Tag: صادق سنجرانی

اسلام آباد: کروناوائرس کے پیش نظر چیئرمین سینیٹ صادق سنجرانی نے یورپی ملک چیک ری پبلک کی سینیٹ کے سربراہ کو خط لکھا جس میں پاکستان کی جانب سے مدد کی پیش کش کی گئی۔

تفصیلات کے مطابق چیئرمین سینیٹ کی جانب سے لکھے گئے خط میں کرونا سے ہلاکتوں پر پاکستان کی پارلیمنٹ کی جانب سے دکھ اور افسوس کا اظہار کیا گیا۔

چیئرمین سینیٹ کی پاکستان کی جانب سے ہر قسم کی معاونت کی پیش کش کی گئی۔ خط کے متن کے مطابق چیک ری پبلک میں کروناوائرس سے والی ہلاکتوں پر دل گرفتہ ہوں۔

کروناوائرس: پاکستان کی جانب سے امریکا کو ہر قسم کی معاونت کی پیشکش

ان کا مزید کہنا تھا کہ دکھ کی اس گھڑی میں میری نیک تمنائیں آپ کے ساتھ ہیں۔

قبل ازیں چیئرمین سینیٹ محمد صادق سنجرانی نے امریکی صدر ڈونلڈ ٹرمپ اور امریکی سینیٹ کے سربراہ کو خط لکھا تھا جس میں کروناوائرس کے تناظر میں پاکستان کی جانب سے ہرممکن مدد کی پیشکش کی گئی تھی۔

اسی طرح بیلجیم، ہالینڈ، فرانس، ترکی، عمان، چین، جرمنی اور اسپین کو خط لکھے جاچکے ہیں۔

اسلام آباد: چیئرمین سینیٹ صادق سنجرانی نے وزیرپارلیمانی امور سے آٹے اور چینی کے بحران پر انکوائری رپورٹ مانگ لی۔

تفصیلات کے مطابق وفاقی دارالحکومت اسلام آباد میں چیئرمین سینیٹ صادق سنجرانی کی زیر صدارت اجلاس ہوا جس میں مسلم لیگ ن کے سینیٹر راجہ ظفر الحق نے کہا کہ ہم نے ناقابل برداشت مہنگائی پر بحث کی ریکوزیشن دی۔

اپوزیشن لیڈر راجہ ظفر الحق نے آٹے اور چینی کے بحران پر ایف آئی اے رپورٹ ایوان میں پیش کرنے کا مطالبہ کرتے ہوئے کہا کہ اگر معاملے پر بحث ہوتی ہے تو پہلےانکوائری رپورٹ دی جائے۔

راجہ ظفر الحق نے کہا کہ سنا ہے ایف آئی اے کی رپورٹ آگئی، مہنگائی پر بحث سے قبل انکوائری رپورٹ منگوائی جائے۔ انہوں نے کہا کہ حکومت اپوزیشن کو دبانے کی کوشش کر رہی ہے۔

چیئرمین سینیٹ صادق سنجرانی نے وزیرپارلیمانی امور سے پیر تک آٹے اور چینی کے بحران پر انکوائری رپورٹ مانگ لی۔ چیئرمین سینیٹ نے آٹے اور چینی بحران پر ہاؤس کمیٹی کی رپورٹ بھی طلب کر لی۔

وزیراعظم کو آٹا بحران سے متعلق رپورٹ بھجوا دی گئی

یاد رہے کہ گزشتہ ماہ وزیراعظم عمران خان کو آٹا بحران سے متعلق رپورٹ بھجوائی گئی تھی جس میں بتایا گیا تھا کہ آٹا بحران باقاعدہ ایک منصوبہ بندی کے تحت پیدا کیا گیا۔

اسلام آباد: سینیٹ کا پارلیمانی سال مکمل نہ ہونے کا خدشہ ہے، پارلیمانی سال میں مطلوبہ تعداد میں اجلاس نہیں ہو سکے ہیں۔

تفصیلات کے مطابق چیئرمین سینیٹ صادق سنجرانی نے سینیٹ کے اجلاس بلانے کے لیے حکومت کو تیسری بار یاد دہانی خط لکھ دیا ہے، انھوں نے خط میں لکھا کہ آئینی تقاضا پورا کرنے کے لیے سینیٹ اجلاس بلایا جائے۔

وزارت پارلیمانی امور کو خط میں صادق سنجرانی نے لکھا کہ آئین کے مطابق مزید 54 روز اجلاس بلانا ضروری ہے، فوری اجلاس نہ بلایا گیا تو آئینی تقاضا پورا کرنے میں ناکام رہیں گے، آئینی خلاف ورزی سے بچنے کے لیے اجلاس 54 روز جاری رکھنا ضروری ہے۔

خط کے متن کے مطابق رواں سال 10 ماہ میں سینیٹ کے صرف 56 روز اجلاس منعقد کیے جا سکے ہیں۔

یاد رہے کہ رواں سال چیئرمین سینیٹ صادق سنجرانی کو تحریک عدم اعتماد کا بھی سامنا رہا، عید الفطر کے بعد اپوزیشن کی جانب سے صادق سنجرانی کے خلاف تحریک عدم اعتماد لانے کا اعلان کیا گیا تھا، جس کے بعد حکومتی ارکان نے بھی ڈپٹی چیئرمین سلیم مانڈوی والا کے خلاف تحریک عدم اعتماد کا اعلان کیا۔

یکم اگست کو چیئرمین سینیٹ صادق سنجرانی کے خلاف تحریک عدم اعتماد ناکام ہو گئی، تحریک کے حق میں ارکانِ سینیٹ کو کھڑے ہونے کی ہدایت کی گئی جس پر 64 ارکان نے کھڑے ہو کر تحریک کی حمایت کی تھی، تاہم قرارداد کے حق میں خفیہ رائے شماری میں صرف 50 ووٹ پڑے اور مطلوبہ ایک چوتھائی ووٹ نہ ملنے کے سبب قرار داد مسترد کر دی گئی۔

اسلام آباد: چیئرمین سینیٹ صادق سنجرانی نے کہا ہے کہ سری لنکن کرکٹ ٹیم کا دورہ پاکستان مثبت اقدام ہے، پاکستان کھیلوں کے لیے محفوظ ملک ہے۔

تفصیلات کے مطابق چیئرمین سینیٹ صادق سنجرانی نے میڈیا سے گفتگو کرتے ہوئے کہا کہ پاکستان مین ٹیسٹ کرکٹ کی بحالی کوششوں سے ممکن ہوئی ہے، امید ہے سری لنکن یادگار یادیں لے کر واپس جائیں گے۔

صادق سنجرانی نے کہا کہ کرکٹ ڈپلومیسی تعلقات میں بہتری کے لیے اہم ذریعہ ہے، شائقین کرکٹ کو ایک بار پھر اچھے میچز دیکھنے کو ملیں گے۔

چیئرمین سینیٹ نے مزید کہا کہ امید ہے دوسرے ممالک کی ٹیمیں بھی جلد پاکستان کا دورہ کریں گی۔

مزید پڑھیں: سری لنکن کرکٹ ٹیم پاکستان پہنچ گئی

واضح رہے کہ سری لنکن ٹیم دو ٹیسٹ میچز کی سیریز کھیلنے کے لیے پاکستان پہنچ گئی ہے، اسلام آباد ایئرپورٹ پر پاکستان کرکٹ بورڈ حکام نے مہمان ٹیم کا استقبال کیا تھا۔

راولپنڈی میں ٹیسٹ میچز کی سیریز کا پہلا میچ 11 سے 15 دسمبر تک کھیلا جائے گا، دونوں ٹیمیں منگل کو پریکٹس میچ کھیلیں گی، پریکٹس میچ کے بعد دونوں ٹیموں کے کپتان پریس کانفرنس کریں گے۔

راولپنڈی کرکٹ اسٹیڈیم میں سیکیورٹی کے تمام انتظامات پاک فوج کے سپرد کیے گئے ہیں، شایقین کرکٹ کے لیے اسلام آباد کے مختلف مقامات پر ٹکٹس دستیابی کی سہولت فراہم کی گئی ہے۔

اسلام آباد: چیئرمین سینیٹ صادق سنجرانی نے کہا کہ خطے میں امن سے ہی ترقی کا خواب شرمندہ تعبیر ہوگا، امن کا فروغ خطے میں اقتصادی تعاون کے لیے نئی راہیں کھولے گا۔

تفصیلات کے مطابق چیئرمین سینیٹ صادق سنجرانی نے عمان کے قومی دن کی تقریب میں شرکت کی۔ انہوں نے عمان کے سفیر کو مبارکباد دی۔

چیئرمین سینیٹ نے کہا کہ عمان کے قومی دن کی تقریب میں شرکت پرخوشی ہوئی، پاکستان، عمان تاریخی، مذہبی، ثقافتی مماثلتوں میں جڑے ہیں، پاکستان،عمان میں مثالی تعاون ایک دوسرے پر اعتماد ظاہر کرتا ہے۔ انہوں نے کہا کہ پاکستان عمان سے دوطرفہ تعلق کو قدر کی نگاہ سے دیکھتا ہے۔

صادق سنجرانی نے کہا کہ خطے میں امن سے ہی ترقی کا خواب شرمندہ تعبیر ہوگا، امن کا فروغ خطے میں اقتصادی تعاون کے لیے نئی راہیں کھولے گا۔

عالمی برادری کشمیر، فلسطین کے مسائل کے حل کے لیے کردار ادا کرے، چیئرمین سینیٹ

یاد رہے کہ دو روز قبل چیئرمین سینیٹ صادق سنجرانی کا کہنا تھا کہ عالمی برادری فلسطین، مقبوضہ کشمیر میں مظالم سے بری الذمہ نہیں ہوسکتی، عالمی دنیا کشمیر، فلسطین کے مسائل کے حل کے لیے کردار ادا کرے۔

چیئرمین سینیٹ کا مزید کہنا تھا کہ پاکستان کا فلسطین کے معاملے پر مؤقف واضح ہے، فلسطین کےعوام کی سیاسی، سفارتی، اخلاقی مدد جاری رکھیں گے۔

اسلام آباد: چیئرمین سینیٹ صادق سنجرانی کا کہنا ہے کہ عالمی برادری فلسطین، مقبوضہ کشمیر میں مظالم سے بری الذمہ نہیں ہوسکتی، عالمی دنیا کشمیر، فلسطین کے مسائل کے حل کے لیے کردار ادا کرے۔

تفصیلات کے مطابق وفاقی دارالحکومت اسلام آباد میں چیئرمین سینیٹ صادق سنجرانی سے ہالینڈ کے سفیر نے ملاقات کے دوران باہمی دلچسپی کے امور پر گفتگو کی۔

چیئرمین سینیٹ نے کہا کہ پاکستان اور ہالینڈ میں دیرینہ،دوستانہ تعلقات ہیں، پارلیمانی تعلقات مربوط بنا کر معاشی روابط کو فروغ دیا جا سکتا ہے، باہمی تجارت کے فروغ کے لیے مشترکہ لائحہ عمل مرتب کریں۔

صادق سنجرانی نے کہا کہ پارلیمان اقتصادی تعاون کے فروغ کے لیے معاونت کو تیار ہے، پارلیمانی وفود کے تبادلوں میں اضافہ ضروری ہے انہوں نے کہا کہ مقبوضہ کشمیرمیں انسانی حقوق کی خلاف ورزیاں دنیا کی توجہ کی منتظرہیں، عالمی برادری بھارتی جارحیت کے خلاف آواز اٹھانے میں کردار ادا کرے۔

اس موقع پر ہالینڈ کے سفیر نے کہا کہ معاشی تعاون سے دیگر شعبوں میں روابط مربوط بنانے میں مدد ملے گی، تصفیہ طلب مسائل کا پر امن حل چاہتے ہیں۔

بعدازاں چیئرمین سینیٹ صادق سنجرانی سے فلسطین کے سفیر نے ملاقات کی اور باہمی دلچسپی کے امور پر تبادلہ خیال کیا۔ اس موقع پر چیئرمین سینیٹ نے کہا کہ پاکستان کا فلسطین کے معاملے پر مؤقف واضح ہے، فلسطین کےعوام کی سیاسی، سفارتی، اخلاقی مدد جاری رکھیں گے۔

صداق سنجرانی نے کہا کہ عالمی دنیا فلسطین، مقبوضہ کشمیر میں مظالم سے بری الذمہ نہیں ہوسکتی، عالمی دنیا کشمیر، فلسطین کے مسائل کے حل کے لیے کردار ادا کرے۔

فلسطینی سفیر نے کہا کہ مقبوضہ کشمیر اور فلسطین کے مسئلے پر پاکستان کا کردار ہمیشہ مثالی رہا، مقبوضہ کشمیر اور فلسطین کے مسئلےکے حل کے لیے عالمی کاوشیں ناکافی ہیں۔ انہوں نے کہا کہ پاکستان کے دیرینہ مؤقف، معاونت پر فلسطینی قوم شکر گزار ہے۔

اسلام آباد: اپوزیشن کی ریکوزیشن پر چیئرمین صادق سنجرانی کی زیرصدارت سینیٹ کا اجلاس آج ہوگا جس میں ملک کی موجودہ سیاسی صورت حال زیربحث آئے گی۔

تفصیلات کے مطابق وفاقی دارالحکومت اسلام آباد میں اپوزیشن کی ریکوزیشن پر سینیٹ کا اجلاس آج ہوگا۔ اجلاس کی صدارت چیئرمین سینیٹ صادق سنجرانی کریں گے۔

اجلاس میں ملک کی موجودہ سیاسی صورتحال زیربحث آئے گی، جے یو آئی مارچ سے پیدا شدہ صورت حال پرغور ہوگا۔

چیئرمین صادق سنجرانی کی زیرصدارت اجلاس میں مقبوضہ کشمیر، پی ایم ڈی سی کی تحلیل کا معاملہ بھی زیرغور آئے گا۔ اجلاس میں معاشی صورتحال، بجلی اور گیس کی قیمتوں سے متعلق بحث ہوگی۔

اجلاس سے قبل حکومت اور اپوزیشن جماعتوں نے بھی الگ الگ اجلاس طلب کیے ہیں۔ حکومتی اتحادی جماعتوں کا اجلاس سہ پہر سوا 3 بجے قائد ایوان سینیٹر شبلی فراز کی زیرصدارت پارلیمنٹ ہاؤس کمیٹی روم نمبر 4 میں ہوگا۔

اپوزیشن جماعتوں کا اجلاس قائد حزب اختلاف سینیٹر راجہ ظفرالحق کی زیرصدارت 3 بجے پارلیمنٹ ہاؤس کے کمیٹی روم نمبر 1 میں ہوگا۔ اجلاس میں سینیٹ سیشن سے متعلق مشترکہ حکمت عملی طے کی جائے گی۔

دوسری جانب وزیراعظم عمران خان نے حکومتی مذاکراتی کمیٹی کا اجلاس آج طلب کرلیا، اہم بیٹھک وزیراعظم ہاؤس میں ہوگی۔

وزیر دفاع پرویز خٹک مذاکرات پر پیشرفت سے وزیراعظم عمران خان کو آگاہ کریں گے جبکہ پرویز الہیٰ مولانا فضل الرحمان سے ملاقات پر بریفنگ دیں گے۔

اسلام آباد: قائم مقام صدر صادق سنجرانی نے لائن آف کنٹرول پر بھارتی جارحیت کی مذمت کرتے ہوئے کہا ہے کہ بھارتی فوج ایل او سی پر سیز فائر کی کھلے عام خلاف ورزی کر رہی ہے، تاہم افواج پاکستان کسی بھی جارحیت کا جواب دینا جانتے ہیں۔

تفصیلات کے مطابق گزشتہ شب بھارتی فوج نے لائن آف کنٹرول کی خلاف ورزی کرتے ہوئے شہری آبادیوں پر شدید فائرنگ کی تھی، جس کے نتیجے میں 1 فوجی جوان سمیت 6 افراد شہید ہوئے۔

قائم مقام صدر نے کہا کہ بھارتی افواج نہتے اور بے گناہ شہریوں کو شہید کر رہی ہیں، ہم شہدا کے لواحقین کے ساتھ اظہار یک جہتی کرتے ہیں، لائن آف کنٹرول پر حملہ بین الاقوامی قوانین کی خلاف ورزی ہے، تاہم پاکستان خطے میں امن کی کاوشوں کی حمایت جاری رکھے گا۔

صادق سنجرانی نے مطالبہ کیا کہ عالمی برادری مسئلہ کشمیر کے حل کے لیے اپنا کردار ادا کرے، مودی سرکار خوف کا شکار ہے، وہ خطے کے امن کو تباہ کرنے کے درپے ہے۔

تازہ ترین:  ایل او سی پر بھارتی جارحیت، پاکستان کا منہ توڑ جواب، 9 بھارتی فوجی ہلاک

واضح رہے کہ بھارتی فوج نے شاہ کوٹ، نوسیری اور جوڑا سیکٹر پر شہری آبادی کو نشانہ بنایا تھا، جس پر پاک فوج نے جوابی کارروائی کرتے ہوئے 9 بھارتی فوجی اہل کار ہلاک کر دیے۔

ڈائریکٹر جنرل آئی ایس پی آر میجر جنرل آصف غفور نے کہا کہ اس جوابی کارروائی میں دو بھارتی بنکرز تباہ اور کئی بھارتی فوجی زخمی ہوئے۔ بھارت مبینہ دہشت گرد کیمپس کا جواز بنا کر آبادی کو نشانہ بنا رہا ہے۔