شہداد کوٹ: پاکستان تحریک انصاف کے چیئرمین عمران خان نے کہا ہے کہ سندھ کے لوگوں کو زرداری کو شکست دینے کا موقع مل رہا ہے، آصف زرداری میں بہت تکبر ہے خود کو طاقتور سمجھتا ہے، سندھ میں عوام سے آصف زرداری کو انڈے اور ٹماٹر پڑیں گے۔
ان خیالات کا اظہار انہوں نے شہداد کوٹ میں جلسے سے خطاب کرتے ہوئے کیا، عمران خان نے کہا کہ فریال تالپور سوشل میڈیا پر ووٹ کے لیے دھمکیاں دے رہی ہیں، سندھ کے حکمران یہاں کے لوگوں کو انسان نہیں سمجھتے ہیں، سندھ کے لوگوں کو خوف کی زنجیروں کو توڑنا ہوگا۔
انہوں نے کہا کہ 25 جولائی کو ملنے والے موقع کا فائدہ اٹھانا ہے، 25 جولائی سندھ کے لوگوں کو موقع دے رہا ہے، شہداد کوٹ کے لوگوں کو بتانا چاہتا ہوں اللہ کبھی کبھی موقع دیتا ہے، پولیس کے ذریعے جھوٹا مقدمہ کرکے کسان کا پانی روکا جاتا ہے، سندھ کے لوگوں کو زرداری کو شکست دینے کا موقع مل رہا ہے۔
عمران خان نے کہا کہ اندرون سندھ میں پہلی بار آیا تو بہت غریب لوگ نظر آئے، بلوچستان میں سندھ سے بھی زیادہ برے حالات ہوتے تھے، آج سندھ میں بلوچستان سے بھی زیادہ حالات خراب ہیں، سندھ میں ہزاروں لوگ ہیپاٹائٹس میں مبتلا ہیں۔
چیئرمین تحریک انصاف نے کہا کہ پشاور میں 4 ارب میں شوکت خانم اسپتال بنایا ہے، سندھ کے عوام کا پیسہ باہر بھیجا جارہا ہے، سندھ میں 35 ارب کی منی لانڈرنگ کی گئی ہے، کراچی اور اندرون سندھ کے مسائل الگ ہیں، سندھ میں جتنی لوٹ مار ہے اتنی کسی صوبے میں نہیں ہے، 10 سال سندھ میں حکومت کی پیپلزپارٹی نے صوبے کے لیے کیا کیا۔
عمران خان نے کہا کہ ملک کو لوٹنا ن لیگ اور پیپلزپارٹی کا مک مکا تھا، الیکشن 2013 فکس تھا، امپائر اپنے تھے، دونوں جماعتوں میں سمجھوتا تھا، آصف زرداری اور نواز شریف باریاں لینے کے لیے اپنے بچے تیار کررہے ہیں، ایک طرف مریم نواز ہے تو دوسری طرف بے بی بلاول ہے۔
انہوں نے کہا کہ آج آصف زرداری کا نام ای سی ایل میں ڈالا گیا ہے، زرداری اور نواز شریف اکٹھے ہوکر اپنی چوری بچائیں گے، یہ دونوں اب پھر سے بھائی بھائی بن جائیں گے، نواز شریف اور مریم نواز کو سزا ہوگئی شہباز شریف تو خوشیاں منائیں گے، شہباز شریف سے کہتا ہوں فکر نہ کرو میں تمہارے پیچھے آرہا ہوں۔
انہوں نے کہا کہ سندھ کے لوگوں کو اپنے بچوں کے مستقبل کے لیے اپیل کرتا ہوں، سندھ کے عوام اپنے حقوق کی خاطر جہاد کے لیے اُٹھ کھڑے ہوں، اندرون سندھ سے زیادہ پسماندہ علاقے کہیں نہیں دیکھے، یہ آپ کی غلطی ہے جو ان کے خوف سے ڈر جاتے ہیں، سندھ کے لوگ پی ٹی آئی کے امیدواروں کو ووٹ نظریے کی بنیاد پر دیں۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
