Tag: ضمانت کی درخواستیں

لاہور : انسداد دہشت گردی عدالت نے چیئرمین تحریک انصاف کی جناح ہاوس حملہ سمیت 7 مقدمات میں ضمانت کی درخواستیں مسترد کر دیں۔

تفصیلات کے مطابق انسداد دہشت گردی عدالت کے جج اعجاز احمد بٹر نے تحریک انصاف کے سربراہ کی جناح ہاؤس سمیت سات مقدمات میں ضمانت کی درخواستوں پر سماعت کی۔

تحریک انصاف کے سربراہ عدالت میں پیش نہیں ہوئے، ان کے وکیل بیرسٹر سلمان صفدر نے بتایا کہ اُن کے موکل کو ایک پیشی کیلئے استنثی دیا جائے، وہ ایک مقدمے سزا کی وجہ سے جیل میں ہونے کی وجہ سے پیش نہیں ہوسکتے۔

بیرسٹر سلمان صفدر نے استدعا کی کہ ٹیکنیکی بنیادوں پر درخواست مسترد نہ کی جائے اور اس حوالے سے اعلی عدلیہ کےفیصلے پیش کرنے کی مہلت دی جاٸے۔

جس پر عدالت نے ریمارکس دیے کہ پہلے ہی آپ کو ایک موقع دیا جا چکا ہے، آپ کو اس دوران تیاری کر لینی چاہیے تھی۔

پراسیکیوٹر نے مخالفت کرتے ہوئے کہا کہ جب کوئی ملزم سزا پر جیل میں ہو تو اسے عدالت میں پیش نہیں کیا جاتا، اس لیے درخواست ضمانت مسترد کی جائے۔

فاضل جج نے کہا کہ سزا یافتہ ملزم نہیں پیش ہوتے، عدالت نے دلاٸل مکمل ہونے پر چئیرمن تحریک انصاف کے پیش نہ ہونے پر ضمانت کی درخواستیں مسترد کر دیں۔

یاد رہے تحریک انصاف کے سربراہ نے جناح ہاؤس پر حملے سمیت سات مقدمات میں عبوری ضمانت کیلئے انسداد دہشت گردی کی عدالت سے رجوع کیا تھا۔