اسلام آباد : صالحہ فاطمہ قتل کیس میں والد محمد واجد نے بیٹی کو میٹرو اسٹیشن پر دوپٹے سے گلہ گھونٹ کرقتل کرنے کا اعتراف کرلیا۔
تفصیلات کے مطابق ڈسٹرکٹ اینڈسیشن کورٹ اسلام آبادمیں والد کا اپنی بیٹی صالحہ فاطمہ کو قتل کرکے لاش میٹرواسٹیشن میں پھینکنے کے کیس کی سماعت ہوئی۔
کیس کے تفتیشی افسر فخرعباس کا بیان عدالت میں قلمبند کیا گیا ،جس میں تفتیشی افسر نے بتایا کہ نومبر2021کورپورٹ موصول ہونےپرزیرتعمیرمیٹرواسٹیشن جی 11 سے لڑکی کی لاش ملی، دیگرافسران کے ساتھ جائے وقوعہ سے مقتولہ کے جسم سے نمونے اکٹھے کئے اور مقتولہ کی لاش پوسٹ مارٹم کیلئے پمز اسپتال منتقل کی گئی۔
تفتیشی افسر کا کہنا تھا کہ مقتولہ صالحہ فاطمہ کی عمر 10 سے 11 سال تھی، مقتولہ کے ناخن خون اوردیگر نمونے فرانزک لیب لاہور بھجوائےگئے، چند دن بعد ملزم محمد واجد تھانے آیا، جس نے خود کو مقتولہ کا والد ظاہر کیا اور اپنے 2 بھائیوں کےہمراہ پمز میں مقتولہ کی لاش کی شناخت کی۔
آئی او نے بیان میں کہا کہ مجھے ملزم محمد واجدکے بدلتے بیانات پر شک ہوا، جس کے بعد محمد واجد کو فرانزک لیب لاہور ڈی این اے میچنگ کے لیے لے کر گئے جبکہ کال ڈیٹا ریکارڈ کے مطابق ملزم محمد واجد کے بیانات میں تضاد تھا۔
تفتیشی افسر نے مزید بتایا کہ فوٹیج کےمطابق ملزم محمدواجدبیٹی کےساتھ رات 11 بجے جی الیون کے سگنل جاتا دکھائی دیا، جس کے بعد ملزم محمد واجد نے بیٹی کو میٹرو اسٹیشن پر دوپٹے سے گلہ گھونٹ کرقتل کرنے کا اعتراف کیا اور عدالت کے سامنے بیٹی کو قتل کرنے کااعتراف جرم بھی کیا۔
بعد ازاں ڈسٹرکٹ اینڈسیشن کورٹ نے صالحہ فاطمہ قتل کیس کی سماعت 4 جولائی تک ملتوی کردی۔