Tag: ضمنی انتخابات

کراچی: پی ایس پی رہنما مصطفیٰ کمال کا کہنا ہے کہ وہ پاکستان کے ایجنٹ ہیں را کے نہیں، اسٹیبلشمنٹ کے کے ایجنٹ ہوتے تو سارے مسائل ایک فون کال پر حل ہو جاتے۔

اے آر وائی نیوز کے پروگرام آف دی ریکارڈ میں گفتگو کرتے ہوئےکراچی کے سابق ناظم اور پاک سرزمین پارٹی کے رہنما مصطفی کمال کا کہنا تھا کہ میں را کا ایجنٹ نہیں،ملک میں تخریب کاری نہیں کرارہا،گٹرمیں رہ کرخود کوصاف نہیں کیا جاسکتا، اسٹیبلشمنٹ کاایجنٹ ہوتا تو انیس قائمخانی پرمقدمہ نہ بنتا اور سارے مسئلے ایک فون کال پرحل ہوجاتے۔

مصطفی کمال نے کہا کہ ایم کیوایم والے جس طرف ہیں اس طرف راکے ایجنٹ ہیں، کچھ لوگ ایک رات حراست میں رہ کر کارکنوں کی نشاندہی کرتے ہیں۔

مصطفی کمال کا کہنا تھا وہ اسٹیبلشمنٹ کے ایجنٹ ہوتے تو ان کی پارٹی کے صدرجھوٹے مقدمے میں جیل میں نہ ہوتے، انہوں نے کہا کہ اسٹیبلشمنٹ کے چہیتے وہ ہیں جن پر بائیس اگست کو غداری کا مقدمہ بنا اور تئیس تاریخ کو اسٹیبلشمنٹ سے سرٹیفیکٹ لے کر باہر آگئے۔

مصطفی کمال کا ایک سوال کے جواب میں کہنا تھا کراچی اور حیدرآباد میں چاکنگ لندن کے حکم پر ہوئی، ایم کیوایم پاکستان کے لندن سے رابطے ہیں۔

کراچی: پاک سرزمین پارٹی کے چیئرمین مصطفیٰ کمال نے پریس کانفرنس سے خطاب کرتے ہوئے کہا کہ پہلی بار کراچی والوں نے خاموشی سے 30 سال سے جاری زیادتیوں کا جواب دے دیا۔

تفصیلات کے مطابق کراچی میں پاک سرزمین پارٹی کے چیئرمین مصطفیٰ کمال نے پریس کانفرنس کرتے ہوئے کہا کہ میں کراچی کی عوام کو خراج تحسین پیش کرتا ہوں جنہوں نے 30 سال سے ہونے والے ظلم اور زیادتیوں کا خاموشی سے جواب دے دیا۔

ان کا کہنا تھا کہ کراچی کی عوام نے ایم کیو ایم کو ووٹ دینے کے لیے گھروں سے نہ نکل کر قاتلوں کے خلاف فیصلہ سنا دیا کہ بس اب بہت ہوگیا۔

مصطفیٰ کمال کا کہنا تھا کہ اس الیکشن کے لیے ایم کیو ایم کے جن کارکنان نے محنت کی اور کام کیا ہم انہیں اپناتے ہیں اور ہمیں ان سے ہمدردی ہے۔ ان ایم کیو ایم کارکنان اور ان افراد کے لیے جنہوں نے ایم کیو ایم کو 15 ہزار ووٹ ڈالے، ہم دعا کرتے ہیں کہ جلد سے جلد وہ بھی سچائی کو قبول کرلیں۔

اس کے بعد مصطفیٰ کمال نے فاروق ستار کو آڑے ہاتھوں لیتے ہوئے کہا کہ فاروق ستار نے جھوٹ بول کر لوگوں کی آنکھوں میں دھول جھونکنے کی کوشش کی، انہیں بدگمان کیا لیکن کل کا رزلٹ یہ بتاتا ہے کہ عوام نے قائد ایم کیو ایم کے ساتھ فاروق ستار اور کمپنی کو بھی مسترد کردیا ہے۔

انہوں نے کہا کہ عوام نے فاروق ستار کا بھی مینڈیٹ مسترد کردیا ہے۔ انہوں نے آئین تبدیل کر کے اور الطاف حسین سے لاتعلقی کا اظہار کرکے لوگوں کو بیوقوف بنانے کی کوشش کی لیکن عوام نے انہیں بھی مسترد کردیا۔ وہ انتظار کر رہے ہیں کہ قائد ایم کیو ایم اللہ کو یا اسکاٹ لینڈ یارڈ کو پیارے ہوں تو قیادت ان کی جھولی میں گرے۔

واضح رہے کہ کل ہونے والے پی ایس 127 کے ضمنی انتخابات میں پیپلز پارٹی کے امیدوار 21 ہزار سے زائد ووٹ لے کر کامیاب ہوگئے۔ ایم کیو ایم کے امیدوار 15 ہزار ووٹ لے کر دوسرے نمبر پر رہے۔

دوسری جانب ایم کیو ایم نے ضمنی انتخاب کے نتائج کو مسترد کرتے ہوئے انہیں چیلنج کرنے کا فیصلہ کیا ہے۔ ایم کیو ایم کل الیکشن ٹریبونل میں اپنی درخواست جمع کروائے گی۔