Tag: طلال چوہدری

اسلام آباد : وزیر مملکت داخلہ طلال چوہدری نے پی ٹی آئی والوں کو خبردار کیا ہے کہ اگر کسی نے چڑھائی کی تو 26 مئی سے زیادہ مرمت کریں گے۔

تفصیلات کے مطابق وزیر مملکت داخلہ طلال چوہدری نے صحافیوں سے گفتگو میں کہا کہ بانی پی ٹی آئی بارباراین آراومانگ رہےہیں، یہ کبھی امریکا سے بندے لے آتے ہیں، اسرائیلیوں کو بھی تکلیف ہے کہ عمران خان کیوں سزابھگت رہا ہے۔

وزیرمملکت داخلہ کا کہنا تھا کہ عمران خان  کے بچے ضرور آئیں تاکہ پتہ چلے والد نے کیا کھلواڑ کیا، دوسروں کے بچوں کو احتجاج پر اکساتے اور اپنے بچوں کو لندن میں چھپادیا، جو خود قانون کی پاسداری نہیں کرتے وہ ریاست کی بات کیسے کر سکتے ہیں اور جب بھی پکڑے جاتے تو کہتے ہمیں این آر او چاہیے۔

انھوں نے کہا کہ یہ وہی لوگ ہیں جنہوں نے 9 مئی کوریاست پرحملہ کیا، یہ اپنےگناہوں کی سزا سے بچنے کے لیے ہر دروازہ کھٹکھٹا رہے ہیں، یہ اسرائیلی داماد ہے، اسے بچانے کے لیے پوری لابی کام کر رہی ہے۔

وزیرمملکت کا مزید کہنا تھا کہ جن کے بچوں کو اسرائیل نے پالا وہ پاکستان کے وفادار کیسے ہوسکتے ہیں، فلسطینی بچوں کےقتل پر خاموشی، ایران پر حملے پر ایک لفظ نہیں کہا ،پی ٹی آئی نے کبھی اسرائیل کی کھل کر مذمت نہیں کی، یہ سوال ہونا چاہیے ان کا تعلق پاکستان سے ہے یا اسرائیل سے ہے۔

سوشل میڈیا پر پروپیگنڈے کے حوالے سے انھوں نے کہا کہ سوشل میڈیا کو بغاوت اور قتل کے فتوے دینے کیلئےاستعمال نہیں کیاجا سکتا، پاکستان میں بھی سائبر کرائم اورسیکیورٹی کے قوانین موجود ہیں، موبائل اٹھا کرکسی کی جان خطرے میں ڈالنا آزادی اظہار نہیں۔

طلال چوہدری نے زور دیا کہ سوشل میڈیا کوریگولیٹ کرنا وقت کی ضرورت ہے، جو یوٹیوبرز قانون کے مطابق چلتے ہیں وہ مکمل طور پر آزاد ہیں۔

ان کا کہنا تھا قانون کے دائرے میں احتجاج کاحق سب کو ہے، اگرچڑھائی یابغاوت کی کوشش ہوئی تو ریاست دیوار بن کر کھڑی ہو گی، 26 مئی سے زیادہ مرمت کریں گے ، جمہوریت میں لانگ مارچ اور دھرنے ہوتے ہیں بغاوت نہیں ، پاکستان کو قانون کی حکمرانی سے چلایا جائے گا دباؤ سے نہیں۔

لاہور : مسلم لیگ ن کے رہنما طلال چوہدری کا کہنا ہے کہ بشریٰ بی بی نے بانی پی ٹی آئی سے شادی اس لئے کی کہ وہ سیاست اور پی ٹی آئی پرقبضہ چاہتی ہیں۔

تفصیلات کے مطابق مسلم لیگ ن کے رہنما طلال چوہدری نے پریس کانفرنس کرتے ہوئے کہا کہ بانی پی ٹی آئی اور ان کی گھر والی ملک کا تماشا بنا رہے ہیں، جب سے یہ جوڑی بنی ہے پاکستان میں سیاست اور گورننس کو اپنے مفاد کی خاطر نقصان پہنچایا۔

تحریک انصاف پر تنقید کرتے ہوئے ن لیگی رہنما کا کہنا تھا کہ پی ٹی آئی دور حکومت میں پنجاب میں پنکی، گوگی کا راج تھا، پنجاب میں پی ٹی آئی دور میں ہر پوسٹنگ ٹرانسفر کا ریٹ تھا، پنکی اور گوگی بازار اور منڈی چلاتی تھیں، شوہر کے ہوتے ہوئے خرید و فروخت، اس کےعہدے کا ناجائز استعمال کیا گیا۔

انھوں نے کہا کہ کبھی ہیرے کی انگوٹھیوں، زمین کےسودے تو کبھی190ملین پاؤنڈ کھانےکیلئے یونیورسٹی کا جھانسہ، اللہ کےنام پربنائی ہوئی یونیورسٹی کرپشن کےپیسےسےبننی تھی۔

بشریٰ بی بی کے حوالے سے طلال چوہدری کا کہنا تھا کہ بشریٰ بی بی ایک بڑی امبیشیس خاتون ہیں، انھوں نے بانی پی ٹی آئی سےشادی اس لئےکی کہ یہ سیاست،پی ٹی آئی پر قبضہ چاہتی ہیں۔

انھوں نے بتایا کہ پی ٹی آئی دورحکومت میں پنجاب اور وفاق میں جو کھیل کھیلا گیا وہ سب کو پتہ ہے ، پی ٹی آئی کی سیاست اب غیر سیاسی لوگوں کے ہاتھوں میں ہے، پہلے پی ٹی آئی کی سیاست چند وکلا کے ہاتھوں میں تھی جنہوں نےتباہی کی، اب پی ٹی آئی کی باگ ڈور چند گھریلو خواتین کے ہاتھ میں ہے، نند بھاوج نے پارٹی پر قبضے کیلئے کھیل کھیلنا شروع کیا ہے۔

بانی کی اہلیہ کے بیان سے متعلق ن لیگی رہنما کا کہنا تھا کہ بشریٰ بی بی کےگزشتہ روزکےبیان پرشرم آنی چاہیے، شعبدہ بازی کیلئےجہاں ننگےپاؤں جایاکرتےتھےوہاں سےجیبیں بھر کر آتے تھے، ان جیبوں میں گھڑیاں اور ہار پتہ نہیں کیا کیا ہوتا تھا، جن ملکوں میں جاتے تھے وہاں سےجیبیں بھرکرتحفےلاتےتھے.

انھوں نے مزید کہا کہ سعودی عرب کے حکمران اچھے نہیں لگتے تھے تو آپ کو ان کے تحفے اچھے لگتے تھے، اگر ان کے حکمران اچھے نہیں تھے تو ان کی گاڑی کے ڈرائیور کیوں بنے؟ پاکستان کے تعلقات کو آپ داؤ پر لگاتے ہیں، پاکستان کے عوام کا جو سعودی عرب سے دل کے تعلق کا آپ مذاق اڑاتے تھے۔

مسلم لیگ ن کے رہنما کا کہنا تھا کہ جھوٹ پر بیانیہ بنانا بانی پی ٹی آئی کی عادت ہے، کبھی سائفر، کبھی آئی ایم ایف ڈیل رکوانے کی صورت میں آپ جھوٹا بیانیہ بناتے آئے ہیں، مشکل ترین حالات میں پاکستان کی مدد کرنیوالے ممالک پی ٹی آئی کا نشانہ ہیں۔

انھوں نے کہا کہ چین اور سعودی عرب ہرمشکل وقت میں پاکستان کے ساتھ کھڑا ہوتا ہے، پی ٹی آئی رہنما مروت نے بھی بانی پی ٹی آئی سے ملاقات کے بعد بیان دیا تھا کہ بشریٰ بی بی کا پارٹی اور ملک پر قبضہ کرنے کا خواب ہے۔

اسلام آباد: رہنما مسلم لیگ (ن) طلال چوہدری نے چیف جسٹس پاکستان قاضی فائز عیسیٰ سے مطالبہ کیا ہے کہ وہ سابق ججز کے خلاف احتساب کا عمل شروع کریں۔

طلال چوہدری نے اپنے ایک بیان میں کہا کہ چیف جسٹس پاکستان قاضی فائز عیسیٰ بھی احتساب عمل شروع کریں، اگر آپ نہیں کریں گے تو کوئی اور کرے گا اور پھر گلامت کیجیے گا۔

(ن) لیگی رہنما نے کہا کہ اہم اور طاقتور ادارے نے احتساب اپنے گھر سے شروع کیا ہے تو باقی اداروں کو بھی کرنا ہوگا کیونکہ احتساب پاکستان کی ضرورت ہے۔

انہوں نے کہا کہ ماضی میں جان بوجھ کر دھرنے دیے گئے، سابق چیف جسٹس پاکستان ثاقب نثار کی قیادت میں ایسے فیصلے کیے گئے جس نے ملک کو آج یہاں تک پہنچا دیا، دھرنے کا اعلان ہوتا تھا پھر فیصلے ہوتے تھے جن کی بنیاد پر بانی پی ٹی آئی کو مسلط کیا گیا، پاکستان کی صرف معیشت نہیں بلکہ استحکام کی بنیادیں ہلا دی گئیں، معیشت کو جان بوجھ کر کمزور اور دوست ممالک کو ناراض کیا گیا۔

ان کا کہنا تھا کہ بہت سے لوگ جو شامل تھے ان کا بھی بے رحم احتساب ہونا چاہیے، سیاسی جماعتوں کو بھی مہروں کے خلاف کارروائی کرنا پڑیں گی، پاکستان میں احتساب 75 سال بعد شروع ہوا ہے، الٹی گنگا دست سمت پر آگئی ہے تو سب اداروں کو احتساب کرنا ہوگا، پاکستان میں امید اور خوشحالی واپس آئے گی لیکن اس کیلیے بے رحم احتساب ہونا چاہیے۔

طلال چوہدری نے کہا کہ رؤف حسن، فیض حمید یا ثاقب نثار کی اہمیت پاکستان سے زیادہ نہیں، حکومت ہر صورت یہ ممکن بنائے گی کہ احتساب ہو کر رہے، سیاسی جماعتوں کو بھی اپنی صفوں میں سے صفائی کرنا ہوگی۔

(ن) لیگی رہنما نے کہا کہ افراتفری اور انتشار کی سیاست میں یہ کارروائیاں کوئی ایک آدمی نہیں کر سکتا، اس کارروائیوں میں اداروں کے سربراہ بالخصوص ثاقب نثار بھی شامل تھے، پہلے بات کرتے تھے تو کہتے تھے فیض جی اور اب کہتے ہیں میں کبھی ان سے ملا ہی نہیں۔

پی ٹی آئی ترجمان کے بارے میں طلال چوہدری نے کہا کہ رؤف حسن بیرونی ملک اینٹی پاکستان صحافیوں سے رابطے میں تھا، وہ اکیلا آدمی نہیں تھا بلکہ یہ پورا ایک پلان تھا، رؤف حسن اینٹی پاکستان صحافیوں کو مواد فراہم کر رہا تھا، ان سے تفتیش اور فیض حمید کی حراست کے بعد تحقیقاتی دائرہ وسیع ہوا، ان کے تانے بانے بانی پی ٹی آئی سے ملتے ہیں یہ ایک منظم پلان تھا۔

مسلم لیگ ن کے رہنما طلال چوہدری کے کراچی اور لاہور کے موازنے کے بیان نے نئی بحث چھیڑ دی، مسلم لیگ ن اور پیپلز پارٹی کھل کر آمنے سامنے آگئے۔

تفصیلات کے مطابق اقتدار گیا ساتھ ساری محبتیں اور پیار بھی لے گیا، سیاسی حلیفوں نے دوبارہ حریفوں کا روپ دھار لیا۔

مسلم لیگ ن اور پیپلز پارٹی کھل کر آمنے سامنے آگئے ہیں، کون سا شہر بہتر کراچی یا لاہور؟ طلال چوہدری کے بیان نے نئی بحث چھیڑ دی۔

طلال چوہدری نے پیپلز پارٹی پر تنقید کرتے ہوئے کہا کہ کما کر دینے والے شہر سے کچراتک نہیں اٹھایاجاتا، لاہور چل کردیکھیں وہاں کی تو سڑکیں بھی دھلتی ہیں، شہرقائد کو بھی ایک شہباز شریف چاہیے۔

کراچی اور لاہور کے موازنے پر جیالے میئر مرتضی وہاب چپ نہ رہ سکے اور نون لیگ کےکراچی مخالف اقدامات کی نشاندہی کر ڈالی۔

مرتضی وہاب نے کہا الیکشن سرپر ہیں تو انہیں کراچی یادآگیا، ہم کام کرتےہیں دوسرے صرف باتیں ۔

لاہور: مسلم لیگ ن کے رہنما طلال چوہدری کا کہنا ہے کہ عمران خان نے وہ دن دکھایاجو دشمن نہ کرسکے، پی ٹی آئی پرپابندی نہیں لگائی تو سیاسی لوگوں کاسیاست کرنامشکل ہوجائے گا۔

تفصیلات کے مطابق مسلم لیگ ن کے رہنما طلال چوہدری نے اپنے بیان میں کہا ہے کہ ثاقب نثار نےعمران خان کوصادق اورامین بنایا لیکن عمران خان نے وہ دن دکھایاجو دشمن نہ کرسکے۔

طلال چوہدری کا کہنا تھا کہ عمران خان خود کو قانون سے بالاتر سمجھتےہیں، عمران خان کوپارلیمنٹ ہاؤس حملےپر سزا کیوں نہیں دی گئی؟ عمران خان نہیں لگ رہےعمران ٹھاکرے لگ رہے ہیں۔

ن لیگی رہنما نے کہا کہ عمران خان نے پاکستان کےاستحکام کےاداروں پرحملہ کیا ، سب جانتے ہیں ریاست مدینہ کےنام پر کھیل کھیلا گیا۔

عمران خان کی گرفتاری کے حوالے سے ان کا کہنا تھا کہ القادر ٹرسٹ کرپشن کاپیسہ چھپانے کےلیےبنایا گیا،ٹرسٹ بناناتھا تو حلال کے پیسے سے بناتے۔

طلال چوہدری نے کڑی تنقید کرتے ہوئے کہا کہ تحریک انصاف سیاسی جماعت نہیں ہے، اس پرپابندی نہیں لگائی گئی اورحوصلہ افزائی کی گئی توآگے کیا کریں گے ، پی ٹی آئی پرپابندی نہیں لگائی تو سیاسی لوگوں کاسیاست کرنامشکل ہوجائے گا۔

مسلم لیگ ن کے رہنما کا مزید کہنا تھا کہ قانون نافذکرنےوالوں کوقانون کی طرح ڈیل کرنا ہوگا۔