موسم گرما کی آمد آمد ہے اور ایسے میں معدے کو ٹھنڈک پہنچانے والی غذاؤں کا استعمال صحت کیلئے مفید ہے، خاص طور پر دوپہر کے کھانے میں دسترخوان پر سلاد اور مکھانے کا رائتہ ہونا ضروری ہے۔
آج ہم آپ کیلیے مکھانے کے رائتے کی ایک ایسی ترکیب لائے ہیں جو بنانے میں آسان اور اس کے طبی فوائد بھی بے شمار ہیں، مکھانے صحت کے لیے بہت فائدہ مند ہیں، اسے انگریزی زبان میں ’فوکس نٹ‘ کہا جاتا ہے، مکھانہ بہت سے غذائی اجزاء سے بھرپور ہوتا ہے۔
مکھانے جسمانی وزن کم کرنے میں اہم کردار ادا کرتا ہے، اس کے علاوہ یہ بلڈ پریشر اور بلڈ شوگر کو کنٹرول کرنے میں بھی اہم کردار ادا کرتا ہے۔
ایک میڈیا رپورٹ کے مطابق ماہرین کا کہنا ہے کہ اس میں موجود پروٹین، فائبر، اینٹی آکسیڈنٹس، کاربوہائیڈریٹس اور منرلز جسم کے لیے بہت فائدہ مند ہیں۔ یہ بات 2017 میں جرنل آف فوڈ سائنس میں شائع ہونے والی ‘مکھانہ (Euryle Ferox Salisb)’کے عنوان سے ہونے والی ایک تحقیق میں بھی سامنے آئی تھی۔
گرمیوں میں ہر گھر میں روزمرہ کی خوراک میں کسی نہ کسی شکل میں دہی کو شامل کیا جاتا ہے کیونکہ اس موسم میں دہی جسم کو صحت مند رکھنے میں بہت مددگار ثابت ہوتی ہے، جب کہ مکھانہ کے فوائد سے کون واقف نہیں، ایسے میں اگر مکھانہ اور دہی کا امتزاج ایک ہی ترکیب میں پایا جائے تو کیا کہا جاسکتا ہے۔
مکھانہ رائتہ بنانے کی ترکیب :
اس کے اجزاء میں ایک کپ دہی، ایک کپ مکھانے، ایک چائے کا چمچ رائتہ مسالہ، ، ایک چمچ چاٹ مسالہ، ایک چائے کا چمچ گرم مسالہ، دیسی گھی ایک چمچ، ایک چائے کا چمچ باریک کٹا دھنیا اور لال مرچ اور نمک حسب ذائقہ لے لیں۔
ترکیب
مکھانہ رائتہ بنانے کے لیے سب سے پہلے ایک پین لیں اور اسے درمیانی آنچ پر گرم کریں پھر اس میں ایک چمچ دیسی گھی ڈالیں اور جب تھوڑا گرم ہو جائے تو مکھانے ڈال کر بھون لیں جب مکھانوں کا رنگ ہلکا سنہری ہو جائے تو گیس بند کر دیں اور مکھانوں کو پلیٹ میں نکال کر ایک طرف رکھ دیں، جب مکھانے ٹھنڈے ہو جائیں تو انہیں مکسچر میں ڈال کر موٹا موٹا کُوٹ لیں۔
اب ایک برتن میں دہی ڈال کر اچھی طرح پھینٹ لیں جب دہی اچھی طرح مکس ہوجائے تو اس میں چاٹ مسالہ، گرم مسالہ، لال مرچ پاؤڈر، رائتہ مسالہ اور حسب ذائقہ نمک ڈال کر اچھی طرح مکس کرلیں۔
اب اس میں موٹا پسا ہوا مکھانہ ڈال کر مکس کریں۔ اگر رائتہ تیار کرنے کے بعد گاڑھا لگے تو حسب ضرورت پانی ڈال دیں، آپ کا مزیدار مکھانہ رائتہ تیار ہے۔ اب اسے ہرے دھنیے سے گارنش کرکے دسترخوان پر سجا دیں۔
