Tag: صدر کراچی

کراچی: شہر قائد کے علاقے صدر میں ایک موبائل کی دکان میں سیکیورٹی گارڈ نے نہایت جواں مردی کے ساتھ 2 ڈاکوؤں کا تن تنہا دیر تک مقابلہ کیا، یہاں تک کہ ڈاکو کی گولی کھا کر گر گیا۔

تفصیلات کے مطابق آج صدر میں واقع ریکس سینٹر میں موبائل فرنچائز میں ڈکیتی کا واقعہ پیش آیا تھا، اے آر وائی نیوز نے اس واقعے کی سی سی ٹی وی فوٹیجز حاصل کر لیں، فوٹیجز میں سیکیورٹی گارڈ کی بہادری اور آخر تک جدوجہد دیکھی جا سکتی ہے، جو ایک مثال ہے۔

خوف ناک واردات کے دوران فرنچائز میں ایک خاتون اپنی چھوٹی بیٹی کے ساتھ بھی فوٹیج میں دیکھی جا سکتی ہیں، جنھوں نے خوف اور سراسیگمی کے عالم میں اپنی اور بیٹی کی جان بچانے کی کوشش میں ایک کونے میں خود کو چھپایا۔

فوٹیجز میں دیکھا جا سکتا ہے کہ شلوار قمیض میں ملبوس 2 ڈاکو کراچی کے علاقے صدر میں ریکس سینٹر میں واقع موبائل فرنچائز میں داخل ہو کر کاؤنٹر کی طرف آئے، جیسے ہی انھیں موقع ملا، ڈاکو نے بیگ سے پستول نکال لیا۔

ڈاکو کو پستول نکالتے دیکھ کر سیکیورٹی گارڈ بھی حرکت میں آ گیا، ڈاکو سیکیورٹی گارڈ کو قابو کرنے کی کوشش کرنے لگے، لیکن اس نے سخت مزاحمت کی، ایک ڈاکو نے پستول سے اس کے سر پر متعدد وار بھی کیے، معاملہ بگڑنے پر ڈاکو فرنچائز سے نکل کر بھاگنے لگے تو سیکیورٹی گارڈ نے باہر نکل کر ایک ڈاکو کو پکڑنے کی کوشش کی۔

تاہم پیچھے کھڑے سفید شلوار قمیض پہنے ڈاکو نے پستول سے اس پر گولی چلا دی، جس سے وہ زخمی ہو کر سڑک پر گیا، گولی لگنے کے 20 سیکنڈ کے بعدگارڈ خود اٹھا، قریب میں موجود لوگوں نےگارڈ کی مدد کی کوشش بھی نہیں کی، وہ فٹ پاتھ پر آ کر پھر گر گیا۔

رپورٹس کے مطابق زخمی گارڈ کو اسپتال میں طبی امداد فراہم کی جا رہی ہے، جب کہ ایک ملزم جو ایک ویڈیو میں اپنا نام عرفان بتاتا دکھائی دیتا ہے، کو پولیس نے گرفتار کر لیا ہے۔

ویڈیو میں لوگوں کا رد عمل بھی دیکھا جا سکتا ہے، ایک شخص کہتا ہے کہ اس نے ایک بندے کو گولی مار دی ہے جس کا مطلب ہے کہ اس کے اندر انسانیت ختم ہے، ایسے بندے کا علاج یہ ہے کہ اس کے سر پر پتھر مار کر اسے ختم کیا جائے۔

کراچی: دوبارہ تجاوزات لگانے پر کے ایم سی نے سخت آپریشن کرتے ہوئے رینبو سینٹر، پارکنگ پلازہ اور پریڈی اسٹریٹ پر کارروائی کے دوران ٹھیلے، پتھارے، کرسیاں اور دیگر سامان ضبط کرلیا۔

تفصیلات کے مطابق شہرِ قائد کے مصروف ترین کاروباری علاقے صدر کے مختلف مقامات پر انسدادِ تجاوزات مہم کے بعد دوبارہ تجاوزات لگنے پر کے ایم سی کو سخت ایکشن لینا پڑا۔

[bs-quote quote=”کے ایم سی کی جانب سے جگہ گھیرنے والوں کو آخری وارننگ بھی جاری کر دی گئی۔” style=”style-7″ align=”left” color=”#dd3333″][/bs-quote]

کے ایم سی کے عملے نے رینبو سینٹر، پارکنگ پلازہ اور پریڈی اسٹریٹ پر کارروائی کی، پولیس کی بھاری نفری بھی موجود رہی، دوبارہ لگنے والی تجاوزات کا خاتمہ کر دیا گیا۔

دریں اثنا آئی آئی چندریگر روڈ پر بھی گرینڈ آپریشن کیا گیا، فٹ پاتھ اور جگہ گھیر کر گرل لگانے اور پارکنگ کو مسمار کر دیا گیا، کے ایم سی کی جانب سے جگہ گھیرنے والوں کو آخری وارننگ بھی جاری کر دی گئی۔

یہ بھی پڑھیں:  کراچی: حکومت سندھ کا ایمپریس مارکیٹ کے اطراف نیا منصوبہ شروع کرنے کا فیصلہ

ڈسٹرکٹ سینٹرل میں بھی کے ایم سی اور ڈی ایم سی نے کارروائی کی، جس میں پارک کی زمین پر بنی تجاوزات کو مسمار کیا گیا، نارتھ کراچی میں صرافہ بازار سیکٹر 11 ای میں چبوترے مسمار کیے گئے۔

خیال رہے کہ آج مشیرِ اطلاعات سندھ نے کہا شہرِ قائد کے علاقے ایمپریس مارکیٹ کے اطراف جہانگیر پارک کی طرز کا نیا پارک بنایا جائے گا اور پارک کے ساتھ نئے منصوبے کے تحت چھوٹے کیبن بنائے جائیں گے۔