رحیم یار خان: پنجاب کے شہر رحیم یار خان میں شیخ زید ایئر پورٹ سے متعلق اہم نوٹم جاری کیا گیا ہے۔
تفصیلات کے مطابق پاکستان ایئر پورٹ اتھارٹی کی جانب سے جاری ایک نوٹم میں کہا گیا ہے کہ رحیم یار خان ایئر پورٹ 10 مئی 2025 صبح 6:00 بجے سے 17 مئی رات 11:59 بجے تک رن وے کے مرمتی کام کے باعث پروازوں کے لیے دستیاب نہیں ہے۔
یاد رہے کہ شیخ زید انٹرنیشنل ایئر پورٹ پر بھارت نے بزدلانہ حملہ کر دیا تھا، جس کے نتیجے میں شیخ زید انٹرنیشنل ایئر پورٹ کو نقصان پہنچا تھا، بھارت نے اپنے بزدلانہ حملے میں پاکستان اور متحدہ عرب امارات کی دوستی کی علامت کو نشانہ بنایا۔
فلائٹ شیڈول شدید متاثر، ملک بھر کی آج بھی 150 پروازیں منسوخ
یہ ایئر پورٹ 1993 میں تعمیر کیا گیا تھا اور اس کا نام شیخ زید بن سلطان النہیان کے نام پر رکھا گیا تھا، بھارت کی جانب سے گزشتہ روز ننکانہ صاحب کو بھی نشانہ بنانے کی کوشش کی گئی تھی۔
واضح رہے کہ ملک میں پاک بھارت کشیدگی اور سیز فائر کے بعد بھی فلائٹ شیڈول شدید متاثر ہے، ملک بھر کی آج بھی 150 پروازیں منسوخ کی گئیں۔ ملک میں درجنوں پروازیں غیر یقینی صورت حال کا شکار ہیں، اتوار کو کراچی ایئرپورٹ کی 45، لاہور کی 38، اسلام اباد کی 40 پروازیں منسوخ کی گئیں۔
ملتان کی 10، پشاور کی 11 اور سیالکوٹ کی 6 پروازیں آپریشنل وجوہ کی بنا پر منسوخ کی گئیں، منسوخ کی گئی پروازوں میں 138 بین الاقوامی پروازیں بھی شامل ہیں۔
