9 مئی (یومِ سیاہ) شہدا کی یادگاروں اور تصاویر کی بے حرمتی پر سپاہی عمران شہید کی معصوم یتیم بیٹی کی بلکتی ہوئی پکار اور دل دہلا دینے والے جذبات آنکھوں میں آنسو بھر دیتے ہیں۔
سپاہی عمران شہید کی یتیم بیٹی اپنے دل کا حال سناتے ہوئے اشک بار ہو گئی، اشک بار آنکھوں سے اپنے بابا کو یاد کر کے شکوہ اور شر پسندوں کی جانب سے شہدا کی بے حرمتی پر گریہ کرتی رہی۔
بیٹی نے کہا ’’جنھوں نے شہدا کی تصویروں کو جلایا، میرا ان سے سوال ہے کہ میرے شہید باپ اور تمام شہدا کا کیا قصور تھا، میرے بابا آپ لوگوں کے لیے شہید ہوئے اور میں یتیم ہو گئی۔‘‘
سپاہی عمران شہید کی بیٹی کا کہنا تھا کہ ’’میں اپنے ابو سے پوچھوں گی کہ آپ نے ان لوگوں کے لیے جان دی جو آپ کی تصویروں کو جلاتے ہیں، جو آپ لوگوں سے محبت بھی نہیں کرتے، میں اپنے بابا کو کیا جواب دوں گی جن لوگوں کے لیے وہ شہید ہوئے وہ آپ کی تصویروں کو جلاتے ہیں۔‘‘
بیٹی نے کہا ’’جب آپ لوگ ہی ملک کا ساتھ نہیں دیں گے تو یہ وطن تباہ ہو جائے گا، آپ کے پاس اس حرکت کی تلافی کے لیے کوئی جواب ہے؟‘‘
بیٹی نے مزید کہا ’’میں یتیم ہوں، آپ کے پاس تو والدین اور بچے ہیں، میں پاکستان اور شہدائے پاکستان سے پیار کرتی ہوں، آپ بھی شہدا سے پیار کریں۔‘‘
