لاہور : لاہور ہائی کورٹ نے پاکستان تحریک انصاف (پی ٹی آئی) کی کارکن صنم جاوید کی سرکاری ادارے کیخلاف نامناسب زبان استعمال کرنے سے متعلق کیس میں ضمانت منظور کر لی۔
تفصیلات کے مطابق لاہور ہائی کورٹ نے و پاکستان تحریک انصاف (پی ٹی آئی) کی کارکن صنم جاوید کی سرکاری ادارے کیخلاف نامناسب زبان استعمال کرنے سے متعلق کیس میں درخواست ضمانت پر سماعت ہوئی۔
جسٹس فاروق حیدر نے سماعت کی، عدالت نے درخواست ضمانت منظور کرتے ہوئے پانچ لاکھ روپے کے ضمانتی مچلکوں پر رہا کرنے کا حکم دیا۔
یاد رہے رواں ماہ کے شروع میں وفاقی تحقیقاتی ایجنسی (ایف آئی اے) نے ریاست مخالف مواد کو پھیلانے کے الزام میں حراست میں لیا تھا۔
ایف آئی اے لاہور نے یہ مقدمہ انسدادِ الیکٹرانک کرائمز ایکٹ اور پاکستان پینل کوڈ کی متعلقہ دفعات کے تحت درج کیا تھا۔
پی ٹی آئی کارکن کی نمائندگی وکیل میاں علی اشفاق نے کی اور عدالت کے روبرو دلائل دیتے ہوئے کہا کہ درخواست گزار نے کوئی بیان یا پوسٹ نہیں کی جسے ریاست مخالف قرار دیا جا سکے، الزامات بے بنیاد اور سیاسی محرکات ہیں۔
وکیل نے عدالت سے استدعا کی کہ مجرمانہ شواہد کی کمی پر غور کیا جائے اور اس کے مؤکل کو ضمانت دی جائے، انھیں سیاسی وابستگیوں کی وجہ سے نشانہ بنایا جا رہا ہے۔
تاہم ایف آئی اے نے ضمانت کی مخالفت کرتے ہوئے کہا کہ صنم جاوید کی جانب سے اپ لوڈ کیا گیا مواد ریاست مخالف پروپیگنڈے کی تعریف میں آتا ہے اور مزید تفتیش کی ضرورت ہے۔
فریقین کے دلائل سننے کے بعد عدالت نے درخواست منظور کرتے ہوئے ضمانتی مچلکے جمع کرانے پر صنم جاوید کو رہا کرنے کا حکم دیا۔
خیال رہے پی ٹی آئی کارکن کو 9 مئی کے فسادات کے بعد پارٹی کارکنوں کے خلاف جاری کریک ڈاؤن کے درمیان حالیہ مہینوں میں متعدد قانونی چیلنجز کا سامنا کرنا پڑا ہے۔
