ڈیرہ بگٹی: بلوچستان کے ضلع ڈیرہ بگٹی میں ایف سی نے سرچ آپریشن کے دوران گیس پائپ لائن بم سے اڑانے کی کوشش ناکام بنادی، فائرنگ کے نتیجے میں ایک تخریب کار ہلاک جبکہ ایک زخمی حالت میں فرار ہوگیا۔
ایف سی ترجمان کے مطابق ڈیرہ بگٹی کے علاقے پیر کو میں گزشتہ شب سرچ آپریشن کے دوران ایف سی اہلکاروں نے دو افراد کو او جی ڈی سی ایل کی پائپ لائن پر بارودی مواد نصب کرتے ہوئے دیکھ کر ان پر فائرنگ کردی۔
فائرنگ کی زد میں آکر ایک تخریب کار موقع پر ہلاک جبکہ دوسرا زخمی حالت میں فرار ہونے میں کامیاب ہوگیا۔
ملزمان کے خودکار ہتھیار اور بارودی مواد کو قبضے میں لے لیا گیا ہے اور علاقے کی ناقہ بندی کر کے فرار ہونے والے حملہ آوروں کی تلاش کے لیے علاقے میں سرچ آپریشن شروع کردیا ہے۔