اسلام آباد: صدر مملکت ڈاکٹر عارف علوی نے کہا ہے کہ حکومت کان کنوں کے قاتلوں کی گرفتاری کے لیے پُر عزم ہے۔
اے آر وائی نیوز کے مطابق صدر مملکت عارف علوی نے آج ایک ٹویٹ میں کہا کہ مچھ میں 11 کان کنوں کا قتل گھناؤنا اور بزدلانہ فعل ہے، اللہ جاں بحق افراد کی مغفرت فرمائے۔
واضح رہے کہ ہفتہ اور اتوار کی درمیانی شب بلوچستان کے علاقے مچھ نامعلوم دہشت گردوں نے ڈیرے میں سوئے کان کنوں کو پہلے یرغمال بنایا، پھر ان کے ہاتھ پاؤں باندھ کر گلے کاٹ دیے۔
لیویز ذرائع کا کہنا تھا کہ واقعے کی اطلاع ملنے پر امدادی ٹیمیں فوری طور پر جائے حادثہ پہنچی تھیں، اور زخمیوں اور لاشوں کو مقامی اسپتال منتقل کیا گیا، جہاں دوران علاج بھی کئی کان کن زندگی کی بازی ہار گئے۔
The killing of 11 coal miners in Mach is a dirty & cowardly act. The state is committed to finding these heinous killers who must be flushed out, exposed from underneath every slimy stone & snake pit and punished. May the souls of the innocent who lost their lives rest in peace.
— Dr. Arif Alvi (@ArifAlvi) January 3, 2021
مرنے والے تمام افراد کا تعلق کوئٹہ سے ہے، وزیر اعلیٰ بلوچستان اور صوبائی وزیر داخلہ نے واقعے کا نوٹس لے کر متعلقہ حکام سے رپورٹ طلب کر لی۔
وزیر اعلیٰ بلوچستان جام کمال نے مچھ گیشتری کی کوئلہ فیلڈ میں رونما ہونے والے واقعےکی شدید مذمت کرتے ہوئے کہا کہ کان کنوں کو نشانہ بنانے والے کسی رعایت کے مستحق نہیں ہے، دہشت گردی میں ملوث عناصر کو کیفر کردار تک پہنچایا جائے گا۔
ترجمان صوبائی حکومت لیاقت شاہوانی نے کہا کہ بلوچستان میں امن ملک دشمنوں سے ہضم نہیں ہو رہا، واقعے کا مقصد سی پیک کے منصوبے اور صوبے کی ترقی سبوتاژ کرنا ہے۔
