اسلام آباد: وزیرِ اعظم عمران خان سے بحرین کے نیشنل گارڈ کمانڈر لیفٹیننٹ جنرل شیخ محمد بن عیسیٰ نے ملاقات کی ہے۔
تفصیلات کے مطابق بحرین کے نیشنل گارڈ کمانڈر لیفٹیننٹ جنرل شیخ محمد بن عیسیٰ نے وزیر اعظم عمران خان سے ملاقات کی جس میں باہمی دل چسپی کے امور اور خطے کی صورت حال پر گفتگو کی گئی۔
شیخ محمد بن عیسیٰ نے وزیرِ اعظم بحرین کی جانب سے عمران خان کو دورے کی دعوت دے دی جسے وزیرِ اعظم نے قبول کر لیا۔ وزیرِ اعظم عمران خان نے بھی بحرین کے وزیر اعظم کو دورۂ پاکستان کی دعوت دی۔
وزیرِ اعظم عمران خان نے بحرین کے ساتھ دو طرفہ خصوصاً دفاعی تعلقات پر اطمینان کا اظہار کیا اور کہا کہ پاکستان بحرین کے ساتھ برادرانہ تعلقات کو بہت اہمیت دیتا ہے۔
یہ بھی پڑھیں: آرمی چیف سے بحرین نیشنل گارڈ کے کمانڈر کی ملاقات
وزیرِ اعظم نے کہا کہ ہم بحرین کے ساتھ تمام شعبوں میں تعاون بڑھانا چاہتے ہیں۔
خیال رہے کہ اس سے قبل بحرین کے نیشنل گارڈ کمانڈر نے آرمی چیف جنرل قمر جاوید باجوہ سے بھی ملاقات کی، جس میں باہمی و پیشہ ورانہ دل چسپی کے امور سمیت علاقائی سیکورٹی پر تبادلہ خیال کیا گیا۔
