صومالیہ کے دارالحکومت موغادیشو میں آدن اَدی انٹر نیشنل ایئرپورٹ پر افریقی یونین کے ایک ملٹری ہیلی کاپٹر حادثے میں 5 اہلکار ہلاک اور 3 شدید زخمی ہوگئے۔
غیر ملکی ذرائع ابلاغ کے مطابق ملٹری ہیلی کاپٹر نے بالی ڈوگل ایئرفیلڈ سے پرواز بھری تھی اور لینڈنگ سے کچھ لمحے قبل انٹر نیشنل ایئرپورٹ پر کریش کرگیا۔
رپورٹس کے مطابق اس دوران زوردار دھماکے ہوئے اور شدید آگ بھڑک اُٹھی تھی۔ جس کے باعث قریبی عمارتیں بھی متاثر ہوئیں، زخمیوں میں پائلٹ، معاون پائلٹ اور ایک انجینیئر شامل ہیں۔
صومالیہ کے بدقسمت ہیلی کاپٹر میں 8 افراد موجود تھے جن میں 5 ہلاک ہوگئے جب کہ تین زخمیوں کو شدید جلنے کے زخم اور دیگر چوٹیں آئیں، جنہیں فوری طور پر اسپتال منتقل کر دیا گیا۔
صومالی فوج کے ترجمان کے مطابق حادثے کے باعث ہیلی کاپٹر میں موجود گولہ بارود پھٹ گیا تاہم یہ واضح نہیں کیا کہ گولہ بارود کس قسم کا اور کتنا تھا۔
اس سے قبل بھارتی شہر دھرادون سے کیدارناتھ جانے والا ہیلی کاپٹر گر کر تباہ ہوگیا تھا حادثے میں 7 افراد ہلاک ہوگئے تھے۔
بھارتی میڈیا کا کہنا ہے کہ ریاست اتراکھنڈ اتراکھنڈ کے دارالحکومت دھرادون سے کیدارناتھ گپت کاشی جانے والا ہیلی کاپٹر گرکر تباہ ہوگیا، ہیلی کاپٹر میں پائلٹ سمیت 7 افراد سوار تھے جو موقع پر ہی ہلاک ہوگئے۔
سری لنکا میں فوجی ہیلی کاپٹر گر کر تباہ، 6 افسران ہلاک
بھارتی میڈیا کے مطابق ریسکیو ٹیموں نے گھنے جنگل سے ہیلی کاپٹر کا ملبہ ڈھونڈ لیا ہے، ابتدائی تحقیقات کے مطابق ہیلی کاپٹر خراب موسم کے باعث حادثے کا شکار ہوا، ہلاک ہونے والے افراد کا تعلق اتراکھنڈ، اترپردیش، مہاراشٹر اور گجرات سے تھا۔
