شیخوپورہ : پنجاب پولیس نے شیخوپورہ میں کارروائی کرتے ہوئے دو مبینہ دہشت گردوں کو گرفتار کرلیا۔
پولیس ذرائع کے مطابق دونوں مبینہ دہشتگردوں کو فاروق آباد صدر کے علاقے سے حراست میں لیا گیا، گرفتار ہونیوالوں میں ایک بنوں کا رہائشی ظفر اللہ اور مقامی شخص عثمان شامل ہے۔
ملزمان کے قبضے سے بارودی مواد، ڈیٹونیٹر اور دیگر ڈیوائسز بھی برآمد ہوئیں ہیں، ملزمان سے مزید تفتیش کی جارہی ہے۔
شیخوپورہ : پولیس نے زمیندار کے ڈیرے پر چھاپہ مار کر زنجیروں سے جکڑے چار کمسن بچے بازیاب کروا لیے، ایک ملزم گرفتار، مقدمہ درج کر لیا گیا۔تفصیلات کے مطابق بہالی کے شیخوپورہ میں زمیندار کے ڈیرے پر پولیس چھاپے کے دوران بازیاب ہونے والے بچوں کی عمریں بارہ سے سولہ سال کے درمیان ہیں۔
جن کا تعلق بھلوال، فیصل آباد اور نارنگ منڈی سے ہے۔ بچوں کو لاہور داتا دربار اور مینار پاکستان سے 21 جون کو مزدور ی کے بہانے اغواء کیا گیا تھا ۔ پولیس نے بازیاب ہونے والے بچے والدین جبکہ گرفتار ملزم علی شیر کو تین روزہ جسمانی ریمانڈ پر پولیس کے حوالے کر دیا۔
شیخوپورہ : مسلم لیگ نون کے رکن پنجاب اسمبلی خرم گلفام سروسز اسپتال میں تیرہ دن تک کومے میں رہنے کے بعد انتقال کر گئے۔چونتیس سالہ خرم گلفام گردن میں گلٹی کے معمولی آپریشن کیلئے سروسز اسپتال میں داخل ہوئے تھے، جہاں نو جولائی کو ان کا آپریشن کیا گیا تھا۔ آپریشن کے بعد خرم گلفام کو جب کمرے میں منتقل کیا گیا تو انہوں نے سر میں درد کی شکایت کی اور کومے میں چلے گئے تھے۔
خرم گلفام کو تیرہ دن تک وینٹی لیٹر پر رکھا گیا۔ وزیراعلٰی شہباز شریف نے علاج میں غفلت کی تحقیقات کیلئے میڈیکل بورڈ تشکیل دیا تھا ، جس نے رپورٹ دی کہ آپریشن کامیاب ہوا تھا، کومے میں جانے کا آپریشن سے کوئی تعلق نہیں تھا۔ خرم گلفام پی پی ایک سو باسٹھ شیخوپورہ سے دوسری بار رکن پنجاب اسمبلی منتخب ہوئے تھے
