ARYNews.tv | Urdu – Har Lamha Bakhabar

Tag: شہزادہ ہیری

  • شہزادہ ہیری کے جوتوں میں موجود سوراخ میڈیا کی توجہ کا مرکز بن گئے

    شہزادہ ہیری کے جوتوں میں موجود سوراخ میڈیا کی توجہ کا مرکز بن گئے

    لندن : شہزادے ہیری نے اپنی اہلیہ کے ہمراہ ایک تقریب میں شرکت کی جہاں ان کے دیدہ زیب لباس کے ساتھ ساتھ ان کے جوتے بھی میڈیا کی توجہ کا مرکز بنے رہے۔

    تفصیلات کے مطابق برطانوی شہزادے ہیری نے اپنی زوجہ میگھن مرکل کے ہمراہ اپنے دوست چارلی کی شادی میں شرکت کی جہاں شہزادے کے جوتے مسلسل میڈیا کی توجہ کا مرکز بنے رہے، جس وجہ شہرت ان کے مہنگے جوتے نہیں بلکہ جوتوں میں موجود سوراخ تھا۔

    غیر ملکی خبر رساں ادارے کا کہنا تھا کہ برطانوی شہزادے ہیری کے جوتوں میں موجود سوراخ کیمرے کی آنکھ میں محفوظ ہوگئے۔

    پرنس ہیری اپنے بچپن کے دوست چارلی وین سٹرابینزی کے شادی کے موقع پر بیسٹ مین بنے سیاہ پینٹ کوٹ زیب تن کیے شریک ہوئے جبکہ ان کی نوبیاہتی میگھن مرکل نے دولہن نے سیاہ رنگ کا دیدہ زیب کلب مناکو لباس زیب تن کیا اور سر پر فلپ ٹریسی ٹوپی پہنی ہوئی تھی۔

    چارلی وین سٹرابینزی کی شادی میں میڈیا نے شہزادہ ہیری کے جوتے کے سول میں موجود سوراخ کو عقابی نگاہ سے دیکھتے ہوئے کیمرے کی آنکھ میں قید کرلیا۔

    غیر ملکی خبر رساں اداروں کا کہنا تھا کہ برطانیہ کے شہزادے ہیری کے سوراخ والے جوتوں کی تصاویر سماجی رابطوں کی ویب سائٹس پر شائع کی گئی تو سوشل میڈیا صارفین کی جانب سے مزیدار تبصروں کا سلسلہ شروع ہوگیا۔

    سماجی رابطے کی ویب سائٹ ٹویٹر پر ایک صارف نے شہزادہ ہیری کے سوراخ والے جوتوں پر ٹویٹ کرتے ہوئے کہا کہ ’شہزادہ ہیری کا سوراخ والے جوتے پہننا قابل تعریف ہے اور اسی سادگی کی وجہ سے میں انہیں پسند کرتا ہوں‘۔

  • شہزادہ ہیری اور میگھن مرکل رشتہ ازدواج میں منسلک ہوگئے

    شہزادہ ہیری اور میگھن مرکل رشتہ ازدواج میں منسلک ہوگئے

    لندن: برطانوی شاہی خاندان کے چھوٹے شہزادے ہیری اور امریکی اداکارہ میگھن مرکل رشتہ ازدواج میں منسلک ہوگئے۔ دونوں کی شادی کو سال کی سب سے بڑی شادی قرار دیا جارہا ہے۔

    برطانیہ کی شاہی شادی کا باقاعدہ آغاز لندن کے وقت کے مطابق 11 بجے سے ہوا تھا تاہم شہزادہ ہیری اور امریکی اداکارہ میگھن مرکل رشتہ ازوداج میں منسلک ہوگئے۔

    شہزادہ ہیری اور میگھن مرکل کی شادی میں شریک ہونے کے لیے ڈیوڈ اور ویکٹوریہ بیکھم، ایل ٹن جون، جورج اور امل کولونی سمیت 600 کے قریب مہمان سینٹ جارج چیپل میں  شریک ہیں۔

    قدیم قلعے کے باہر شاہی جوڑے کو دیکھنے کے شائق ہزاروں افراد عارضی کیمپ بنائے بیٹھے ہیں اور شاہی شادی کے لیے نہایت پرجوش ہیں۔ بی بی سی اور سی سی این سمیت متعدد برطانوی و امریکی چینلز پر صبح صادق سے ہی لائیو کوریج کی جارہی ہے۔

    شادی کی تقریب لندن سے دور دریائے ٹیمز کے کنارے واقع ونڈسر نامی قلعے کے سینٹ جارج چیپل میں ہورہی ہے جو گزشتہ 1 ہزار برس سے شاہی خاندان کے زیر استعمال ہے۔

    دلہن میگھن مرکل اپنی والدہ کے ساتھ کلائیویڈن ہوٹل سے ونڈسر کیسل کے گرجا گھر پہنچ چکی ہیں اور شہزادہ ہیری اور میگھن مرکل کی شادی کی تقریب کا آغاز ہوچکا ہے۔

    گرجا گھر کے راستے تک میگھن کی والدہ ان کے ساتھ سفر کریں گی تاہم چرچ پہنچنے کے بعد میگھن کی والدہ اتر کر اندر چلی جائیں گی جس کے بعد میگھن روایت کے برخلاف گاڑی سے اتر کر چرچ تک اکیلی جائیں گی۔

    بعد ازاں ولی عہد شہزادہ چارلس ان کا ساتھ دیں گے اور انہیں اس مقام تک لے جائیں گے جہاں شادی کے ایجاب و قبول ہوں گے۔

    مسیحی روایات کے مطابق گاڑی میں اور بعد ازاں پادری کے سامنے تک پہنچنے کا سفر دلہن اپنے والد کے ساتھ طے کرتی ہے تاہم میگھن کے والد ناسازی طبیعت کی وجہ سے شادی میں شرکت سے قاصر ہیں جس کے بعد اطلاعات تھیں کہ یہ روایت میگھن کی والدہ نبھائیں گی۔

    تاہم گزشتہ روز شاہی محل کی جانب سے جاری کردہ بیان میں کہا گیا ہے کہ میگھن نے اس کے لیے ہیری کے والد شہزادہ چارلس سے درخواست کی ہے۔ ’شہزادہ چارلس اس طریقے سے میگھن کو شاہی خاندان میں خوش آمدید کہنے میں نہایت خوشی محسوس کریں گے‘۔

    شاہی شادی میں 600 افراد کو مدعو کیا گیا ہے۔ علاوہ ازیں مزید 12 سو افراد بھی شرکت کریں گے جو اپنی کمیونٹیز کے لیے مختلف خدمات سر انجام دے رہے ہیں۔

    شادی میں دلہے کی آنجہانی والدہ شہزادی ڈیانا کی 3 بہنیں بھی شرکت کریں گی۔ ان میں سے ایک لیڈی جین فیلو ’سانگ آف سالومن‘ کتاب سے اقتباس پڑھیں گی۔

    شاہی جوڑے کے ایجاب و قبول کے بعد جوڑا بگھی میں ونڈسر کی سڑکوں سے ایک جلوس کی صورت گزرے گا۔ اس کے بعد قلعے میں ملکہ برطانیہ کی طرف سے مہمانوں کے لیے ظہرانے کا اہتمام کیا جائے گا۔

    بعد ازاں شام کے وقت دلہے کے والد شہزادہ چارلس فروگمور ہاؤس میں استقبالیہ دیں گے جس میں 200 قریبی عزیز و اقارب اور دوست شرکت کریں گے۔

    شادی میں پہننے کے لیے دلہن کا لباس اور اسے تیار کرنے والا ڈیزائنر تاحال صیغہ راز میں ہے۔ سی این این کے مطابق دلہن کا لباس 3 لاکھ 40 ہزار ڈالر کی خطیر رقم سے تیار کیا گیا ہے۔

    گو کہ محل کی جانب سے شاہی شادی پر اٹھنے والے اخراجات کی کوئی تفصیل جاری نہیں کی گئی، تاہم بی بی سی کا دعویٰ ہے کہ شادی پر 3 کروڑ 20 لاکھ پاؤنڈز کے اخراجات آئے ہیں۔

    بی بی سی کے مطابق صرف سیکیورٹی انتظامات پر 63 لاکھ 50 ہزار پاؤنڈز خرچ ہوئے ہیں۔

    شہزادے کی رومانوی داستان

    شہزادہ ہیری اور امریکی اداکارہ میگھن مرکل کے درمیان دوستی کی خبریں ستمبر 2016 میں سامنے آئیں تھیں۔ ذرائع کے مطابق دونوں کی پہلی ملاقات ایک چیریٹی پروگرام میں ہوئی تھی۔

    ایک سال کے دوران ہیری نے اپنے خاندان کے مختلف افراد سے میگھن کی ملاقات کروائی اور بالآخر گزشتہ برس نومبر میں شاہی محل کی جانب سے دونوں کی منگنی کا اعلان کیا گیا۔

    میگھن مرکل ان دنوں امریکی ٹی وی سیریز سوٹس میں اداکاری کے جوہر دکھا رہی تھیں تاہم شاہی خاندان سے منسلک ہونے کے بعد اب انہوں نے اداکاری کو خیر باد کہہ دیا ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • میگھن مرکل کا والدہ کے لیے صدیوں پرانی روایت توڑنے کا فیصلہ

    میگھن مرکل کا والدہ کے لیے صدیوں پرانی روایت توڑنے کا فیصلہ

    لندن: برطانوی شاہی خاندان کی ہونے والی بہو اور امریکی اداکارہ میگھن مرکل نے اپنی والدہ کے لیے صدیوں پرانی روایت توڑنے اور نئی تاریخ رقم کرنے کا فیصلہ کیا ہے۔

    قدیم مسیحی روایات کے مطابق جب دلہن اپنی شادی کے دن گاڑی سے اتر کر شادی کی رسومات کے لیے اسٹیج تک پہنچتی ہے اور گاڑی سے اسٹیج کا راستہ طے کرتی ہے تو اس موقع پر دلہن کے والد اس کے ہمراہ ہوتے ہیں۔

    تاہم میگھن مرکل نے اس روایت کو بدلتے ہوئے فیصلہ کیا ہے کہ یہ رسم ان کے والد کے بجائے والدہ نبھائیں گی۔ وہ چرچ پہنچنے تک گاڑی میں اور بعد ازاں پادری کے سامنے پہنچنے تک اپنی بیٹی کے ساتھ رہیں گی۔

    میگھن کے والد اور والدہ کے درمیان اس وقت علیحدگی ہوگئی تھی جب مرکل 6 برس کی تھیں۔ اس کے بعد سے مرکل اپنی والدہ کے ساتھ ہی رہیں اور فطری طور پر وہ اپنی والدہ سے بہت قریب بھی ہیں۔

    ذرائع کا کہنا ہے کہ شاہی خاندان کو بھی مرکل کی اس خواہش پر کوئی اعتراض نہیں۔

    بعض برطانوی اخبارات کے مطابق مرکل شادی کے دن چرچ پہنچنے تک کا فاصلہ اپنے والد اور والدہ دونوں کے ساتھ طے کرنا چاہتی تھیں تاہم گزشتہ روز ہی مرکل کے والد نے اپنی خرابی طبیعت کے باعث شادی میں آنے سے انکار کردیا ہے جس کے بعد اب مرکل کی والدہ تمام مواقعوں پر اپنی بیٹی کے ساتھ رہیں گی۔

    میگھن مرکل رواں ہفتے 19 مئی کو شہزادہ ہیری کے ساتھ شادی کے بندھن میں بندھنے میں جاری ہیں۔ شاہی خاندان میں شادی کی تیاریاں زور و شور سے جاری ہیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • مادام تساؤ میوزیم میں میگھن مرکل کا مومی مجسمہ

    مادام تساؤ میوزیم میں میگھن مرکل کا مومی مجسمہ

    لندن: برطانوی دارالحکومت لندن کے مادام تساؤ میوزیم میں شہزادے ہیری کی ہونے والی دلہن اور امریکی اداکارہ میگھن مرکل کا مومی مجسمہ نصب کردیا گیا۔

    میگھن مرکل کا مومی مجسمہ اس وقت نصب کیا گیا ہے جب شاہی شادی میں ایک ہفتے کا وقت رہ گیا ہے۔

    میوزیم کے جنرل مینیجر ایڈورڈ فلر کا کہنا ہے کہ شادی کے قریب آتے ہی لوگوں میں جوش و خروش بڑھ رہا ہے۔ شادی کے دن لوگ اپنی پسندیدہ شاہی شخصیت کو مجسمے کی صورت میں دیکھ سکیں گے۔

    میوزیم میں نصب مومی مجسمہ نے سبز رنگ کا لباس زیب تن کر رکھا ہے جو مرکل نے اس وقت پہنا تھا جب انہوں نے اپنی منگنی کے اعلان کے بعد شہزادے کے ساتھ پہلا انٹرویو دیا تھا۔

    مجسمے کے ہاتھ میں مرکل کو شہزادہ ہیری کی جانب سے پہنائی جانے والی ہیرے کی انگوٹھی کی نقل بھی موجود ہے۔

    میوزیم کی مرکزی مجسمہ ساز اسٹیفن مینز فیلڈ نے بتایا کہ ایک مجمسے کی تیاری میں عموماً 6 ماہ کا وقت لگتا ہے تاہم یہ مجسمہ ذرا جلدی تیار کرلیا گیا ’کیونکہ ہماے پاس وقت کم تھا‘۔

    انہوں نے بتایا کہ مجسموں کی جسامت کی پیمائش کے لیے شہزادہ ہیری اور میگھن مرکل یہاں نہیں آئے کیونکہ وہ دیگر شاہی سرگرمیوں میں مصروف ہیں۔ میوزیم انتظامیہ نے دوسری تکنیکوں سے مجسمے کی پیمائش طے کی۔

    مادام تساؤ میوزیم میں اس سے قبل شہزادہ ہیری کا مجسمہ نصب تھا جو ان کے خاندان کے دیگر افراد یعنی ملکہ الزبتھ، شہزادہ ولیم اور کیٹ مڈلٹن کے ساتھ موجود تھا۔ مجسمے نے فوجی لباس زیب تن کر رکھا تھا۔

    تاہم اب جبکہ ان کی زندگی کا ایک نیا باب شروع ہونے جارہا ہے، تو ان کے مجسمے میں بھی جدت کردی گئی ہے۔ ہیری کے ساتھ مرکل کا مجسمہ بھی شاہی خاندان کے دیگر افراد کے مجسموں کے ساتھ نصب کردیا گیا ہے۔

    انتظامیہ کے مطابق شاہی شادی سے ایک روز قبل مجسمے کو عام افراد کے لیے کھول دیا جائے گا۔ شادی کے روز میوزیم میں ان افراد کے لیے داخلہ مفت ہوگا جن کا نام میگھن یا ہیری ہوگا۔

    برطانوی شہزادے اور امریکی اداکارہ کا یہ جوڑا 19 مئی کو شادی کے بندھن میں بندھ جائے گا۔

    شاہی خاندان کے بارے میں مزید مضامین پڑھیں

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • شاہی جوڑے کی شادی میں تحائف کے بجائے عطیات دینے کی اپیل

    شاہی جوڑے کی شادی میں تحائف کے بجائے عطیات دینے کی اپیل

    لندن: برطانوی شاہی خاندان کے نئے جوڑے شہزادہ ہیری اور ان کی منگیتر میگھن مرکل نے اپیل کی ہے کہ جو افراد ان کی شادی پر انہیں تحائف دینا چاہتے ہیں، وہ تحائف کے بجائے اس رقم کو فلاحی مقاصد کے لیے عطیہ کردیں۔

    برطانوی ولی عہد شہزادہ چارلس کے چھوٹے صاحبزادے شہزادہ ہیری اور ان کی منگیتر امریکی اداکارہ میگھن مرکل 19 مئی کو شادی کے بندھن میں بندھنے جا رہے ہیں۔

    ایسے میں شہزادہ ہیری کے دفتر کی جانب سے بیان جاری کیا گیا ہے کہ ان کی شادی میں تحائف بھجوانے کی خواہش رکھنے والے افراد وہی رقم فلاحی منصوبے میں بطور عطیہ دے دیں۔ ’یہ سخاوت بہت سے لوگوں کو فائدہ پہنچائے گی‘۔

    شہزادے اور ان کی منگیتر نے اس سلسلے میں 7 فلاحی ادارے بھی منتخب کیے ہیں جن سے وہ دنوں منسلک ہیں اور وہ چاہتے ہیں کہ لوگ انہیں عطیات دیں۔

    یاد رہے کہ برطانوی شہزداے ہیری نے امریکی اداکارہ میگھن مرکل سے گذشتہ برس منگنی کی تھی۔ شہزادہ ہیری سے ملاقات سے قبل میگھن پہلے بھی فلاحی کاموں سے منسلک رہ چکی ہیں۔

    شہزادہ ہیری بھی اپنی والدہ اور بھائی کی طرح فلاحی سرگرمیوں میں بڑھ چڑھ کر حصہ لیتے ہیں۔ ان کی والدہ لیڈی ڈیانا، بھائی شہزادہ ولیم اور ان کی اہلیہ کیٹ مڈلٹن بھی بے شمار فلاحی منصوبوں سے منسلک رہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • برطانوی شاہی خاندان کی نئی رکن میگھن مرکل کون ہیں؟

    برطانوی شاہی خاندان کی نئی رکن میگھن مرکل کون ہیں؟

    لندن: گزشتہ روز برطانوی شاہی خاندان نے ولی عہد شہزادہ چارلس اور شہزادی ڈیانا کے چھوٹے بیٹے شہزادہ ہیری کی امریکی اداکارہ میگھن مرکل کے ساتھ منگنی کا باقاعدہ اعلان کردیا جس کے بعد بہت سے لوگ جاننا چاہتے ہیں کہ برطانوی شاہی خاندان میں بہت جلد شمولیت اختیار کرنے والی میگھن مرکل آخر ہیں کون؟

    مشہور امریکی اداکارہ میگھن مرکل 4 اگست سنہ 1981 میں امریکی شہر لاس اینجلس میں پیدا ہوئیں۔ ان کا تعلق ایک دولت مند گھرانے سے ہے۔

    مرکل نے سنہ 2002 سے اداکاری کا آغاز کیا۔ آپ کے لیے یہ جاننا دلچسپی سے خالی نہیں ہوگا کہ اداکاری میں اپنا کیریئر مضبوط کرنے کے دوران وہ گزر اوقات کے لیے شادی کے دعوت ناموں پر خوبصورت لکھائی، اور اسکول کے بچوں کو یہ لکھائی سکھایا کرتی تھیں۔

    اس دوران انہوں نے کئی امریکی ڈرامہ سیریز میں کام کیا تاہم انہیں اصل شہرت ڈرامہ سیریز ’سوٹس‘ میں ریچل زین نامی کردار اداکرنے کے بعد ملی۔

    بعد ازاں انہوں نے ہالی ووڈ کی کئی فلموں میں بھی اداکاری کے جوہر دکھائے۔ ان کی آخری فلم اینٹی ۔ سوشل تھی جو سنہ 2015 میں ریلیز ہوئی۔

    ستمبر 2011 میں انہوں نے ایک فلم پروڈیوسر ٹریور اینجلسن سے شادی کی لیکن یہ شادی زیادہ عرصے نہ چل سکی اور 2 سال بعد طلاق پر منتج ہوئی۔

    یاد رہے کہ سنہ 1937 میں بھی شاہی خاندان کے ایک اور بادشاہ ایڈورڈ سوئم نے ایک امریکی طلاق یافتہ خاتون ویلس سمپسن سے شادی کی تھی جس کے بعد قومی بحران پیدا ہوگیا اور بادشاہ کو تخت سے دستبرداری اختیاری کرنی پڑی۔

    اب 80 برس بعد جب برطانوی میڈیا نے اسی معاملے کو دوبارہ اٹھا کر مرکل پر تنقید شروع کی تو شہزادہ ہیری کی جانب سے سخت ردعمل دیکھنے میں آیا جس کے بعد میڈیا نے مرکل پر تنقید کی روش چھوڑ دی۔

    مزے کی بات یہ ہے کہ مرکل کے سابق شوہر فی الحال ایک ٹی وی شو بنا رہے ہیں جو ایک شخص اور اس کی سابق بیوی کے درمیان قانونی جنگ سے متعلق ہے جو اپنی دوسری شادی شاہی خاندان میں کر چکی ہے۔

    اداکارہ ہونے کے ساتھ ساتھ مرکل سماجی کارکن بھی ہیں۔ وہ ورلڈ وژن کینیڈا کی سفیر کی حیثیت سے افریقہ میں صاف پانی کی فراہمی پر کام کر رہی ہیں جبکہ اقوام متحدہ کے اجلاس میں شریک ہو کر خواتین کے حقوق کے لیے بھی گفتگو کر چکی ہیں۔

    سنہ 2016 میں مرکل اور شہزادہ ہیری کی ملاقات ہوئی جس کے بعد یہ تعلق آہستہ آہستہ محبت تک جا پہنچا۔

    شاہی خاندان کا کہنا ہے کہ شہزادہ ہیری اور میگھن مرکل اگلے برس موسم بہار میں ازدواجی بندھن میں بندھ جائیں گے۔

    شاہی خاندان میں شمولیت کے باوجود میگھن مرکل بادشاہت کے امیدواروں میں شامل نہیں ہوں گی کیونکہ ولی عہد شہزادہ چارلس کے بعد ان کے بڑے بیٹے شہزادہ ولیم، اور ان کے بعد ان کے بیٹے ننھے شہزادہ جارج تخت کے دعوے دار ہوں گے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • لندن : شہزادہ ہیری کی امریکی اداکارہ میگھن مرکل سے منگنی

    لندن : شہزادہ ہیری کی امریکی اداکارہ میگھن مرکل سے منگنی

    لندن : برطانوی شہزادے ہیری نے امریکی اداکارہ میگھن مارکل سے منگنی کرلی، آئندہ سال یہ جوڑا شادی کے بندھن میں بندھ جائے گا۔

    تفصیلات کے مطابق برطانیہ کے شہزادے اور لیڈی ڈیانا کے چھوٹے صاحبزادے پرنس ہیری نے امریکی اداکارہ میگھن مرکل سے منگنی کرلی۔ شاہی خاندان نے منگنی کی تصدیق کردی ہے اور اگلے سال شادی کا اعلان کردیا۔

    شہزادہ ہیری نے اپنی دلہن کیلئے کسی شہزادی کو نہیں چنا بلکہ بڑے بھائی کی طرح ایک عام سی اداکارہ کو اپنا شریک سفر بنانے کا اعلان کردیا۔

    پرنس ہیری اور ان کی منگیتر ایک ساتھ شاہی محل سے باہر آئے، ملکہ برطانیہ نے پرنس ہیری اور میگھن کو مبارکباد دیتے ہوئے نیک خواہشات کا اظہارکیا۔

    اس سے قبل پرنس ہیری کے بڑے بھائی پرنس ولیم نے بھی ایک عام سی لڑکی کیٹ مڈلٹن کواپنی شریک حیات بنا کر شاہی محل کی زینت بنایا تھا۔

    شاہی خاندان کی جانب سے اپنے آفیشل ٹوئٹر اکاؤنٹ پر پرنس ہیری اورمیگھن مرکل کی منگنی کا اعلان کرتے ہوئے کہا گیا کہ دونوں کی شادی دوہزاراٹھارہ کے موسم بہارمیں ہوگی۔

    برطانوی میڈیا کے مطابق شہزادہ ہیری کی عمر32سال ہے جبکہ ان کی منگیترامریکی اداکارہ میگھن مرکل ان سے چار سال بڑی ہیں، یہ دونوں آپس میں گہرے دوست بھی ہیں۔

    یاد رہے کہ دونوں شہزادوں کی والدہ لیڈی ڈیانا بھی کسی سلطنت کی شہزادی نہ تھیں۔

  • ننھی بچی شہزادہ ہیری کے پاپ کارن چراتی پکڑی گئی

    ننھی بچی شہزادہ ہیری کے پاپ کارن چراتی پکڑی گئی

    ٹورنٹو: شاہی خاندان کے کسی فرد کی اشیا کو چرانا اول تو نہایت حوصلے والا کام ہے، اور اگر کوئی حوصلہ مند یہ کام کر بھی دکھائے تو اسے سخت سزا کا سامنا بھی کرنا پڑسکتا ہے۔ لیکن برطانوی شہزادہ ہیری کی اشیا چرانے والا چور اتنا معصوم تھا کہ شہزادہ ہیری خود بھی ہنس پڑے۔

    کینیڈا کے شہر ٹورنٹو میں والی بال میچ کے دوران شہزادہ ہیری اپنے دوست سے باتوں میں مصروف تھے۔ برابر میں اپنی والدہ کی گود میں بیٹھی ایملی ان کے پاپ کارن کھاتی رہی۔

    دو سالہ ایملی شہزادہ ہیری کے دوست کی بیٹی ہے جو افغان جنگ میں ان کے ساتھ تھے۔ ایملی کے والد جنگ کے دوران دونوں ٹانگوں سے محروم ہوگئے تھے۔

    بہرحال میچ کے دوران ایملی شہزادہ ہیری کے پاپ کارن مزے سے کھاتی رہی۔

    کافی دیر تک تو شہزادہ ہیری کو احساس ہی نہ ہوا، بالآخر جب انہوں نے ایملی کو پاپ کارن کھاتے رنگے ہاتھوں پکڑ لیا تو وہ خود بھی ہنس پڑے۔

    اس کے بعد دونوں ایک دوسرے کو خوب تنگ کرتے ہوئے پاپ کارن کھاتے رہے اور میچ دیکھتے رہے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • برطانوی شاہی خاندان کے رنگ برنگے سوئٹر

    برطانوی شاہی خاندان کے رنگ برنگے سوئٹر

    لندن: برطانیہ کا شاہی خاندان یوں تو اپنے خوبصورت ملبوسات اور پروقار فیشن کے باعث بے حد مشہور ہے، لیکن حال ہی میں شاہی خاندان کی ایسی تصویر منظر عام پر آئی جس میں پورا خاندان نہایت عجیب و غریب شوخ رنگوں والے سوئٹر پہنے نظر آرہا ہے، جسے دیکھ کر پوری دنیا حیران و پریشان رہ گئی۔

    چند روز قبل منظر عام پر آنے والی اس تصویر نے پوری دنیا میں شاہی خاندان کے مداحوں کو پریشان کردیا کہ آخر ان لوگوں کے فیشن سینس کو کیا ہوگیا۔

    royal-2

    تصویر میں ملکہ الزبتھ، ان کے شوہر شہزادہ فلپ، ولی عہد شہزادہ چارلس، ان کی اہلیہ کمیلا پارکر، جبکہ شہزادہ چارلس کے دونوں بچے شہزادہ ہیری، شہزادہ ولیم اور ولیم کی اہلیہ شہزادی کیٹ مڈلٹن موجود ہیں۔

    تاہم جلد ہی حقیقت منظر عام پر آگئی۔ تصویر میں موجود افراد دراصل خود شاہی خاندان کے نہیں بلکہ ان کے مومی مجسمے ہیں جو یہ عجیب و غریب سوئٹر پہنے لندن کے مادام تساؤ میوزیم میں نصب ہیں۔

    میوزیم کی انتظامیہ نے کرسمس کی مناسبت سے شاہی خاندان کی اجازت سے ہی ان کے مجسموں کو یہ شوخ رنگوں والے مگر کسی قدر بے تکے سوئٹر پہنائے۔

    royal-3

    royal-4

    یہ قدم دراصل برطانیہ میں بچوں کے لیے کام کرنے والی تنظیم کی مہم کرسمس جمپر ڈے کے لیے اٹھایا گیا جس کے تحت بچوں کی بہبود کے لیے عطیات جمع کیے جاتے ہیں۔

    ان رنگا رنگ سوئٹرز کا مقصد دنیا بھر کو متوجہ کر کے انہیں بچوں کی فلاح و بہبود کے لیے عطیات دینے پر زور دینا ہے۔

    واضح رہے کہ برطانیہ کا شاہی خاندان فلاحی کاموں میں ویسے بھی پیچھے نہیں۔ شہزادی کیٹ مڈلٹن برطانیہ میں دماغی امراض کی آگاہی اور شہزادہ ہیری ایڈز کے خلاف شعور پھیلانے کے لیے مختلف اداروں اور مہمات کا حصہ ہیں۔

  • ناچتا گاتا شاہی خاندان

    ناچتا گاتا شاہی خاندان

    برطانیہ کے لوگ اپنی تہذیب اور رکھ رکھاؤ کے باعث مشہور ہیں۔ خصوصاً اگر بات شاہی خاندان کی ہو تو ان کی تہذیب کا کسی سے کوئی مقابلہ نہیں۔

    لیکن اگر آپ سمجھتے ہیں کہ شاہی خاندان روایات اور تہذیب کے دائرے میں اس قدر جکڑا ہوا ہے کہ وہ زندگی سے لطف اندوز نہیں ہوتا، تو آپ غلط ہیں۔ شاہی خاندان کے افراد دنیا کے جس خطے میں بھی جاتے ہیں وہ وہاں کی تہذیب و روایات کا عکس ضرور اپناتے ہیں۔

    وہ کہیں جا کر وہاں کے روایتی لباس بھی زیب تن کرتے ہیں، وہاں کا ثقافتی رقص بھی کرتے ہیں، اور وہاں کے مقامی کھانے بھی کھاتے ہیں۔

    ہم نے برطانوی شاہی خاندان کی کچھ ایسی ہی تصاویر اکٹھی کی ہیں جن میں وہ ناچتے گاتے اور زندگی سے لطف اٹھاتے نظر آرہے ہیں۔ ان تصاویر میں ہر شخص شاہی آداب کے مطابق اپنے مخصوص لباس میں ہے لیکن یہ لباس بھی انہیں ناچنے سے نہیں روک سکے۔

    1

    ملکہ الزبتھ اور شہزادہ فلپ ۔ نومبر 1967، مالٹا

    2

    شہزادہ چارلس ۔ نمبر 2012، نیوزی لینڈ

    3

    شہزادہ ہیری ۔ جون 2014، چلی

    4

    شہزادہ ولیم اور کیٹ مڈلٹن ۔ 2012، براعظم اوشنیا کے ملک توالو میں

    5

    ملکہ الزبتھ اور ایئر مارشل سر جان بالدوین ۔ نومبر 1954، لندن

    6

    شہزادی ڈیانا اور امریکی اداکار جان ٹروولٹا ۔ نومبر 1985، وائٹ ہاؤس امریکا

    7

    شہزادہ چارلس ۔ مارچ 2009، برزایل

    8

    ولیم اور ہیری، لیسوتھو کے ولی عہد کے ساتھ ۔ جون 2010

    9

    شہزادہ چارلس کی اہلیہ کمیلا پارکر ۔ نومبر 2012، نیوزی لینڈ

    10

    شہزادہ چارلس ۔ فروری 2000، گھانا

    11

    شہزادہ ولیم ایک تقریب  کے دوران، پس منظر میں ان کی اہلیہ خوشگوار موڈ میں ۔ دسمبر 2011، لندن

    13

    ملکہ الزبتھ اور گھانا کے صدر ۔ 1961

    15

    شہزادہ چارلس اور شہزادی ڈیانا ۔ مارچ 1983، آسٹریلیا

    16

    شہزادہ چارلس ۔ نومبر 2014، میکسیکو