اختلاف حمزہ شہباز نے بلاول بھٹو کے افطار ڈنر میں شرکت کے لیے اسلام آباد روانگی سے قبل میڈیا سے گفتگو کرتے ہوئے کہا کہ اپوزیشن جماعتیں آج اکٹھی ہو رہی ہیں، ملکی معاملات پر بات چیت ہوگی۔

انھوں نے کہا ملک کو بدترین معاشی بحران کا سامنا ہے، عمران خان کو کارکردگی بہتر کرنا ہوگی یا گھر جانا ہو گا، موجودہ حکمران نا اہل ہیں، عوام ان کے جھوٹ پر توجہ نہ دیں۔

لاہور: ترجمان وزیراعلیٰ پنجاب شہباز گل نے کہا ہے کہ ن لیگ لاہور کی ریلی میں 2 ہزار کارکن جمع نہ کرسکی، احتجاج اور ریلی نکالنا ان کے بس کی بات نہیں ہے۔

تفصیلات کے مطابق ترجمان وزیراعلیٰ پنجاب شہباز گل نے مریم اورنگزیب کے بیان پر ردعمل دیتے ہوئے کہا کہ مریم اورنگزیب روزانہ قوم سے جھوٹ بولتی ہیں، عوام اب ان کی چالاکیاں اور غلط بیانیوں میں نہیں آنے والی ہے۔

شہباز گل نے کہا کہ ریڑھی والے، پاپڑ والے کے اکاؤنٹ میں اربوں روپے کہاں سے آئے، مشتاق چینی، مقصود ملک جیسے فرنٹ مینوں سے کیا وصول کرتے رہے۔

انہوں نے کہا کہ مریم اورنگزیب بتائیں شہباز شریف اور ان کے داماد کب وطن آئیں گے، حسن نواز اور حسین نواز کی واپسی کا شیڈول بھی عوام کو بتائیں، قومی خزانوں کو بے دردی سے لوٹنے والوں کو حساب دینا پڑ رہا ہے۔

مزید پڑھیں: کوٹ لکھپت جیل میں قید نوازشریف نے ن لیگ کوحکومت کیخلاف احتجاج کی اجازت دے دی

ترجمان وزیراعلیٰ پنجاب کا کہنا تھا کہ پنجاب میں گزشتہ 10 سالوں میں غریب کی حالت بد سے بدتر ہوتی گئی، ن لیگ نے کمیشن کھانے، ٹی ٹی ٹرانزیکشن کے علاوہ کچھ نہیں کیا۔

واضح رہے کہ ترجمان مسلم لیگ ن مریم اورنگزیب کا کہنا تھا کہ نو ماہ میں ترقی آدھی اور مہنگائی تین گنا بڑھ گئی، آئی ایم ایف ٹو آئی ایم ایف معاہدے کا بوجھ بھی عوام کو برداشت کرنا پڑے گا۔

یاد رہے کہ کوٹ لکھپت جیل میں قید نوازشریف نے ن لیگ کوحکومت کے خلاف احتجاج کی اجازت دے دی ہے، ن لیگ ڈالرکی قیمت اورمہنگائی کےخلاف تحریک کا آغاز عید کے بعد کرے گی۔

لاہور: ترجمان وزیراعلیٰ پنجاب شہباز گل نے کہا ہے کہ ن لیگ اور پیپلزپارٹی نے پاکستان کو قرضوں کی دلدل میں دھکیلا ہے، دونوں جماعتوں نے خزانہ لوٹنے میں کوئی کسر اٹھا نہیں رکھی تھی۔

تفصیلات کے مطابق ترجمان وزیراعلیٰ پنجاب نے حکومت اور آئی ایم ایف معاہدے پر تنقید پر ردعمل دیتے ہوئے کہا کہ سابقہ ادوار کی تاریخ آئی ایم ایف کے ساتھ قرضوں کے معاہدوں سے بھری ہے۔

[bs-quote quote=”وزیراعظم کی قیادت میں ملک جلد قرضوں سے جان چھڑا کر ترقی کی راہ پر گامزن ہوگا” style=”style-8″ align=”left” author_name=”شہباز گل”][/bs-quote]

شہباز گل نے کہا کہ مشرف حکومت کے اختتام پر پاکستان پر بیرونی قرضہ 45 ارب ڈالر تھا، پاکستان پر بیرونی قرضہ 2018 میں 94 ارب ڈالر تک پہنچ گیا تھا۔

انہوں نے کہا کہ پیپلزپارٹی، ن لیگ کی حکومتوں میں 50 ارب ڈالر تک قرضہ لیا گیا، یہ سارا قرضہ ان دونوں جماعتوں نے شعبدہ بازیوں، جیبیں بھرنے میں لگایا، اس بے پناہ قرض کا حساب مانگا جائے تو یہ شور مچانے لگتے ہیں۔

ترجمان وزیراعلیٰ پنجاب نے کہا کہ پاکستان کو اگلے تین سال میں 24 ارب ڈالر بیرونی قرضہ واپس کرنا ہے، آئی ایم ایف سے معاہدہ گزشتہ حکومتوں کے کرتوتوں کی وجہ سے کرنا پڑ رہا ہے۔

شہباز گل نے کہا کہ وزیراعظم عمران خان کی قیادت میں ملک جلد قرضوں سے جان چھڑا کر ترقی کی راہ پر گامزن ہوگا۔

لاہور: ترجمان وزیراعلیٰ پنجاب شہباز گل نے کہا ہے کہ پاکستان میں پیٹرولیم مصنوعات کی قیمتیں بھارت سے کم ہیں، بھارت میں پیٹرول پاکستانی روپے کے مطابق 145 روپے فی لیٹر ہے۔

تفصیلات کے مطابق ترجمان وزیراعلیٰ پنجاب شہباز گل نے پیٹرولیم مصنوعات کی قیمتوں سے متعلق بیان پر کہا ہے کہ پاکستان میں پیٹرولیم مصنوعات کی قیمتیں بھارت سے کم ہیں، پیٹرولیم مصنوعات کی قیمتیں برطانیہ، چین اور ترکی سے بھی کم ہیں۔

شہباز گل نے کہا کہ قیمتوں میں حالیہ اضافہ ملک کی معاشی صورت حال کے لیے ضروری تھا، اضافے کی بنیادی وجہ ڈالر، عالمی مارکیٹ میں قیمتوں میں اضافہ ہے۔

ترجمان وزیراعلیٰ پنجاب نے کہا کہ گزشتہ حکومت کے عائد ٹیکس کی شرح 52.6 فی صد تھی، ہماری حکومت آنے کے بعد ٹیکس کی شرح 23.6 فی صد پر لائی گئی ہے۔

مزید پڑھیں: پٹرولیم مصنوعات کی قیمتوں میں اضافہ، پیٹرول 9 روپے 42 پیسے مہنگا

واضح رہے کہ حکومت نے پیٹرول کی قیمتوں میں 9 روپے 42 پیسے، ڈیزل کی قیمت میں 4 روپے 89 پیسے جبکہ مٹی کے تیل کی قیمت میں 7 روپے 46 پیسے فی لیٹر اضافہ کیا تھا۔

ایف بی آر نے پیٹرولیم مصنوعات کی قیمتوں پر لاگو ٹیکس میں اضافے کی نئی شرح بھی جاری کردی ہے۔ پیٹرول پر جی ایس ٹی 2 فیصد سے بڑھا کر 12 فیصد کردیا۔

ہائی اسپیڈ اور لائٹ ڈیزل پر ٹیکس کی یکساں شرح بڑھا کر 17 فیصد کی گئی ہے جبکہ مٹی کے تیل پر جی ایس ٹی 8 فیصد سے بڑھا کر17 فیصد کردیا گیا ہے۔

معاون خصوصی برائے اطلاعات فردوس عاشق اعوان نے کہا تھا کہ عالمی سطح پر تیل کی قیمت میں اضافہ ہوا ہے، قیمتوں میں اضافے کا بوجھ حکومت اور عوام کو مل کر برداشت کرنا پڑے گا۔