لاہور : وزیراعلیٰ پنجاب عثمان بزدار کا کہنا ہے شہید ونگ کمانڈر نعمان اکرم شہادت کا مقام لیکرتاریخ میں امر ہوگئے، قوم شہید کی لازوال قربانی کو سلام پیش کرتی ہے۔
تفصیلات کے مطابق وزیراعلیٰ پنجاب عثمان بزدار شہید ونگ کمانڈر نعمان اکرم کی رہائشگاہ پہنچے اور اہلخانہ سے اظہار تعزیت کرتے ہوئے شہید نعمان اکرم کےدرجات کی بلندی کیلئے دعائےمغفرت اور فاتحہ خوانی کی۔
وزیراعلیٰ پنجاب نے شہید ونگ کمانڈر نعمان اکرم کی عظیم قربانی کوخراج عقیدت پیش کرتے ہوئے کہا ہمارا ایمان ہے کہ شہید ہمیشہ زندہ رہتے ہیں، شہید ونگ کمانڈر نعمان اکرم دھرتی کے بہادر اور دلیر سپوت تھے۔
عثمان بزدار کا کہنا تھا کہ شہید ونگ کمانڈر نعمان اکرم شہادت کا مقام لیکرتاریخ میں امر ہوگئے، قوم شہید کی لازوال قربانی کو سلام پیش کرتی ہے۔
مزید پڑھیں : طیارہ حادثہ ، شہیدونگ کمانڈرنعمان اکرم مکمل فوجی اعزاز کے ساتھ سپردخاک
گذشتہ روز اسلام آباد میں طیارہ حادثے میں جام شہادت نوش کرنے والے ایف 16 کے پائلٹ ونگ کمانڈر نعمان اکرم شہید کو پی اے ایف قبرستان لاہور کینٹ میں سپرد خاک کیا گیا تھا۔
قبل ازیں پی اے ایف ائربیس میں نماز جنازہ اداکی گئی، جس میں گورنر پنجاب چودھری محمد سرور سمیت اعلیٰ فوجی اور سول افسران نے شرکت کی جبکہ شہید ونگ کمانڈر کی نماز جنازہ ان کی رہائش گاہ عسکری ٹین کے اے بلاک کی مسجد میں مولانا طارق جمیل نے پڑھائی تھی ، جس میں مقامی لوگوں اور عسکری افسران نے بھی شرکت کی تھی۔
یاد رہے اسلام آباد میں شکرپڑیاں کے قریب پاک فضائیہ کا لڑاکا طیارہ ایف -16گر کر تباہ ہوگیا تھا ، پاک فضائیہ کا لڑاکا طیارہ ایف – 16 یوم پاکستان کی ریہرسل کے دوران گر کر تباہ ہوا، حادثے میں ونگ کمانڈر نعمان اکرم شہید ہوگئے تھے۔
