سال 2025 میں دنیا کے طاقتور ترین پاسپورٹ کی نئی فہرست جاری کر دی ہے اور ایک نئے اور چھوٹے ملک نے یہ اعزاز حاصل کر لیا ہے۔
غیر ملکی میڈیا کے مطابق نوماڈ کیپیٹلسٹ نے سال 2025 کے لیے دنیا کے طاقتور ترین پاسپورٹ کی فہرست جاری کی ہے جس میں سر فہرست نہ سپر پاور امریکا ہے اور نہ ہی فرانس، برطانیہ، جرمنی، کینیڈا یا انگلینڈ۔
199 ممالک کی اس فہرست میں یورپ کے ایک چھوٹے سے ملک نے سب کو پیچھے چھوڑتے ہوئے دنیا کے طاقتور ترین پاسپورٹ کا اعزاز اپنے نام کیا ہے اور یہ ملک آئرلینڈ ہے۔
پاسپورٹس کی درجہ بندی کرنے والی دیگر فہرستوں میں صرف ویزا فری سفر کو مدنظر رکھا جاتا ہے،مگر نوماڈ پاسپورٹ انڈیکس 2025 میں ویزا فری سفر، شہریوں پر ٹیکس، دُہری شہریت، ذاتی آزادی اور دنیا میں اس ملک کے بارے میں لوگوں کے خیالات جیسے 5 شعبوں کو مدنظر رکھا گیا۔
اس فہرست میں آئرلینڈ پاسپورٹ کو نمبر ون قرار دیا گیا ہے اور اس کا اسکور 109 ہے۔
آئرلینڈ کے شہری دنیا کے 176 ممالک میں ویزا لیے بغیر سفر کرسکتے ہیں جبکہ وہاں دیگر شعبوں میں صورتحال بھی دیگر ممالک سے بہتر ہے۔
اس فہرست میں یونان اور سوئٹزر لینڈ 108 اسکور کے ساتھ مشترکہ طور پر دوسرے نمبر پر ہیں جبکہ پرتگال چوتھے نمبر پر براجمان ہے۔
مالٹا اور اٹلی مشترکہ طور پر پانچویں نمبر پر، فن لینڈ، لگسمبرگ اور ناروے مشترکہ طور پر ساتویں نمبر پر ہیں۔
متحدہ عرب امارات، نیوزی لینڈ اور آئس لینڈ کے حصے میں 10 واں نمبر آیا۔
دلچسپ بات یہ ہے کہ دیگر فہرستوں میں اکثر جاپان اور سنگاپور سرفہرست رہتے ہیں مگر اس فہرست میں وہ کافی نیچے ہیں۔
اس کی وجہ وہاں دوہری شہریت اور ٹیکسوں کی پالیسیوں میں دیگر ممالک سے پیچھے رہنا ہے۔
پاکستان کا پاسپورٹ کس نمبر پر؟
دوسری جانب کمزور ترین پاسپورٹس میں پاکستان پانچویں نمبر پر ہے۔ اس سے کمزور ممالک میں عراق، اریٹریا، یمن اور افغانستان ہیں۔
