Tag: صحافی مطیع اللہ جان

اسلام آباد : صحافی مطیع اللہ جان کو گرفتار کرکے مقدمہ درج کرلیا گیا، جس میں کہا ہے کہ ملزم نشے کی حالت میں پایا گیا۔

تفصیلات کے مطابق صحافی مطیع اللہ جان کو تھانہ مارگلہ پولیس نے گرفتار کر لیا اور ان کیخلاف تھانہ مارگلہ میں مقدمہ درج کیا گیا ہے۔

صحافی کیخلاف مقدمہ سرکار کی مدعیت میں درج کیا گیا، جس میں کہا ہے کہ تیر رفتار گاڑی کو روکنے کا اشارہ کیاگیا تو ڈرائیور نے ملازمین کو مارنے کی غرض سےگاڑی چڑھا دی۔

ایف آئی آر میں کہنا تھا کہ ملازمین کو تیز رفتار گاڑی کے ذریعے جان سےمارنے کی کوشش کی گئی، ملازمین کی جانب سے بیریئر پھینک کرگاڑی کوروکا گیا۔

مقدمے میں مطیع اللہ جان کو نامزد کیا گیا ہے، ملزم نشے کی حالت میں پایا گیا اور گاڑی کی سیٹ کے نیچے سے آئس برآمدکی گئی۔

صحافی کیخلاف مقدمے میں سنگین نتائج کی دفعات بھی مقدمے میں شامل کی گئیں ہیں۔

اس سے قبل صحافی کے بیٹے کاکہنا تھا میرے والدکو پمز کے باہر سے اٹھالیا گیاہے اور ان کے ساتھ اٹھائے گئے دوسرے صحافی کو چھوڑ دیا گیا تھا۔

پولیس کی جانب سے مطیع اللہ جان کی گرفتاری سے لاعلمی کا اظہار کیا گیا تھا تاہم ان کے بیٹے کا کہنا تھا کہ ان کی والدہ کے ہمراہ تھانہ مارگلہ میں والد سے ملاقات ہوئی ہے

ذرائع کا کہنا ہے صحافی کو مقدمہ نمبرسات سو پندرہ میں گرفتار کیا گیا ہے۔