ARYNews.tv | Urdu – Har Lamha Bakhabar

Tag: صنعتیں

  • صنعت کار ہوشیار، ماحولیات کو نقصان پہنچانے والی صنعتوں کے خلاف اب کارروائی ہوگی

    صنعت کار ہوشیار، ماحولیات کو نقصان پہنچانے والی صنعتوں کے خلاف اب کارروائی ہوگی

    کراچی: شہر قائد میں اب ماحولیات کو نقصان پہنچانے والی صنعتوں کے خلاف کارروائی ہوگی، غیر ٹریٹ شدہ فضلے کو سیوریج میں ڈالنے والی صنعتیں سیپا قوانین کی زد میں آئیں گی۔

    ڈی جی ادارہ تحفظ ماحولیات سندھ نعیم احمد مغل نے کہا ہے کہ کراچی کی تمام تجارتی اور صنعتی انجمنوں کو گندے پانی کی صفائی کے پلانٹ کی تنصیب کا حکم نامہ جاری کیا گیا ہے، اور سیپا قوانین کا اطلاق بحیرہ عرب میں غیر ٹریٹ شدہ فضلے کے اخراج کو روکنے کے لیے کیا گیا ہے۔

    انھوں نے کہا گندہ اور صنعتی پانی سمندری ماحولیاتی نظام اور حیات کو مسلسل نقصان پہنچا رہا ہے، سندھ ماحولیاتی تحفظ ایکٹ 2014 کا سیکشن 11 تمام صنعتوں، کاروبار اور دیگر اداروں کو ہوا، پانی اور زمین کی آلودگی سے بچانے کا پابند بناتا ہے، جب کہ سیکشن 21 کے ضوابط کو نافذ کرنے اور عمل نہ کرنے والے لوگوں کے خلاف کارروائی کرنے کا اختیار دیتا ہے۔

    سیپا کے مطابق وہ صنعتیں جو ان ضوابط کی پابندی نہیں کرتیں اور ضروری صفائی کے پلانٹ نصب نہیں کرتیں، قانونی نتائج کا سامنا کریں گی۔

  • حکومت کی ناقص پالیسیاں، صنعتوں کا بھٹہ بیٹھ گیا

    حکومت کی ناقص پالیسیاں، صنعتوں کا بھٹہ بیٹھ گیا

    اسلام آباد: موجودہ حکومت کی بدلتی پالیسیز نے صنعتی ترقی کو بری طرح متاثر کیا ہے اور صنعتکاروں کے لیے صنعتیں چلانا مشکل ہوگیا ہے۔

    رواں مالی سال 23-2022 کے ابتدائی 2 ماہ میں مختلف صنعتیں شدید گھاٹے میں رہیں۔

    ٹیکسٹائل کی صنعت میں 3 فیصد، پیٹرولیم کی صنعت میں 16 فیصد اور ادویہ سازی کی صنعت میں 32 فیصد کمی آئی۔

    آٹو انڈسٹری کی پیداوار میں 19 فیصد اور مشینری کی پیداوار میں 38 فیصد کمی آئی ہے۔

    صنعتکاروں کا کہنا ہے کہ موجودہ حکومت میں گیس اور بجلی بہت مہنگی کردی گئی ہے، ٹیکسز اور مارک اپ میں اضافہ کردیا گیا ہے جبکہ قرضوں کی شرح سود بھی بڑھا دی گئی ہے۔

    ایسی صورت میں یہاں مال تیار کرنا اور ایکسپورٹ کرنا بہت مشکل ہوگیا ہے کیونکہ وہی اشیا دیگر ممالک سستے داموں فروخت کر رہے ہیں، ان حالات میں ہم باہر کی مارکیٹس سے مقابلہ نہیں کرسکتے۔

    ایک اور صنعتکار کا کہنا تھا کہ موجودہ حکومت میں ایکسپورٹ انڈسٹری تباہ ہوچکی ہے، تعمیری صنعت کا بھٹہ بیٹھ گیا، خام مال کی قیمت آج الگ ہوتی ہے چار دن بعد اس میں مزید اضافہ ہوچکا ہوتا ہے۔

    تاجروں اور صنعتکاروں کا کہنا ہے کہ اگر حکومت یہی روش اپنائے رہی تو ملکی معیشت تباہی کے گڑھے میں جا گرے گی۔

  • صنعتکاروں کو راغب کرنے کے لیے پختونخواہ حکومت کے اقدامات

    صنعتکاروں کو راغب کرنے کے لیے پختونخواہ حکومت کے اقدامات

    پشاور: خیبر پختونخواہ حکومت صنعتکاروں کو راغب کرنے کے لیے کوشاں ہے، صنعتکاروں کو رعایتی نرخوں پر بجلی کی فراہمی کے لیے اقدامات کیے جارہے ہیں۔

    تفصیلات کے مطابق ذرائع پختونخواہ حکومت کا کہنا ہے کہ صنعتکاروں کو رعایتی نرخوں پر بجلی کی فراہمی کے لیے اقدامات کیے جارہے ہیں، صنعتکاروں کو مجموعی طور پر 160 میگا واٹ بجلی رعایتی نرخوں پر دی جائے گی۔

    ذرائع کا کہنا ہے کہ بجلی مالا کنڈ تھری اور رنولیہ سمیت دیگر بجلی گھروں سے فراہم کی جائے گی، بجلی کی فراہمی سے روزگار کے بہتر مواقع دستیاب ہوں گے۔

    ذرائع کے مطابق رعایتی نرخوں پر بجلی فراہمی سے صنعتی ترقی میں بھی اضافہ ہوگا۔

    صنعتوں کو رعایتی نرخوں پر بجلی کی فراہمی صوبائی کابینہ کے اجلاس کے ایجنڈے میں شامل ہے، صوبائی کابینہ کا اجلاس وزیر اعلیٰ محمود خان کی زیر صدارت آج ہوگا۔

    خیال رہے کہ وزیر اعظم عمران خان صنعتوں کو ہر ممکن سہولت اور مراعات فراہم کرنے کی ہدایت کرچکے ہیں۔ ایک اجلاس میں انہوں نے کہا تھا کہ معیشت کا پہیہ رواں رکھنے کے لیے ہر ممکن کوشش کی جانی چاہیئے۔

    وزیر اعظم نے کہا تھا کہ سب سے زیادہ متاثرہ شعبوں کی نشاندہی کر کے بجٹ میں زیادہ مدد فراہم کی جائے۔

  • پنجاب میں تمام صنعتوں کو گیس کی فراہمی بند

    پنجاب میں تمام صنعتوں کو گیس کی فراہمی بند

    لاہور: سردیوں کی آمد کے ساتھ ہی پنجاب میں گیس کا بحران شدت اختیار کر گیا جس کے بعد تمام صنعتوں کو گیس کی فراہمی فوری طور پر بند کردی گئی۔

    تفصیلات کے مطابق صوبہ پنجاب میں گیس کا بحران شدت اختیار کر گیا۔ تمام انڈسٹریز کو گیس کی فراہمی فوری طور پر بند کردی گئی۔

    سوئی ناردرن گیس کمپنی کا شارٹ فال 115 ملین کیوبک فٹ (ایم ایم سی ایف) ہوگیا، گیس کی طلب 2 ہزار 218 ایم ایم سی ایف اور رسد 2 ہزار 103 ایم ایم سی ایف ہے۔

    حکام کا کہنا ہے کہ برآمدی صنعت کو گیس ترجیحی بنیادوں پر فراہم کی جائے گی، سی این جی اسٹیشنز کو گیس فراہمی فوری طور پر معطل کردی گئی ہے۔

    ذرائع کے مطابق گیس بندش کا فیصلہ کمپنی حکام اور وفاقی حکومت کے نمائندوں کے اجلاس میں ہوا، حکام کا مزید کہنا ہے کہ انڈسٹری کو گیس بندش کا مقصد گھریلو صارفین کو گیس پریشر بحال رکھنا ہے۔

    خیال رہے کہ گزشتہ روز سوئی گیس بحران پر وفاقی حکومت اور سوئی ناردرن گیس کمپنی حکام کا اجلاس ہوا تھا۔ اجلاس میں سوئی ناردرن گیس کمپنی نے حکومت کو گیس بحران سے آگاہ کیا۔

    اجلاس میں بتایا گیا کہ لاہور کو 310 ایم ایم سی ایف کے بجائے 270 ایم ایم سی ایف گیس مل رہی ہے، گیس فراہمی میں کمی کی وجہ سے مختلف علاقوں میں کم پریشر کی شکایات عام ہوگئی ہیں۔

  • صنعتوں میں اضافہ، درختوں میں کمی عالمی حدت کی بڑی وجہ ہے،عارف علوی

    صنعتوں میں اضافہ، درختوں میں کمی عالمی حدت کی بڑی وجہ ہے،عارف علوی

    لاہور: صدر ڈاکٹر عارف علوی نے کہا کہ صنعتوں میں اضافہ اور درختوں میں کمی عالمی حدت کی بڑی وجہ ہے، بچوں ، نوجوان نسل کو عالمی حدت کے منفی اثرات سے آگاہ کرنا ہوگا۔

    تفصیلات کے مطابق لاہور میں کانفرنس سے خطاب کرتے ہوئے صدر ڈاکٹر عارف علوی نے کہا کہ انسانی شخصیت مختلف جذبات کا مجموعہ ہے، انفرادی شخصیت کی طرح قوموں کا اجتماعی شعور بھی ہوتا ہے۔

    صدر مملکت نے کہا کہ جس معاشرے میں ذہنی دباؤ، گھٹن، نفرت ہوگی اس کا اظہار قومی سطح پر بھی ہوگا، جو افراد امن پر یقین رکھتے ہیں ان کی اجتماعی سوچ بھی امن کی داعی ہوگی۔

    ڈاکٹر عارف علوی نے کہا کہ معاشرے میں مساوات کو فروغ دے کر ذہنی دباؤ،گھٹن کم کی جاسکتی ہے، عدم مساوات افراد، معاشروں میں کئی مسائل کی وجہ بنتا ہے۔

    انہوں نے کہا کہ عالمی حدت میں اضافہ موجودہ دور کا بڑا چیلنج بن کر سامنے آئے گا، بچوں، نوجوان نسل کو عالمی حدت کے منفی اثرات سے آگاہ کرنا ہوگا، صنعتوں میں اضافہ، درختوں میں کمی عالمی حدت کی بڑی وجہ ہے۔

    صدر مملکت نے کانفرنس سے خطاب کرتے ہوئے کہا کہ نوجوان نسل پاکستانی ثقافت کی دنیا بھر میں سفیر ہے، 2008 زلزلے کے بعد نوجوانوں نے امدادی کاموں میں کردار ادا کیا۔ انہوں نے مزید کہا کہ معاشرے کی خرابیوں کی بجائے مثبت پہلوؤں کو اجاگر کرنے کی ضرورت ہے۔

  • صنعت کاروں کوصنعتیں لگانے کے لیے سہولتیں دیں گے‘ عثمان بزدار

    صنعت کاروں کوصنعتیں لگانے کے لیے سہولتیں دیں گے‘ عثمان بزدار

    لاہور: وزیراعلیٰ پنجاب سردار عثمان بزدار نے کہا کہ ہم صنعت کار دوست ماحول کو پروان چڑھائیں گے۔

    تفصیلات کے مطابق وزیراعلیٰ آفس میں صنعت کاروں کے وفد سے گفتگو کرتے ہوئے سردار عثمان بزدار نے کہا کہ صنعتی سیکٹرکے لیے اسپیشل اکنامک زونزکے قیام کا فیصلہ کیا۔

    وزیراعلیٰ پنجاب نے کہا کہ پرانی انڈسٹریل اسٹیٹس کو بھی ڈویلپ کیا جائے گا، صنعت کاروں کو صنعتیں لگانے کے لیے سہولتیں دیں گے۔

    سردار عثمان بزدار نے کہا کہ نئی صنعتیں لگانے کے لیے فائل کسی جگہ رکے گی نہیں، حکومت چھوٹی صنعتوں کے ا قدامات کررہی ہے۔

    انہوں نے مزید کہا کہ صنعتی شعبے میں کسی ریڈٹیپ ازم کوحائل نہیں ہونے دیا جائے گا۔

    سابق ادوارمیں‌ ترقی کے نام پرجنوبی پنجاب کے ساتھ دھوکا دیا گیا، عثمان بزدار

    یاد رہے کہ گزشتہ ماہ وزیر اعلیٰ پنجاب عثمان بزدار کا کہنا تھا کہ ہماری حکومت عمل پر یقین رکھتی ہے، سابق دور میں خوشحالی اور ترقی کے نام پر دھوکا دیا گیا۔

    سردار عثمان بزدار کا کہنا تھا کہ ڈرامے بازیوں کا دور گزرچکا ہے ماضی میں حکومتوں نے جنوبی پنجاب کے عوام کے ساتھ سوتیلی ماں جیسا سلوک روا رکھا، سابق دور حکومت میں ترقی اور خوشحالی کے نام پر دھوکا کیا گیا۔

  • اسلام آباد: صنعتوں کوگیس اور بجلی فراہم کی جارہی ہے،خرم دستگیر

    اسلام آباد: صنعتوں کوگیس اور بجلی فراہم کی جارہی ہے،خرم دستگیر

    اسلام آباد: وفاقی وزیر تجارت انجینئر خرم دستگیر خان کا کہنا ہے کہ پاکستانی معیشت کا پہیہ رواں دواں رکھنے کے لیے انڈسٹری کو مکمل گیس اور بجلی فراہم کی جارہی ہے.

    تفصیلات کے مطابق وفاقی دارالحکومت اسلام آباد میں منعقد ایک تقریب سے خطاب کرتے ہوئے انہوں نے کہا کہ حکومتی کاوشوں کی بدولت ملک میں اٹھارہ،اٹھارہ گھنٹوں کی لوڈ شیڈنگ اب چارسےچھ گھنٹوں تک محدود ہو گئی ہے.

    وفاقی وزیر تجارت نے کہا کہ پاکستانی معیشت کا پہیہ رواں دواں رکھنے کے لیے انڈسٹری کو پوری گیس اور بجلی فراہم کی جارہی ہے،رمضان المبارک اور عید پر پورے ملک میں امن رہا ہے.

    انہوں نے کہا کہ پاک چین اقتصادی راہداری منصوبہ محض ایک سڑک نہیں بلکہ اس میں 75فیصد بجلی کے منصوبے شامل ہیں جن کی تکمیل سے پاکستان توانائی کے بحران سے ہمیشہ کے لیے باہر آجائے گا.

    وفاقی وزیر تجارت انجینئر خرم دستگیر خان نے کہا کہ مسائل محض تنقید اور الزامات سے نہیں بلکہ سچی نیت اور دیانتداری کے ساتھ کام کرنے سے ہی حل ہوں گے.