واشنگٹن :امریکی صدر براک اوباما نے نارتھ کیرولینا میں تین مسلمان طلباء کے قتل کی مذمت کرتے ہوئے اسے سفاکانہ اقدام قرار دیا ہے۔
تین مسلمان طلباء کے قتل پر جاری بیان میں امریکی صدربراک اوباما کا کہنا تھا کہ کسی شخص کو بھی اس کی رنگت یا مذہب کی بنیاد پرنشانہ نہیں بنایا جا سکتا، طلبا کا قتل ظالمانہ فعل ہے۔
دوروزقبل چیپل ہل کے علاقے میں ایک شخص نے دوخواتین سمیت تین طلباء کو فائرنگ کرکے قتل کردیا تھا، مسلمان طلباء کے قتل کی سخت مذمت کرتے ہوئے ترکی کے صدر رجب طیب اردگان نے امریکی صدر سے مطالبہ کیا تھا کہ وہ اس معاملے پراپنا موقف واضح کریں۔
میڈیا رپورٹس کے مطابق قاتل نےایک روز قبل سماجی رابطے کی ویب سائٹ پر اسلام مخالف بیانات جاری کیے تھے، جس میں مسلمانوں سے نفرت کا اظہار کیا گیا تھا۔ دومسلمان طالبات اور ایک طالبعلم کے قتل کو عالمی میڈیا کی جانب سے مناسب کوریج نہ دیئے جانے پر سوشل میڈیا نے اسےتنقید کا نشانہ بنایا۔
