اسلام آباد: قومی اسمبلی کی حالیہ 33 نشستوں پر ہونے والے ضمنی انتخابات کے انعقاد سے متعلق پی ٹی آئی نے بڑا مطالبہ کردیا ہے۔

اے آر وائی نیوز کے مطابق پی ٹی آئی کے مرکزی سیکرٹری جنرل اسد عمر نے سیکرٹری الیکشن کمیشن کو خط لکھا ہے جس میں انہوں نے کہا کہ الیکشن کمیشن تینتیس نشستوں پرضمنی انتخابات کا شیڈول جاری کرچکاہےاور پولنگ کے لئے جمعرات کا دن مقررکیاہے۔

اسد عمر نے کہا کہ جمعرات معمول کا دن ہےاور عوام مصروف ہوں گے، ورکنگ ڈے پر پولنگ سے ووٹرز ووٹ کےحق سے محرومی کےامکانات ہیں اگر مقامی طورپر چھٹی کا فیصلہ کیاجاتا ہےتو بھی ٹرن آؤٹ پرمنفی اثرکےامکانات ہیں۔

یہ بھی پڑھیں: پنجاب میں انتخابات، حکام کی سیکورٹی فراہم کرنے سے معذرت

رہنما پی ٹی آئی کا کہنا تھا کہ الیکشن کمیشن شیڈول پر نظر ثانی کرےاوراتوار انیس مارچ کو انتخابات کرائے، الیکشن کی تاریخ میں معمولی سی تبدیلی سے ووٹرز کی شرکت کی حوصلہ افزائی ہوگی۔

واضح رہے کہ آج پنجاب میں ضمنی انتخابات سے متعلق چیف الیکشن کمشنر کی سربراہی میں اہم اجلاس ہوا جس میں صوبائی حکام کی جانب سے انتخابات کیلئے سکیورٹی فراہم کرنے سے معذرت کی گئی۔

چیف سیکرٹری نے شرکا کو بتایا کہ انتظامی افراد ، پولیس افسران، اساتذہ کی ڈیوٹیاں انتخابات میں لگائی جاتی ہیں یہی اہلکار مردم شماری میں بھی ڈیوٹی سرانجام دے رہے ہوں گے اسی دوران بچوں کے امتحانات اور انسداد پولیو مہم بھی ہو گی انتخابات کے لئے عملے کی دستیابی مشکل ہوگی ۔

اسلام آباد : پی ٹی ایم کے سربراہ مولانا فضل الرحمان کے ضمنی انتخابات کے بائیکاٹ کے اعلان کے باوجود ن لیگ کے امیدواروں نے کاغذات نامزدگی جمع کرانا شروع کر دیئے۔

تفصیلات کے مطابق حکمراں اتحاد ضمنی الیکشن لڑنے پر اختلافات کا شکار ہے ، مولانا فضل الرحمان نے الیکشن نہ لڑنے کا اعلان تھا لیکن ن لیگ میدان میں آگئی۔

ن لیگ کے امیدواروں نے کاغذات نامزدگی جمع کرانا شروع کر دیئے۔

قومی اسمبلی کے ضمنی انتخاب پر پی ڈی ایم ،پیپلز پارٹی متفقہ فیصلہ نہ کرسکے، ن لیگ کی متفقہ فیصلہ کرنے کی کوششیں رائیگاں گئیں۔

پیپلز پارٹی نے انتخابی بائیکاٹ کی مخالفت کر دی تھی، پی پی ذرائع کا کہنا تھا کہ پیپلز پارٹی نے اتحادیوں کو دو ٹوک جواب دے کر کہا گیا ہے کہ وہ پی ڈی ایم اتحاد کا حصہ نہیں رہے ہیں۔

ذرائع کے مطابق پیپلز پارٹی نے مؤقف پیش کیا تھا کہ وہ پی ڈی ایم قیادت کے فیصلے ماننے کے پابند نہیں ہے، اور اپنے سیاسی فیصلے کرنے میں مکمل آزاد ہے۔

پی پی کا کہنا تھا کہ ان سے پی ڈی ایم قیادت نے ضمنی الیکشن کے بائیکاٹ کے فیصلے پر مشاورت نہیں کی ہے، اگر وہ مشورہ کرتی تو ضرور اس حوالے سے سوچتے۔