کراچی: مقامی عدالت نے نشوا قتل کیس میں دارالصحت اسپتال کے مالکان عامر چشتی اور علی فرحان کی درخواست ضمانت مسترد کردی، جس کے بعد ملزمان احاطہ عدالت سے فرار ہونے میں کامیاب ہوگئے۔
تفصیلات کے مطابق کراچی میں ایڈیشنل ڈسٹرکٹ اینڈ سیشن جج شرقی کی عدالت میں دارالصحت میں بچی نشوا کی ہلاکت سے متعلق کیس میں مالکان کی درخواست ضمانت پر سماعت ہوئی۔
ملزمان کے وکلاءنے عدالت میں دلائل دیتے ہوئے کہاکہ بچی کی ہلاکت کے معاملے میں انتظامیہ کا کوئی رول نہیں ہے اور ایف آئی آر میں بھی مالکان کا کہیں ذکر نہیں ہے، 161کے بیان میں بھی کسی نہیں کہا کہ چیئرمین یا وائس چیئرمین سے ملاقات ہوئی، اسٹاف کی نا اہلی کے حوالے سے بھی ایف آئی آر میں نہیں کہا گیا۔دوسرے بیان میں ایمبولینس نہ ہونے کا بیان دیا گیاہے۔
ملزمان کے وکیل نے کہاکہ اصل ایف آئی آر میں صرف یہ درج ہے کہ غلط انجکشن لگانے سے بچی کی ہلاکت ہوئی ہے، ایف آئی آر کے بعد بیانات کے ذریعے واقعے کو کہیں اور لے جانے کی کوشش کی گئی۔ تفتیشی افسر کی ذمہ داری تھی کہ کیس کو بہتر طریقے سے سامنے لاتے۔
وکیل کا کہنا تھا ضمنی چالان میں دفعہ 119 کا اضافہ کیا گیا پھر 322 دفعہ لگائی گئی، قتل خطا کا کیس تو بن سکتا تھا لیکن آئی او نے 302 کا مقدمہ بھی درج کر دیا، دونوں ملازمین جن سے یہ خطا ہوئی انہیں نکال دیا گیا ہے۔
ملزمان کے وکیل نے اپنے دلائل جاری رکھتے ہوئے کہاکہ اسپتال انتظامیہ پر الزام عائد کیا گیا کہ بغیر تجربہ کار ملازمین رکھے، اسپتال کو سیل کرنا بھی غیر مناسب رویہ تھا ۔وزیر اعلی سندھ کے حکم پر اسپتال سیل کیا گیا۔ وزیر صحت کو حکم دیا گیا کہ ڈاکٹرز کو گرفتار کیا جائے۔
وکیل نے مزید دلائل میں کہا میڈیا پریشر پر وزیر اعلی نے آئی جی سندھ کو کہا کہ جو ملتا ہے گرفتار کیا جائے ۔اس حوالے سے قائم کیے گئے کمیشن کو اپنی پاور استعمال کرنا تھی لیکن سیاسی پریشر کے باعث کیس کو تبدیل کردیا گیا۔
عدالت نے استفسار کیا کہ بچی کی حالت خراب ہونے پر آپ نے ڈسچارج کیوں نہیں کیا؟ جس پر ملزمان کے وکیل نے کہاکہ اسپتال انتظامیہ نے اس وقت کہا تھا کہ کسی اور اسپتال لے جانا چاہتے ہیں تو لے جاسکتے ہیں ۔
عدالت نے پوچھا بچی کے اہل خانہ نے اسپتال انتظامیہ سے کہا کہ آپ لکھ کر دیں غلطی ہوئی تو ہم ڈسچارج کرلیتے ہیں کیا ایسا ہی ہے؟۔ملزمان کے وکیل نے بتایا جب بچی کو لیاقت نیشنل اسپتال منتقل کیا گیا تو اسپتال انتظامیہ نے خط لکھا کہ اس بچی کے علاج معالجے کے تمام اخراجات دارالصحت اٹھائے گا ۔
بچی کے والد نے عدالت میں آبدیدہ ہوکر کہا کہ اسپتال انتظامیہ کو تمام صورتحال کا علم تھا، مجھے بچی کو دوسرے اسپتال شفٹ کرنا تھا لیکن اسپتال انتظامیہ نے مجھے بچی کی ہسٹری لکھ کر نہیں دی، اسپتال انتظامیہ نے جو غلط انجکشن لگایا اس کو لکھ کر دینے سے انکار کیا۔میری بچی تڑپ رہی تھی لیکن اسپتال کے چیئرمین نہ ہونے کے باعث ڈسچارج نہیں کیا گیااس لئے میڈیا کو بلایا کہ مسئلہ سنگین تھا۔
عدالت نے فریقین کے دلائل سننے کے بعد اسپتال کے مالکان کی ضمانت مسترد کرنے کا حکم سنادیا، حکم سنتے ہی اسپتال کے مالکان اسپتال سے فرارہوگئے اور پولیس خاموش تماشائی بن کر دیکھتی رہی۔
عدالت میں سماعت کے بعد نشوا کے والد نے پولیس کی کارکردگی سے عدم اطمینان کا اظہار کرتے ہوئے کہا کہ پچھلی سماعت کی طرح اس سماعت کے بھی ملزمان فرار ہوئے ہیں ہم اسپتال ڈی سیل کرنے کیخلاف سپریم کورٹ سے رجوع کریں گے۔
