اسلام آباد : وفاقی وزیرخارجہ خواجہ آصف نے کہا ہے کہ آصف زرداری کے پاس اپنی پارٹی کو تباہ کرنے کے بعد اب اسٹیج پر صرف رقص کرنا ہی رہ گیا ہے اور حکومت کے خلاف ایک جیسے کردار والی جماعتیں ہی اکٹھی ہو رہی ہیں.

ان خیالات کا اظہار انہوں نے میڈیا کو انٹرویو دیتے ہوئے کیا، خواجہ آصف کا کہنا تھا کہ آصف زرداری نے پیپلزپارٹی کو اے ٹی ایم مشین بنایا ہوا ہے وہ صرف اپنے مفادات کے تحت پالیسی تبدیل کرلیتے ہیں.

وفاقی وزیر خارجہ نے کہا کہ بینظیر بھٹو کی شہادت کے بعد سے پیپلز پارٹی اخلاقی زوال اور جمہوری روایات کا فقدان بڑھتا جارہا ہے جس کے ذمہ دار آصف زرداری ہیں اور شاید اسی کا جشن مناتے ہوئے وہ اسٹیج پر محو رقص تھے.

خواجہ آصف کا کہنا تھا کہ مسلم لیگ (ن) کے خلاف سازشیں ناکام ہوں گی اور ہماری حکومت ختم کرنے کی کوششیں کرنے والوں کو ما یوسی کے سوا کچھ ہاتھ نہیں آئے گا بلکہ الٹا ہزیمت اُٹھانی پڑے گی.

انہوں نے پاکستان عوامی تحریک کے سربراہ طاہر القادری کو تنقید کا نشانہ بناتے ہوئے کہا کہ وہ پاکستان سے چندہ اکٹھا کر کے باہرچلے جاتے ہیں اور جب پیسے ختم ہوجائیں تو پھر چھٹیاں منانے واپس آجاتے ہیں اور یہاں چندہ لینا شروع کردیتے ہیں.

ایک سوال کے جواب میں وفاقی وزیر خواجہ آصف نے جواب دیا کہ ابھی تک بحث بروقت الیکشن پر ہو رہی ہے اور قبل ازوقت الیکشن کے فیصلے پرپارٹی میں ابھی تک غورنہیں ہوا ہے بلکہ یہ معاملہ ایجنڈے میں ہی شامل نہیں ہے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

لاہور : سابق صدر آصف زرداری نے کہا ہے کہ طاہر القادری کے ساتھ مل کر شہباز شریف کے خلاف تحریک سڑک پر چلائیں گے اور اگر علامہ صاحب کا حکم ملا تو کنٹینر میں بھی پاکستان عوامی تحریک کے ساتھ کھڑے ہوں گے.

ان بعد اعلان انہوں نے ادارہ منہاج القرآن کے مرکزی دفتر میں سربراہ پاکستان عوامی تحریک طاہر القادری کے ہمراہ مشترکہ کانفرنس سے خطاب کرتے ہوئے کیا، آصف زرداری نے سانحہ ماڈل ٹاؤن پر شہباز شریف سے استعفیٰ کا بھی مطالبہ کردیا.

حکومت کے خلاف تحریک چلانے کے کا اعلان کرتے ہوئے سابق صدر کا کہنا تھا کہ ہم آئین کو توڑنے کی بات نہیں کر رہے بلکہ صرف حکومت سے لڑنے کی بات کر رہے ہیں جس کے لیے سڑکوں پہ آنا پڑا تو دریغ نہیں کریں گے.

انہوں نے مزید کہا کہ حکومت کی کارکردگی کا یہ عالم ہے کہ سی سی آئی کے اجلاس 6،6 ماہ نہیں ہوتے اور پورے ملک میں غیر یقینی صورت حال ہے جس میں پتہ ہی نہیں چل رہا ہے کہ کار حکومت کون چلا رہا ہے.

آصف زرداری نے کہا کہ ملک میں تبدیلی کا واحد طریقہ ووٹ ہی ہے اور ملک کے موجودہ مسائل کا حل صرف سیاسی قوتیں ہی حل کرسکتی ہیں چنانچہ اصولی بنیادوں پر طاہر القادری کے ساتھ کھڑے ہیں اسے سیاسی ڈیل کا نام نہیں دیا جائے۔

قبل ازیں پریس کانفرنس سے خطاب کرتے ہوئے سربراہ پاکستان عوامی تحریک طاہر القادری نے کہا کہ سانحہ ماڈل ٹاؤن نواز شریف کی ایما پر ہوا ہے جس کے کمانڈر رانا ثنا اللہ تھے اور جس کا حکم شہباز شریف نے دیا تھا چنانچہ نے شہباز شریف اور رانا ثنا اللہ فوری طور پر مستعفی ہوں۔

ڈاکٹر طاہر القادری نے کہا کہ مظلوموں کی مدد کیلئے جو بھی قدم اٹھانا پڑا تو اٹھائیں گے لیکن شہداء کے خون کا سودا نہیں کریں گے، مظلوموں کی آہ و بکا تخت رائے ونڈ کو ہلا دے گی اور جاتی امراء جلد اپنے منطقی انجام کو پہنچ جائے گا ۔

انہوں منہاج القرآن آمد پر سابق صدر آصف زرداری کا شکریہ ادا کرتے ہوئے کہا کہ یہ زرداری صاحب کا اپنا گھر ہے، مظلوموں کی دادرسی کے لیے ان کا جذبہ دیکھ کر بہت خوشی ہوئی ہے۔

لاہور : سربراہ پاکستان عوامی تحریک ڈاکٹر طاہرالقادری نے کہا ہے کہ سپریم کورٹ کے تفصیلی فیصلے شریف خاندان کے تمام چور بازاری کو طشت ازبام کردیا ہے جس کے بعد انہیں عدالت کے خلاف مہم چلانے پر معافی مانگنی چاہیئے.

علامہ طاہر القادری سپریم کورٹ کی جانب سے پاناما پیپرز کا تفصیلی فیصلہ جاری کرنے پر تبصرہ کر رہے تھے انہوں نے کہا کہ تفصیلی فیصلہ آنے اور تمام مبہم سوالات کے ٹھوس جوابات ملنے کے بعد اب کیوں نکالا کی گردان کرنے والے جواب دیں کہ قومی خزانہ کیوں لوٹا؟

انہوں نے کہا کہ قوم ، پارلیمنٹ اور عدلیہ کے سامنے جھوٹ بولنے اور جعلی دستاویزات جمع کرانے والوں کواعلیٰ عدلیہ کے خلاف نفرت آمیز مہم جوئی کرنے پرشرم آنی چاہیے اور اپنے اس رویئے کی قوم و عدلیہ سے معافی مانگنی چاہیئے.

یہ پڑھیں : نوازشریف نے جان بوجھ کر اثاثے چھپائے، عدالت کا تفصیلی فیصلہ

ڈاکٹر طاہر القادری نے کہا کہ عدالیہ کا فیصلہ مستحسن ہے تاہم جعلی حلف نامے دینے والوں کو جیل نہ بھیج کر نرمی دکھائی گئی ہے اور نیب سے یہ سوال کیا جانا چاہیئے کہ شریف خاندان کا نام ای سی ایل میں ڈال کر انہیں گرفتار کیوں نہیں کیا گیا اور اب تک وہ جیل میں ہونے کے بجائے کے بجائے آزاد کیوں گھوم رہے ہیں.

خیال رہے سپریم کورٹ نے پاناما پیپرز کیس کا 23 صفحات پر مشتمل تفصیلی فیصلہ جاری کردیا ہے جس میں کہا گیا ہے کہ نوازشریف کی نااہلی سےمتعلق حقائق غیرمتنازع تھے، افسوس کی بات ہے کہ نواشریف نے بد دیانتی کے ساتھ جھوٹا بیان حلفی دے کر پارلیمنٹ، عوام اور عدالت کو بے وقوف بنایا اور دھوکہ دہی کے مرتکب ہوئے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔