کراچی: پی ٹی آئی حکومت نے کراچی میں صدر کوآپریٹو مارکیٹ دوبارہ تعمیر کرا دی۔
اے آر وائی نیوز کے مطابق تحریک انصاف کے اراکین اسمبلی نے اپنے فنڈ سے تاجروں کو پھر اپنے پیروں پر کھڑا کر دیا، وزیر اعظم عمران خان کی ہدایت پر آتش زدگی سے تباہ مارکیٹ اپنی اصل حالت میں بحال کر دی گئی۔
گزشتہ برس نومبر کے مہینے میں صدر کوآپریٹو مارکیٹ میں لگنے والی آگ سے 500 دکانیں جل کر خاکستر ہو گئی تھیں، چند لمحوں میں تاجر عرش سے فرش پر آ گئے تھے، مگر پھر پی ٹی آئی حکومت نے تاجروں کی مدد کا فیصلہ کیا اور اب مختصر مدت کے دوران مارکیٹ کی تعمیر نو مکمل ہو گئی ہے۔
اے آر وائی نیوز کے مطابق صدر کوآپریٹو مارکیٹ میں ڈھائی ماہ قبل لگنی والی خوف ناک آگ کے بعد مارکیٹ تباہ شدہ دکانوں اور ان کے ملبے کا ڈھیر بن چکی تھی، تاہم وزیر اعظم عمران خان کی ہدایت پر پی ٹی آئی کراچی کے نمائندوں نے مارکیٹ کی تعمیر نو کا بیڑا اٹھایا اور ڈھائی ماہ کی مختصر مدت میں کام مکمل ہو گیا۔
تاجر برادری نے وزیر اعظم کا شکریہ ادا کیا، کوآپریٹو مارکیٹ کے تاجر کہتے ہیں کہ وزیر اعظم عمران خان نے ان سے کیا وعدہ پورا کر دیا ہے مگر اٹھارویں ترمیم کے بعد وہ سندھ حکومت کے تعاون کے بھی منتظر ہیں۔
دکانوں کے نئے شٹر، مارکیٹ میں بجلی کی نئی وائرنگ اور رنگ و روغن کے بعد کوآپریٹیو مارکیٹ پہلے سے بھی زیادہ بہتر حالت میں نظر آ رہی ہے، پی ٹی آئی کے رہنماؤں نے تاجروں کو یقین دلایا ہے کہ وفاقی حکومت ہر مشکل میں ان کے ساتھ کھڑی رہے گی۔
