Tag: شیخ رشید

لاہور: وفاقی وزیر ریلوے شیخ رشید کا کہنا ہے کہ مجھے اپنی جیب سے بھی پیسہ لگانا پڑا تو لگاؤں گا ریلوے ٹھیک کروں گا، 4 ہزار کنٹریکٹ ملازمین سے متعلق درمیانی راستہ نکالیں گے۔

تفصیلات کے مطابق وفاقی وزیر ریلوے شیخ رشید کا کہنا تھا کہ ریلوے ہیڈ کوارٹر میں ہم نے ڈپٹی ڈی ایس لگانے کا فیصلہ کیا ہے، 4 ہزار کنٹریکٹ ملازمین سے متعلق درمیانی راستہ نکالیں گے۔ تمام یونین عمران خان اور ان کی پالیسی کے ساتھ کھڑی ہے۔

شیخ رشید نے کہا کہ 12 سال پہلے میں ریلوے کے مزدوروں کو ایک گریڈ دے کر گیا تھا۔ کچھ نہیں چھپاؤں گا جو بھی معاملات ہوں گے سامنے لاؤں گا، مسافروں کا کوئی مسئلہ نہیں، اصل مسئلہ فریٹ کا ہے۔

انہوں نے کہا کہ ای سی سی میں پیر کے دن وزارت ریلوے سے متعلق بریفنگ دیں گے۔ ریلوے کی اربوں کی جائیداد ہے۔ نیب کو لاہور سے پہلا کیس شالیمار سے متعلق بھیج رہے ہیں۔ خواجہ سعد رفیق کے خلاف کسی قسم کی انکوائری کی ہدایت نہیں کی۔

وزیر ریلوے کا کہنا تھا کہ ریلوے بھی اپنے پاؤں پر کھڑی ہوسکتی ہے قرضے بھی اتر سکتے ہیں۔ جو لوگ ریلوے میں کنٹریکٹ پر ہیں مہربانی کر کے خود چلے جائیں۔

انہوں نے کہا کہ تحریک انصاف کے نوجوان آئی ٹی کے ماہرین بڑی حمایت میں آئے ہیں، کراچی میں وائی فائی اور ٹریکر کی سہولت فراہم کر رہے ہیں۔ آسٹریلیا سے بھی تحریک انصاف کے نوجوان نے آ کر ہمیں جوائن کیا ہے۔

انہوں نے کہا کہ تحریک انصاف کے نوجوان مفت میں کام کرنے کے لیے آگے آئے ہیں۔ ایک ویب سائٹ لانچ کر رہے ہیں جس میں آئیڈیاز لیں گے۔ ویب سائٹ کے ذریعے پیغام دیں گے ہمیں مفت میں مشورے دیں۔

ان کا کہنا تھا کہ مزدور کام کرنا چاہتا ہے، معذرت کے ساتھ کام نہیں ہو رہا۔ کوچز کے مسائل کو ٹھیک کریں گے۔ 152 لوکو موٹیو میں 78 کو ٹارگٹ کر کے ٹریکر لگا رہے ہیں۔

شیخ رشید نے کہا کہ مجھے اپنی جیب سے بھی پیسہ لگانا پڑا تو لگاؤں گا ریلوے ٹھیک کروں گا، ایسے ٹریکر لگائے جائیں گے جو سامان کا وزن تک بتائیں گے۔ ہدایت کی ہے جتنا لوڈ لے جایا جا سکتا ہے لے کر جائیں۔ پیٹرول اور ڈیزل سستا ہوا ہے اس کو عمران خان کی قسمت سمجھیں۔

انہوں نے مزید کہا کہ پرائیویٹ مارکیٹنگ افسران بھرتی کریں گے موجودہ افسران تھکے ہوئے ہیں، ریلوے کو جدید خطوط پر استوار کرنے کے لیے نوجوان آگے آئیں۔

کراچی: وفاقی وزیر ریلوے شیخ رشید کا کہنا ہے کہ 65 سال کے لوگوں کا آدھا ٹکٹ معاف کرنے کا اعلان کرتا ہوں، ضعیفوں کا سلیپر میں 25 فیصد اور عام ڈبے میں 50 فیصد کرایہ معاف ہوگا۔

تفصیلات کے مطابق وفاقی وزیر ریلوے آج کراچی پہنچے جہاں انہوں نے سٹی اسٹیشن کا دورہ کیا۔

شیخ رشید کی جی ایم ریلوے اور ڈی ایس سمیت دیگر افسران سے تعارفی ملاقات ہوئی۔ ملاقات میں ریلوے کی کارکردگی اور دیگر امور پر تبادلہ خیال اور جائزہ لیا گیا۔

بعد ازاں میڈیا سے گفتگو کرتے ہوئے شیخ رشید کا کہنا تھا کہ چاہتے ہیں 20 کروڑ عوام ریل گاڑیوں کو سفر کے لیے استعمال کریں۔ اگلی میٹنگ میں ایم کیو ایم سے بھی بات ہوگی۔

شیخ رشید نے کہا کہ 65 سال کے لوگوں کا آدھا ٹکٹ معاف کرنے کا اعلان کرتا ہوں، ضعیفوں کا سلیپر میں 25 فیصد اور عام ڈبے میں 50 فیصد کرایہ معاف ہوگا۔ 60 دن کے بعد دیکھ سکیں گے ٹرین کہاں تک پہنچ گئی۔

انہوں نے کہا کہ 3 افسران کو ہٹا دیا، دو لوگوں کو ایک ماہ کی وارننگ دے کر جا رہا ہوں۔ پیر اور منگل کا دن ریلوے کا اہم دن ہوگا۔ ریل کو خسارے سے نکال کر منافع بخش ادارہ بنانا چاہتے ہیں۔

وزیر ریلوے کا کہنا تھا کہ ریل کے 42 ارب کے ڈیفالٹ کو ختم کرنے کی کوشش کریں گے۔ ریلوے کے اسپتالوں کو پبلک پرائیویٹ پارٹنر شپ کے لیے کھول دیں گے۔ ریل کے ملازمین کے لیے سب سے زیادہ گھر کراچی میں بن سکتے ہیں، کے الیکٹرک بھی میٹر لگانے کے لیے تیار ہوگئی ہے۔

انہوں نے کہا کہ ریلوے سے متعلق اپنا پروگرام کیبنٹ میں لے کر جا رہے ہیں، گرین لائن طرز کی دو نئی ریل گاڑیاں چلائی جائیں گی۔ ریلوے ملک کی معیشت میں ریڑھ کی ہڈی ہے۔ 606 بوگیاں خراب ہیں جنہیں درست کرنے کی ضرورت ہے۔

لاہور : وفاقی وزیر ریلوے شیخ رشید نے ریلوے میں چالیس ارب روپے کا خسارہ ختم کرنے کا چیلنج قبول کرلیا اور کہا کرپٹ سابقہ حکومت نے چالیس ارب کا خسارہ جہیز میں دیا ہے، میں نہیں چاہتا جب ریلوے چھوڑوں تو میرا منہ بھی کالا ہو۔

تفصیلات کے مطابق لاہور میں وفاقی وزیر ریلوے شیخ رشید نے میڈیا سے گفتگو کرتے ہوئے کہا کہ عوام سہولت سے ٹرین کا سفر چاہتے ہیں، ریلوے میں کسی سے انتقام نہیں لیا جائے گا، کراچی والوں سے امید ہے فریٹ دگنا کریں گے۔

شیخ رشید کا کہنا تھا کہ آدھا ریلوےنیب زدہ ہے، بھارت نے جس کمپنی سے خریداری کی ہم نے اسی سے دگنی قیمت پر کی، ہمیں جہیز میں37سے 40ارب کا خسارہ ملا ہے، بتایا گیا ریلوے میں سب اچھا ہے لیکن حقیقت کچھ اور ہے۔

وفاقی وزیر ریلوے نے کہا کہ ریلوے کی پٹری بھی کرائے پر دینے کے لئے تیارہیں، جہاں سڑک نہیں وہاں بھی ٹرین لے جانا چاہتا ہوں، نجی کمپنیاں ہم سے شراکت داری میں اسٹیشن ،فوڈ اسٹریٹ بنائیں، جو بھی چیز بنائی جائے گی وہ ریلوے کی ہی ملکیت رہے گی۔

ان کا کہنا تھا ریلوے کی سب سے پہلے پشاورسے لاہورڈبل ٹریک بناؤں گا، زمینوں پر کالونیوں کا معاملہ کابینہ میں لے جائیں گے، ریلوے ریسٹ ہاؤسز فروخت کے لئے دستیاب ہیں، جو نئی ٹرین چلائیں گے، اس پر 10 فیصد رعایت ہوگی۔

شیخ رشید نے کہا کرپشن پر زیرو ٹالرنس ہوگی، ریلوے کے جو لوگ نیب کو مطلوب ہوں گے، وہ سرنڈر کریں گے، وعدہ کرتا ہوں ریلوے ٹھیک ہوگی، میری ذمےداری ہے، 18گھنٹے کام کروں گا،قوم سے وعدہ کیا ہے۔

31ان کا کہنا تھا کہ 31 اسٹیشن اپ گریڈ کرنے جارہے ہیں، گریڈ 4کے 5ہزار ملازمین کے لئے اپارٹمنٹس بنائیں گے، ہمارے پاس زمین دستیاب ہے، پیسہ نہیں ہے۔

وفاقی وزیر ریلوے نے کہا جو ٹرین منافع بخش ہوگی وہی بحال ہوسکےگی، کراچی سے سکھر،راولپنڈی سے لاہور اور میانوالی کی ٹرینیں چاہتےہیں، لوکو موٹو فریٹ ٹرینوں کے ہیں،مسافر ٹرینوں کے نہیں۔

شیخ رشید کا کہنا تھا کہ میں نہیں چاہتا جب ریلوے چھوڑوں تو میرا منہ بھی کالا ہو، ریلوے کو نعرہ دیا ہے، آرام حرام ہے، قبضے والے موجودہ پرائس پر جگہ خریدنا چاہیں تو معاملہ کابینہ جاسکتا ہے۔

انھوں نے مزید کہا ریلوے پولیس میں 10ہزار اہلکار نہیں چاہئیں، میں کسی کو نہیں ہٹارہا،کام کرنے دیں، میری اپنی2 بلٹ پروف گاڑیاں ہیں، محکمے کو واپس کردوں گا، جو رعایت میں نے دی ہے، دنیا میں مرنے کے بعد بھی کوئی نہیں دے سکے گا۔