کراچی : انسداد دہشت گردی عدالت نے لیاری میں رکشہ ڈرائیور بن کر شہریوں کو لوٹنے والے ملزم کو مجموعی طور پر 20 سال قید کی سزا سنادی۔
تفصیلات کے مطابق انسداد دہشت گردی عدالت میں لیاری میں رکشہ ڈرائیور بن کر شہریوں کو لوٹنے کے کیس کی سماعت ہوئی۔
عدالت نے ملزم وسیم عثمان کے کیس کا فیصلہ سنادیا، فیصلے میں جرم ثابت ہونے پر ملزم وسیم عثمان کو مجموعی طور پر 20 سال قید کی سزا سنائی گئی۔
عدالت نے ملزم سے برآمد رکشہ اور پستول سرکاری خزانے میں جمع کرانے کا حکم دیا، پراسیکیویشن نے بتایا کہ ملزم کو لیاری عیدو لین سےخفیہ اطلاع پر گرفتار کیا گیا ، ملزم نے پولیس کو دیکھتے ہی فائرنگ کردی تھی۔
پولیس کا کہنا تھا کہ ملزم ویرانے میں جاکر اسلحہ کے زور پر مسافروں کو لوٹ لیتا تھا ، ملزم کے خلاف بغدادی تھانے میں مقدمہ درج ہے۔
