نئی دہلی: بھارت میں مہاتما گاندھی کے جنم دن کے موقع پر شروع کی جانے والی صفائی مہم سے مرکزی حکومت کو ڈھائی سو کروڑ روپے حاصل ہوگئے ہیں، یہ رقم کچرے کو فروخت کر کے حاصل کی گئی ہے۔
اس صفائی مہم کے تحت سرکاری دفاتر میں موجود کچرا صاف کیا جارہا ہے اور انہیں فروخت کر کے مالی فائدہ بھی حاصل کیا جا رہا ہے۔
ایک رپورٹ کے مطابق 24 دنوں میں اس مہم کے ذریعہ مرکزی حکومت نے 252 کروڑ روپے حاصل کر لیے ہیں جو ایک بہت بڑی رقم ہے۔
گزشتہ سال بھی مہاتما گاندھی کے یومِ پیدائش پر اسی طرح کی مہم شروع ہوئی تھی، لیکن اس پوری مہم کے دوران محض 62 کروڑ روپے حاصل ہوئے تھے۔
میڈیا رپورٹس کے مطابق صفائی مہم 2.0 کے تحت سرکاری دفاتر میں بے کار پڑی سرکاری فائلوں کے ساتھ ساتھ الیکٹرانک کچرا بھی کم کیا جا رہا ہے۔ اب تک صرف سینٹرل سیکریٹریٹ میں 40 لاکھ سے زیادہ فائلوں کو ختم کیا جا چکا ہے، ان میں تقریباً 31 لاکھ ای فائلز جبکہ 8 لاکھ سے زیادہ کاغذوں والی فائلیں ہیں۔
مہم کی نگرانی ریاستی وزیر جتیندر سنگھ کر رہی ہیں۔
یہ اعداد و شمار بھی حیران کن ہیں کہ کچرا صاف ہونے سے دفاتر میں 37.19 لاکھ اسکوائر فٹ جگہ خالی ہوئی ہے جس کا استعمال الگ الگ چیزوں کے لیے کیا جا رہا ہے جیسے لائبریری یا کینٹین۔
یہ مہم 31 اکتوبر تک جاری رہے گی۔
