شیخوپورہ (29 جولائی 2025) : پاسپورٹ آفس کے باہر شہریوں کو لوٹنے والا ایجنٹ مافیا بے نقاب ہو گیا، جعلساز ایجنٹس لوگوں کو تیز رفتار اور آسان پاسپورٹ کی جھوٹی یقین دہانی کرا کے بھاری رقوم وصول کر رہے تھے۔

تفصیلات کے مطابق وفاقی تحقیقاتی ادارے (ایف آئی اے) نے شیخوپورہ میں پاسپورٹ آفس پر کامیاب کارروائی کرتے ہوئے بدعنوانی میں ملوث ایک منظم نیٹ ورک کو بے نقاب کر دیا ہے۔

ترجمان ایف آئی اے نے بتایا کہ چھاپے کے دوران دفتر کے باہر غیرقانونی طور پر کام کرنے والے 8 ایجنٹس کو گرفتار کیا گیا ہے، جو شہریوں سے بھاری رقوم لے کر پاسپورٹ کے عمل کو "فوری اور آسان” بنانے کا جھانسہ دے رہے تھے۔

کارروائی کے دوران پاسپورٹ آفس کے دو سیکیورٹی گارڈز کو بھی حراست میں لے لیا گیا ہے، جن پر ایجنٹوں کو دفتر میں داخلے اور غیر قانونی سرگرمیوں میں معاونت فراہم کرنے کا الزام ہے۔

مزید پڑھیں : پاکستانی پاسپورٹ میں بڑی تبدیلی! پرانے پاسپورٹ رکھنے والے کیا کریں؟

ایف آئی اے حکام کے مطابق، پاسپورٹ آفس میں ایجنٹوں کے داخلے پر پہلے ہی پابندی عائد تھی، اس کے باوجود ایک منظم نیٹ ورک عرصہ دراز سے خفیہ طور پر سرگرم تھا۔

حکام نے شہریوں کو متنبہ کیا ہے کہ وہ ایجنٹوں سے پاسپورٹ کے سلسلے میں کسی بھی قسم کا لین دین نہ کریں اور سرکاری طریقہ کار پر عمل کرتے ہوئے خود رجوع کریں۔

ایف آئی اے کا کہنا ہے کہ مزید تفتیش جاری ہے اور کرپشن میں ملوث تمام افراد کو قانون کے کٹہرے میں لایا جائے گا۔

شیخوپورہ : پاور ڈویژن شیخوپورہ نے معمر خاتون سے بدتمیزی اور ناروا سلوک پر سخت اقدامات کرتے ہوئے سیکورٹی گارڈ کو فورا معطل کردیا۔

تفصیلات کے مطابق شیخوپورہ میں لیسکو گارڈ کی معمر خاتون سے بے توقیری کے واقعے پر پاور ڈویژن کا سخت ردعمل سامنے آیا۔

پاور ڈویژن نے شیخوپورہ سرکل میں لیسکو گارڈ کو فوری طور پر معطل کردیا ، ترجمان نے بتایا کہ سیکورٹی گارڈ کے خلاف ایف آئی آر درج ہوچکی ہے ، سیکورٹی گارڈ اس وقت پولیس کی تحویل میں ہے، قانون شکنی اور عوام کی تذلیل کسی صورت برداشت نہیں کی جائے گی۔

ترجمان کا کہنا تھا کہ تمام ڈسکوز کو فوری اقدامات اور ہدایات تمام دفاتر کو جاری کرنے کے احکامات جاری کردیئے گئے ہیں اور سیکورٹی گارڈ کو نوکری سے برخاست کرنے کیلیے محکمانہ کاروائی کا آغاز کردیا ہے۔

مزید پڑھیں : بجلی کا بل ٹھیک کروانے آئی خاتون کو گارڈ نے گھسیٹ کر باہر نکال دیا

ترجمان کے مطابق تین دن کے اندر انکواری رپورٹ مکمل کرنے کے احکامات جاری ہوئے ہیں، بجلی کے صارفین ہمارے لئے انتہائی معزز ہیں پاور ڈویژن اس انفرادی عمل پر معمر خاتون اور دیگر صارفین سے معذرت خواہ ہے۔

گذشتہ روز واپڈا کمپلیکس شیخوپورہ میں بزرگ خاتون سے انسانیت سوزواقعہ پیش آیا تھا ، جہاں بجلی بل ٹھیک کرانے آئی بزرگ خاتون سے سیکیورٹی گارڈ نے نارواسلوک کیا تھا۔

بزرگ خاتون سیکیورٹی گارڈ کی منت سماجت کرتی رہی لیکن سیکیورٹی گارڈ نے بزرگ خاتون کو گھسیٹ کر گیٹ سے باہرنکال دیا تھا۔

بزرگ خاتون سے انسانیت سوز سلوک کی ویڈیو سوشل میڈیا پر وائرل ہونے پر ایس سی او واپڈا نے نوٹس لیتے ہوئے انکوائری کا حکم دیا اور کہا تھا کہ کسی کے ساتھ ناروا سلوک قبول نہیں۔

شیخوپورہ : غیر ملکی فوڈ چین کے آؤٹ لیٹ پر فائرنگ سے ایک شخص جاں حق ہوگیا تاہم حملہ آور فرار ہے۔

تفصیلات کے مطابق پاکستان میں غیرملکی فوڈ چین پر حملوں کا سلسلہ جاری ہے، پنجاب کے شہر شیخوپورہ میں غیر ملکی فوڈ چین کے آؤٹ لیٹ پر نامعلوم موٹرسائیکل سوار نے فائرنگ کردی ، جس کے نتیجے میں ایک شخص جاں حق ہوگیا۔

ڈی پی او بلال ظفر شیخ نے موٹر سائیکل سوار حملہ آور فائرنگ کر کے فرار ہوگیا، فائرنگ کی اطلاع ملنے پر پولیس کی بھاری نفری موقع پر پہنچ گئی،واقعہ کی تفتیش کی جارہی ہے۔

مزید پڑھیں : غیر ملکی فوڈ آؤٹ لیٹس پر حملہ کرنے والوں کے خلاف ریاست ایکشن میں آ گئی

گذشتہ روز راولپنڈی میں غیر ملکی ریسٹورنٹ پر نامعلوم افراد نے حملہ کرکے توڑ پھوڑ کی تھی تاہم حملہ کرنے والے 4 ملزمان کی شناخت ہو گئی اور 2 کو گرفتار کر لیا گیا۔

پولیس حکام کا کہنا تھا گرفتار ملزمان میں مرکزی ملزم کو گجرا چوک سے گرفتار کیا گیا، جسے کینٹ تھانے منتقل کر دیا گیا ہے۔

یاد رہے اس سے قبل کراچی ، لاہور ، لاڑکانہ اور میرپور خاص میں بھی غیرملکی فوڈ چین پر مشتعل افراد نے حملہ کرکے توڑپھوڑ کی تھی۔

شیخوپورہ : مہندی کی تقریب میں مہمانوں کے لیے تکے تیار کرنے میں تاخیر پر گولیاں چل گئیں، جس کے نتیجے میں کیٹرنگ کا مالک جاں بحق ہوگیا۔

تفصیلات کے مطابق شیخوپورہ میں مہندی کی تقریب میں مہمانوں کے لیے تکے تیار کرنے میں تاخیر پر اہلخانہ نے فائرنگ کردی۔

مسلح افرادکی فائرنگ سے کیٹرنگ کامالک سلیم ناصرجاں بحق ہوگیا، مہمانوں کو تکہ فراہمی میں تاخیر پر فائرنگ کاواقعہ میانہ ٹھٹھہ میں پیش آیا۔

فائرنگ کرنے والے ملزمان فرار ہوگئے تاہم بھکھی پولیس نےلاش تحویل میں لے لیا۔

پولیس نے ملزمان ضیغم عباس، خرم عباس، عباس ورک، فیصل ورک سمیت 8 ملزمان کے خلاف مقدمہ کرلیا ہے۔

مدعی مقدمے نے پولیس کو بتایا کہ شرقپور روڈ پر باربی کیو کی دکان ہے، ضیغم عباس نامی شخص نے نواں کھوہ گاؤں میں شادی کی تقریب میں باربی کیو بنوانے کے لیے ان کی خدمات حاصل کی تھیں۔

مدعی کے مطابق آرڈر ملنے پر مقررہ تاریخ پر منگل کی شب شادی کے مہمانوں کے لیے باربی کیو بنانے گئے اور تمام مہمانوں کو باربی کیو پیش کر دیا، جب ہم سامان سمیٹ کر واپسی کی تیاری کر رہے تھے، تو اس دوران کچھ مہمان تاخیر سے آئے۔

مدعی مقدمے کا کہنا تھا کہ جس پر ضیغم عباس نامی شخص نے نئے مہمانوں کے لیے فریش باربی کیو بنانے کا کہا ، جس پر ہم دوبارہ اباربی کیو بنانے کی تیاری کرنے لگے، تاہم اس دوران ضیغم عباس سخت غصہ ہوگیا، اور الزام لگایا کہ ہم باربی کیو بنانے میں تاخیر کر رہے ہیں، اس دوران اس نے ہم پر فائرنگ کردی۔

شیخوپورہ : شوہر کی جانب سے طلاق کی دھمکی کے بعد خاتون نے اپنے دو بچوں کو زہر دیکر مار ڈالا اور خود بھی زہر پی لیا۔

تفصیلات کے مطابق شیخوپورہ تھانہ ہاؤسنگ کالونی کے علاقے میں انسانیت سوز واقعہ پیش آیا ، جہاں سگی ماں نے دو بچوں کو زہر دیکر مار ڈالا۔

خاتون نے بچوں کومار کر خودکشی کرنے کی کوشش کی، گھریلو جھگڑے پر خاتون ام حبیبہ نے اپنے دو بچوں کو زہر دے کر مارا۔

پولیس نے بتایا کہ مرنے والوں میں چار سالہ محمد ڈوگر اور اڑھائی سالہ ثمر ڈوگر شامل ہیں ، خاتون نے بچوں کو مارنے کے بعد خود بھی زہر پی لیا تاہم خاتون ام حبیبہ کو ڈسٹرکٹ ہیڈ کوارٹر اسپتال منتقل کر دیا گیا ہے، جہاں ام حبیبہ موت و حیات کی کشمکش میں مبتلا ہے۔

خاتون زمیندار قیصر سلطان ڈوگر کی اہلیہ ہے، خاوند قیصر سلطان ڈوگر نے دوسری شادی رچانے کے لیے ام حبیبہ کو طلاق کی دھمکی دی تھی۔

مزید پڑھیں : نوابشاہ : سنگ دل ماں نے 2 بچوں کا گلا کاٹ کر قتل کر ڈالا

یاد رہے سندھ کے شہر نوابشاہ میں سنگ دل ماں نے اپنے دو بچوں کا گلا کاٹ کر انہیں بے دردی سے قتل کردیا تھا اور پولیس کے سامنے اعتراف جرم بھی کیا کہ میں نے ہی اپنے دونوں بچوں کے گلے کاٹے۔

ابتدائی تفتیش میں ملزمہ کومل شیخ کا اپنے بیان میں کہنا تھا کہ الگ الگ کمروں میں چھری سے بچوں کے گلے کاٹے، جب اس سے اس واردت کی وجہ پوچھی گئی کہ اس نے اپنےبچوں کے گلے کیوں کاٹے ؟ جس پر ملزمہ خاموش رہی اور کوئی جواب نہ دیا

شیخوپورہ : گھر میں داماد نے ہتھوڑے کے وار سے سسر کو قتل کردیا جبکہ حملے میں بیوی، سالی اور ساس زخمی ہوگئے۔

تفصیلات کے مطابق شیخوپورہ میں ماچھی کےاسٹاپ کے قریب گھر میں داماد نے ہتھوڑے کے وار سے سسر کو قتل کردیا۔

پولیس نے بتایا کہ ملزم نے ہتھوڑے کے وار سے اپنی بیوی ،سالی اور ساس کو بھی زخمی کیا۔.

پولیس نے کارروائی کرتے ہوئے ملزم کوواردات کےایک گھنٹے کے اندر گرفتارکرلیا اور مزیدتفتیش جاری ہے۔

گذشتہ ماہ صوبہ پنجاب کے شہر صادق آباد کے اولڈ کالونی ماچھی گوٹھ میں ایسا ہی ایک افسوسناک واقعہ پیش آیا تھا، جہاں داماد نے سسر کو قتل کردیا تھا۔

پولیس کا اس حوالے سے کہنا تھا کہ ملزم نے سسرال جا کر سسر، اپنی اہلیہ اور سالی پر تشدد کیا، ملزم اپنی روٹھی ہوئی بیوی کو منانے آیا تھا، بیوی نہیں مانی کو طیش میں آگیا۔

اس سے قبل بھی لاہور میں ایک واقعہ پیش آیا تھا، جہاں اکبری منڈی کے علاقے میں داماد نے فائرنگ کر کے سسر 55 سالہ شعبان کو قتل اور ساس شبانہ کو زخمی کردیا تھا۔

شیخوپورہ : کزن کو قتل کرکے انگوٹھا کاٹ کر رقم نکلوانے والے سفاک ملزم کو گرفتار کرلیا گیا، یاسین کو فیصل آباد سے شیخوپورہ بلاکرقتل کیا گیا۔

تفصیلات کے مطابق شیخوپورہ میں کزن کو قتل کرکے انگوٹھا کاٹ کر اے ٹی ایم سے رقم نکلوانے والے سفاک ملزم کو ساتھیوں سمیت گرفتار کرلیا گیا۔

ڈی پی او بلال ظفر شیخ نے کہا کہ پولیس نے چند گھنٹوں میں ہی ملزمان کوگرفتارکرلیا، نوجوان کو گولی مار کر قتل کرنے کے بعد انگوٹھا کاٹا گیا تھا۔

بلال ظفر شیخ کا کہنا تھا کہ مقتول کی بوری بندلاش نہرمیں کارسےملی تھی، مقتول یاسین والدین کااکلوتابیٹاتھا۔

ڈی پی او نے بتایا کہ واقعہ تھانہ ہاؤسنگ کالونی پولیس کی حدود میں پیش آیا، ملزمان نے یاسین نامی نوجوان کو فیصل آباد سے بلا کر قتل کیا۔

انھوں نے کہا کہ قتل کے بعد ملزمان نے مقتول کا انگوٹھا استعمال کرکے 10 لاکھ رقم نکلوالی تھی، ملزمان نے اکاؤنٹ سے مزید رقم نکلوانے کیلئے انگوٹھا اپنے پاس رکھا ہوا تھا۔