Tag: شہید پولیس اہلکار

کراچی: سندھ پولیس نے اپنے ملازمین کے لیے رعایتی فیسوں پر تعلیم کے لیے معروف تعلیمی اداروں کے ساتھ معاہدہ کر لیا۔

تفصیلات کے مطابق سندھ پولیس نے شہید اہل کاروں اور حاضر سروس ملازمین کے بچوں کے لیے اہم قدم اٹھا لیا، محکمے نے بہترین تعلیمی اداروں میں مفت اور رعایتی فیسوں پر تعلیم کے معاہدے کر لیے۔

ترجمان پولیس کا کہنا ہے کہ بچوں کو معروف اسکولوں، کالجز اور جامعات میں تعلیم کے مواقع ملیں گے، ماہانہ فیسوں میں 50 فی صد تک رعایت بھی دی جائے گی۔

سندھ پولیس کے ترجمان نے بتایا کہ تعلیمی اداروں کے ساتھ مفاہمتی یادداشت پر دستخط کیے گئے ہیں، مفاہمتی یادداشت پر دستخط کی تقریب سینٹرل پولیس آفس میں منعقد کی گئی۔

ترجمان کا کہنا تھا کہ معروف اسکولوں کے مالکان اور نمائندگان نے تقریب میں شرکت کی، اے آئی جی ویلفیئر سندھ کی جانب سے مفاہمتی یاداشت پر دستخط کیے گئے۔

یہ بھی پڑھیں:  کراچی سمیت مختلف علاقوں میں بارشوں کی پیشگوئی

ترجمان کے مطابق تمام اسکولوں میں شہید پولیس اہل کاروں کے بچوں کا کوٹہ مختص کیا گیا ہے، معاہدے کے تحت مفت اور رعایتی فیسوں پر تعلیم دی جائے گی، پرائیویٹ اسکول شہید پولیس اہل کاروں کے 200 بچوں کو مفت تعلیم دیں گے جب کہ حاضر سروس ملازمین کے 200 بچوں کو 50 فی صد رعایتی فیس پر داخلہ ملے گا۔

آئی جی سندھ ڈاکٹر سید کلیم امام نے کہا کہ ہمیں اپنے بچوں کو اچھی اور معیاری تعلیم دینی ہوگی تاکہ وہ ملک اور معاشرے کی ترقی و خوش حالی کا سبب بنیں۔